No.5843/2020-2021

Vawiin khan Rural Development Minister Pu Lalruatkima hovin a pisaah Mizoram State Rural Livelihoods Mission (MzSRLM) hmalaknain sawrkar laipui scheme DDUGKY hnuaia thalai training zo hna hmuhsak tawhte tan Alumni Suppport Rs.8,28,000 sem chhuah a ni.

Alumni Support hi DDUGKY hnuaia thiam thil hrang hrang train chhuak tawh, COVID-19 hripui avanga an hnathawh chhunzawm thei loa Mizorama rawn haw te hnenah an mamawh zual phuhruk nan pek a ni a. Anni bakah DDUGKY hnuai veka train chhuak, hripui kara hna la thawk chhunzawm mek te hnenah nan pek a ni bawk.

RD Minister Pu Lalruatkima chuan MzSRLM hmalakna hnuaiah sawrkar laipui scheme DDUGKY kalpui niin, thingtlang thalaite tan hmasawnna thlentu ropui tak a ni a, thiamna leh eizawnna tha tak tak an hmu chho mek a ni, a ti. He hmalakna hmang hian thingtlang thalaiten eizawnna an neih theih nana kawng kawhhmuha, chherchhuah bakah enkawl zui zel tum a ni, a ti a. Training chhuak tawh thalai tam tak eizawnna hmuhsak an ni tawh a, vanduaithlak takin hripui leng avangin tam takin an hna an chan a, mahni khuaah tlan haw a ngai ta tih sawiin heng harsatna tawk mekte tana tanpuina sum Alumni Support pek an ni chu lawmawm a tih thu Pu Lalruatkima chuan a sawi a ni. Hna chan ta tam tak an awm laiin hripui leng karah pawh mahni chhungte chawmna tura thawk chhunzawm engemawzat an la awm a, chung mite tan pawh anmahni fuihna turin sum pek chhuah a nih thu RD Minister hian a sawi bawk.

Sawrkar laipui scheme DDUGKY hi Mizoramah chuan MzSRLM hnuaiah kalpui a ni a. A tum ber chu thingtlang thalai kum 18-35 ten eizawnna an hmuh theih nana training pek a ni a. Training hi Project Implementing Agency (PIA)te kaltlanga buatsaih niin an zir chhuah hnuah pawh hna an zawnpui thin a ni. Tun thlengin he hmalakna hnuaiah hian mi 544 train chhuah an ni tawh a, mi 290 hna hmuhsak an ni tawh bawk. Vawiina sem chhuah tak Alumni Support pawh PIA te hnenah sem chhuah niin anni hian an hnuaia train chhuak candidate mi pakhat zel tan cheng 4000 theuhin an sem ve leh chhawng dawn a ni. PIA tin te hnena sum hlan dan chu hetiang hi a ni:-
1. e-centric - 90 candidates - Rs.3,60,000
2. Apollo - 27 candidates - Rs. 1,08,000
3. MFM - 37 candidates - Rs. 1,48,000
4. SJ &DI - 9 candidates - Rs. 36,000
5. Eternity Partners - 24 candidates - Rs. 96,000
6. IDEAS - 20 candidates - Rs. 80,000

Anni bakah hian pianphunga rualbanlo candidate pakhat hnenah incentive pawisafai leh thuziak certificate pek a ni bawk.

Vawiin programme hi RD Commissioner Pu Lalhmingthanga’n a kaihruai a, MzSRLM CEO Pi Lalchhandami’n report a pe a ni.