4832/2025-2026

Dated Aizawl, 14th March 2026 : Art & Culture Department leh Delhi Mizoram House te hmalaknain nimin khan Mizoram hmun dangte rualin Delhi-ah pawh Chapchar Kût hman a ni a, Pu Zothankhuma, Additional Controller General of Accounts chu Kut Pa niin Pi Shweta Chauhan, Resident Commissioner chu Kût thlengtu a ni.

Chapchar Kut lawmnaah hian Delhi Mizo Zirlai Pawl Cultural Troupe ten hnam lam chi hrang hrang hmuh nawm tak tak an entir a, Pi Nancy Zothanmawi'n ‘Aw nang kan Lal kan Pathian’ tih hla sain Kût hmangtute a awi a. Pu Alexander V Chongthu, Additional Resident Commissioner-in lawmthu sawiin hun hi a khar a ni.

Delhi-a Chapchar Kut hi Rajya Sabha MP Pu K Vanlalvena te, MADC Chief Executive Member Pu M Laikhaw te, Pu F Malsawma, Ex Minister leh Mizo senior officer leh mi pawimawh thahnem takin an chhim a ni.