Vawiin chawhma dar 10:30 khan India ram State zawng zawngte telna, NREGA Mela chu Agriculture Mela Ground, Pusa Road ah neih a ni a, he hun hi Mizoram atangin Pu Lalrinliana Sailo, Minister of Health & Family Welfare etc. hovin Rural Development Department, Information & Public Relations Department leh Mizoram Journalist Association aiawhten an hmang a ni.
Mela hawnna inkhawmah hian Pu Pranab Mukherji, Union Foreign Minister chu khhuallian ni in, Pi Sonia Gandhi, UPA Chairperson chu Guest of Honour niin thusawina an nei a, R.D. Minister Dr. R.P. Singh chuan a kaihruai a ni.

Mizoram Stall tha tak R.D. Department in an buatsaih chu tlawhin Pu Lalrinliana, Minister chuan UPA Sawrkarin NREGA a lo buatsaih chu Mizoram ah felfai leh zuala kalpui a nih tur thu sawiin, “Dikna leh rinawmna nen mirethei te ni 100 inhlawhna siam hi kan kalpui zel dawn a, vawiin ni ah Mizoram aiawh Chief Minister leh R.D. Minister te thiltul dang avangin an lo tel theih lohna avangin kei ka lo tel a, in stall mawi tak te, in inbuatsaihna nasa tak te ka hmu hi lawmawm ka ti” a ti.

Pu Vanengmawia, Secretary, R.D. pawhin thu sawiin, Mizoram aiawha kalte taimakna leh thahnemngaihna a faka, State lian tam tak aiin participants tam zawk kan nei chu lawmawm a ti.

Pi Sonia Gandhi pawhin Mizoram Stall a tlawh a, heta an entir Grape Wine, handlooms and handicrafts leh thil dangte chu a fak hle a. Mizoram aiawhte chuan an lo lawm hle a ni. Lunglei, Serchhip, Kolasib Deputy Comissioner te bakah Project Director DRDA te, Information lam leh NREGA hmang tangkaitute an tel tha hle. Mizoram Co-ordinator chu Pu Zothanmawia, Deputy Secretary, R.D. Department a ni.