No.1534/2020-2021

Tukin zing dar 1:00AM khan Covid 19 hrileng avanga Delhi-a tangkhang mi 37 leh West Bengal-a tangkhang mi 6 ten Khawzawl an thleng a, Zuchhip field-a screening point ah Khawzawl Bawrhsap Pu H.Lianzela, Khawzawl SP leh Medical team te bakah Manangement Zone hrang hrang-a Zonal officer-te leh Care taker ten an lo dawng sawng ani.

Lo dawn sawnna programme tawi ah Bawrhsap chuan hrileng avanga mahni ram pana lo haw te chu mipui ten an lo lawm thu te, zin kawng hahthlak tak rei tak an rawn zawh hnu pawha thuawih taka an la awm avanga fakawm a tih thu te, ram himna atan khung hran an nih chhunga thu awih taka awm tur te, khunghranna hmunah hmanrua leh enkawlna duhthusam an dawng lo anih pawh a hrethiam a tuar hram hram turin a chah bawk. Khawzawl Vengthar Bialtu Pastor Rev. F Lalsangkunga'n hunserh hmang in lo th43leng tharte Pathian hnenah a hlan bawk ani.

Lo thleng tharte hi uluk taka an hriselna endik an ni a, test result-a an that vek hnuah khung hranna tura ruat Khawzawl Vengthar Presbyterian Kohhran Hall-ah mi 37 leh Dinthar Presbyterian Kohhran Hall-ah mi 6 dah luh nghal an ni.

Tukin dar 9:00AM khan Nagpur atanga rawn haw mi 6 leh Chhatisgarh atanga rawn haw mi 2 an rawn thleng leh bawk a. Dan anga medical team ten an hriselna an endik hnu ah harsatna nei an awm lova, an awmna tura ruat sa Venglai Presbyterian Kohhran Hall ah mi 6 leh PWD Staff lodge ah mi 2 dah nghal an ni bawk.

Tun dinhmunah Khawzawl District chhungah Covid 19 hrileng avanga Quarantine Centre-a khung hran tawh zawng zawng chu mi 197 an tling tawh a, chung zinga mi 64 te chuan harsatna nei lovin Quarantine Centre an chhuahsan fel tawh a, mi 133 khung hran mek an ni. Tin, Isolation Centre-ah mi 7 dah tawh ni in an zinga mi 2 ten harsatna nei lovin an chhuahsan tawh a, mi 5 an la awm mek bawk.