4248/2023-2024

Champhai, the 19th March, 2024: General Election to Lok Sabha, 2024 hmalakna hnuaiah vawiin chawhnu dar 1:00 khan District Election Officer Pu James Lalrinchhana chuan Bank Manager-te DC Conference Hall-ah meeting a neihpui.

District Election Officer Pu James Lalrinchhana chuan inthlanna muanawm, felfai leh langtlang buatsaih turin sum leh pai lengvelte uluk taka thlithlai reng a pawimawh thu sawiin, security thlenga nghawng a neih avangin uluk taka vil a tul thu a sawi a. Bank-te chu mipuite tlawh leh dawr tam an nih avangin voter-te zirtirna pek kawnga hmanraw pawimawh tak an nih thu a sawi bawk.

Election Expenditure Monitoring (EEM) Nodal Officer Pu Lalrinawma, PD, DRDO Champhai chuan Lok Sabha Election-a expenditure monitoring chungchanga bank hotute hriattur pawimawhte a tarlang a. Inthlan vuakvetah sum leh pai chevel rinhlelhawm a awm a nih chuan thuneitute hnena thlen vat turin a chah a. Election Notification chhuah atangin nitin suspicious transaction report pek a ngaih thu leh report pek dan turte a sawifiah bawk.

He hunah hian Dy. DEO Pu K. Zorammuana, Addl. DC Champhaiin SVEEP hnuaia voter education leh registration kalpui tura ECI, Indian Banks Association leh Department of Post-ten thawhhona thuthlung an siam tlangpui a sawifiah bawk.

He hunah hian bank kaltlanga sum leh pai chevel vil kawnga hmalak ngaite bakah voter awareness leh voter registration chungchanga Election Commission of India-in Indian Banks Association (IBA) leh Department of Post (DoP) te February ni 28, 2024 a thawhdunna thuthlung a lo siampui tawh bawhzui dan turte sawiho a ni a. Thawhho dan tur thuthlung siam 9 atanga 7 te hi Indian Banks Association leh Department of Post-te bawhzui tur niin, a bak point 2 te chu ECI lam bawhzui tur a ni thung a ni.

Thawhhona thuthlung ang chuan Bank Branch-tinte chuan vote thlak pawimawhna leh vote thlak tura sawmna, application pawimawh inhrilhhriatna, vote thlak kawnga tulte inzirtirna leh pawimawh hrang hrangte anmahni hmunhma Office-ah leh ATM pawnahte awlsam taka hmuh theih turin poster/ flex/ hoarding hmangtein an tarlang dawn a. Website-ah voter education message-te tarlan tur a ni a, voter awareness forum din tur niin, SVEEP training module inhrilhhriatna neihte, National Voters' Day lawmna buatsaih leh election kaihhnawih inzirtirna a tul dan ang zela buatsaihte a tel a ni.