4268/2023-2024

Champhai, the 20th March, 2024: Vawiin chawhnu dar 2:30 khan Pu James Lalrinchhana, District Election Officer, Champhai District chuan Champhai District chhunga Chanchinbumite DC Conference Hall-ah kawmin General Election to Lok Sabha, 2024 atana inpuahchahna neih tawh dan, hmachhawp leh pawimawh hrang hrangte a hrilhfiah.

District Election Officer Pu James Lalrinchhana chuan Champhai District-ah inthlanna muanawm, felfai, langtlang leh entawntlak tak neih a lo nih tawh thin thu sawiin, democracy chawinun zel kawnga lungthu pawimawh tak Chanchinbumite hmalakna fakawm tiin, inthlanna neih turah pawh an tawiawmna District Election Office-in a beisei thu a sawi a. Vote thlak leh election kaihhnawih hriattur pawimawh, mobile application tangkai tak takte, Model Code of Conduct, Sawrkar thupek chhuah leh hriattirnate mipui hnena thahnemngai taka puangzar zel turin a sawm a. District Election Office-ah tlangnel taka lenglut tam tur leh hriat duh an neihte zawh hreh lo turin a chah a. Press Meet pawh a tul dan ang zela buatsaih tum a nih thu a sawi bawk.

He hunah hian SP Champhai Pu Vineet Kumar chuan Law & Order leh venhimna hna thawh kawnga hmalakna leh ruahmannate a sawifiah a. Election-ah a bikin Law & Order ngaihpawimawh a nih thu sawiin, dan lova thil tihte uluk taka ven a nih tur thu a sawi a. MLA Election-ah security lam hnathawh that avangin Champhai District-in chawimawina a dawn mai bakah India rama Police Station tha ber 4-na Champhai PS in tunhnaiah a dawn thu a sawi a. Enforcemet Agency dangte nen lungrual taka thawhho a nih thu sawiin, mipuite'n tha taka an thawhpui thin vangin lawmthu a sawi bawk.

He huna tarlan a nih danin Champhai District-a Assembly Constituency 3, 23- Champhai North A/C, 24- Champhai South A/C leh 25- East Tuipui A/C huamchhungah Polling Station 84 awmin kalpawh leh biakpawh harsa a awm lova, polling party-te pawh vote thlak hma chiah ni P-1 a chhuak vek thei tura beisei an ni. February ni 8, 2024-a Final Electoral Roll tlangzarhin a tarlan dan chuan Champhai District-ah voter 57,454 an awm a. Heng zinga 28,018 hi mipa niin 29,436 hi hmeichhia an ni. Mipa aia hmeichhe vote tam zawkna hi 1,418 a ni. Champhai District-ah hian Polling Station 84 awmin 23-Champhai North Assembly Constituency-ah Polling Station 30 a awm a, 24-Champhai South Assembly Constituency-ah Polling Station 25 awmin, 25-East Tuipui Assembly Constituency-ah Polling Station 29 a awm a ni.

Election to Lok Sabha 2024 atan Conduct of Election Rules, 1961-in a phal angin Senior Citizen (AVSC) - kum 85 leh a chunglam, Person with Disability (AVPD) - Social Welfare Department-in 40% benchmark disability certificate a pekte, Covid 19 suspect or affected (AVCO) leh Person employed in essential services (AVES) - Election Commission-in essential service a puante'n postal ballot/home voting hmanga vote thlak an dil thei a. Hriattirna hi chhuah tawh niin, dilna hi Form 12D hmanga thehluh tur niin March ni 23, 2024 aia tlai lovah District Election Office-ah thehluh hman tur a ni.

Champhai District Police bakah State Police hmun dang atangin an lo thleng tawh a. CAPF engemawzat an awm mek a, heng bakah hian Lok Sabha Election atan India ram hmun hrang hranga duty tur siam a ni a, CAPF pawh hi lo thlen belh leh tura beisei a ni. Election-a candidate-te sum hman dan ngun taka vil turin Assistant Expenditure Observers, Flying Squads (FS), Static Surveillance Teams (SST), Video Surveillance Teams (VST), Video Viewing Teams (VVT), Accounting Teams(AT), Media Certification & Monitoring Committee (MCMC), District Expenditure Monitoring Committee (DEMC) te dah an ni a. Heng bakah hian Enforcement Agencies hrang hrang State Police, State Excise, State Tax, Incometax, Custom, EF&CC, SIB, Assam Rifles etc. te chuan inthlan puan a nih atangin hna an thawk tan nghal a ni.

Expenditure Monitoring Team hrang hrangte, Sector Officer leh Political party-te training pek tawh an ni a. Inthlan duty tur Polling Official-te tan training vawi 3, April thla chawlhkar vawi khatna, vawi hnihna leh vawi thumnaahte neih tum a ni a. Naktuk March ni 21, 2024 hian BLO te tan training buatsaih a ni ang. SVEEP hnuaiah sensitization programme Govt. Champhai College leh Govt. GM HSS ahte neih a ni a. SVEEP Campaign hmangin District Icon-te'n an social media accounts kaltlangin voter awareness an nei thin a. NVD pualin Painting leh Essay Writing Competition High School leh Higher Secondary School tan buatsaih a ni. Bank hrang hrangte'n voter education leh voter registration an kalpui mek bawk a ni.

Tun inthlanpuiah hian ECIL siam M3 model EVM/VVPAT hman a ni dawn a. First Level Checking (FLC) tihfel tawh 138 Ballot Unit (BU), 151 Control Unit (CU) leh 145 Voter Verifiable Paper Audit Trail (VVPAT) kan nei tawh a, hengte hi venhimna khauh tak hnuaiah Strong Room-ah dah an ni. March ni 16, 2024 a inthlan puan a nih atangin Model Code of Conduct hman nghal a ni a. MCC bawhchhiatna chu khawng takin umzui a ni dawn a ni.

He hunah hian DEO Champhai hi Pu Vineet Kumar, SP; Pu K. Zorammuana, Dy. DEO; Pu Lalrinawma, Nodal Officer, EMM; Pu Lalmalsawma Hnamte, Addl. SP, Pu Benjamin Zalawma Ralte, EO leh Nodal Officer dangte'n an tawiawm a ni.