No.2560/2021-2022
Aizawl the 11th October 2021: Vawiin chawhnu khan DC Conference Hall, Kolasibah Dr.H.Lalthlangliana, District Election Officer kaihhruainain Mizoram People’s Forum, Kolasib District hruaitute leh 4-Tuirial (ST) AC Bye-Election neih tur a Political Party hrang hrang atanga Candidate leh an Agent-te bakah Sectoral Magistrate-a ruatten Model Code of Conduct leh hri lak a him inthlanna thianghlim leh felfai kalpui dan tur chungchangah thutkhawmna an nei.

General Observer Mohammed Ali Shihab, IAS chuan Mizoram chu State ralmuang tih a hriat a nih angin inthlanna pawh boruak ralmuang tak hnuai a kalpui a nih ngei a beisei thu sawiin inthlan kaihhnawih a Sawrkara thawktute leh NGO hrang hrangte, inthlanna felfai a awm theih nana an thawhhona chu lawmawm a tih thu a sawi a. Inthlanna nei tura inbuatsaihna kawngah harsatna leh hriatchian duh a awm a nih chuan amah leh Observer dangte chu biak tur a an awm reng thu a sawi bawk a ni.

Rev. H.Zathuama, President, MPF, Kolasib district chuan inthlanna thianghlim leh felfai tak a awm theih nan inkaihhruaina dan dinglai awm chu inkhap ngai lova Political party tin ten zawm theuh tum se a duh thu a sawi a, inhektawnna ni lovin thawhhona tha a awm theih nan MPF chu tangkai tak a hmang turin kalkhawmte a chah a ni.

Hun kaihruaitu Dr.H.Lalthlangliana, DEO chuan Kolasib district-a hri kai zatin tlak hniam lam a pan zel thu sawiin inbuatsaihna tha leh thawhhona tha a awm chuan inthlan boruak karah pawh hri kai zat hian kiam lam a pan zel theih thu a sawi a, chumi tur chuan Model Code of Conduct bakah hri leng lakah mipui kan him tlanna tur SOP chu ngaih pawimawh theuh a tul thu a sawi bawk a ni.

Pu Lalmuan Puia, Nodal Officer for MCC chuan Sector Magistrate-te mawhphurna hrang hrang leh Model Code of Conduct chungchanga Political Party Candidate-te zawm tur pawimawh tarlanna hun a hmang bawk a ni.