No.2095/2021-2022  
Aizawl 2nd September 2021: Vawiin khan MYC IAS Full Sponsorship Candidates, 2021 ten prelims coaching class an kal zawh denchhenin infuihtharna leh an kal zelna tura duhsakna hlanna hun Planning & Programme Implementation Department (RDB) Conference Hall-ah neih a ni a. He hunah hian Deputy Chief Minister Pu Tawnluia chu khuallian a ni a, MYC Chairman Dr. Vanlaltanpuia chuan kalkawmte lo lawmin khuallian hi a lo dawngsawng a ni.

Deputy Chief Minister Pu Tawnluia chuan thu sawiin Pathian in Covid-19 hrileng karah hun tha leh taksa hriselna a pek avangin lawmthu a sawi a. Deputy Chief Minister chuan India ram puma inelna sang ber UPSC Exam chu hun rei tak chhung Mizo te zingah paltlang an awm lo chu inchochhuah a ngai tiin, Chief Minister zahawmtak Pu Zoramthanga hnenah thlen a ni a, aniin a lo phurpui a, tih hlawhtlin a nih chu lawmawm a tih thu a tarlang a. Thalai ten-a sang zawng leh hmasawn zawnga zirna lama ke an pen theihna tura ngaihtuahna leh hun tam tak sengtu MYC Chairman Dr. Vanlaltanpuia hnenah lawmthu a sawi bawk a ni. Khuallian chuan UPSC Exam bei tura thlanchhuah mi 20 te chu midangte tana sul sutu an nih a pawimawh hle a, taimakna leh tumruhna nena exam hma chhawn turin duhsakna a hlan a. Mizoram tana rawngbawltu nihna kawng pawimawh tak a ni a, ram tuihalna hria a beidawng hauh lova exam zel turin a fuih a ni. Deputy Chief Minister chuan sawrkar chuan a theihtawp a chhuahsakna chu pawm thiam a, ram tan, hnam tan a ni tih hria a, finna leh thiamna ti pung zel turin leh beidawnna chu hmelma a ni tih rilru a pu reng turin a fuih a, an kalzelna turah duhsakna a hlan bawk a ni. Pu Tawnluia chuan sawrkar in thalaite chawikanna kawngah theihtawp a chhuah tur thu leh central service-a thalai te an luh tam theihna tura tun aia lian leh zau zawka sponsorship program pawh hi kalpui tum a nih thu a sawi bawk a ni.

Chief Secretary Pu Lalnunmawia Chuaungo pawhin fuihna thu sawiin, theihtawp chhuahnaah hlawhtlinna a awm a, vawikhat exama UPSC paltlang chu tlemte an ni tih sawiin, hlawhtlin hma chu bei zel turin a fuih bakah lehkha zir dan kalhmang tha leh smart study pawimawhna te a sawi bawk a ni.

He hunah hian Central YMA President leh MSU President ten thuchah tawi an sawi bawk a, he mi hnu hian zawhna leh chhanna (interactions) hun hman a ni.

MYC IAS Full Sponsorship Candidates te hi mi 20 an ni a, ALS Coaching Centre, Delhi-ah mi 10 admit an ni a, Chanakya IAS Coaching Centre, Delhi-ah admit an ni a. February thla khan Delhi-ah class offline a kal tanin, Covid-19 avangin April thla lai hawl atangin online a kalpui an ni a. August ni 30, 2021 khan video session te zawh fel a ni. ALS Coaching Centre leh Chanakya IAS Coaching Centre, Delhi te hian Online Test vawi enge maw zat an buatsaih sak bawk a ni. MYC IAS Full Sponsorship Programme a kal te hi engkim sum sen-awmna, hawna kalna, ei leh in man sawrkarin a tumsak vek a, a vaia sum sen zat hi cheng nuai 50 a ni.a