No.6991/2020-2021
Vawiin khan Deputy Chief Minister Pu Tawnluia hovin National Mathematics Day 2020 chu Aijal Club-ah hman a ni a. Human Resources Development Board Vice Chairman Pu L.Thangmawia leh Planning Secretary Dr.C.Vanlalramsanga te chu khual zahawm an ni.
Deputy Chief Minister Pu Tawnluia chuan India ram hmun dangte rualin Mizoram Science, Technology & Innovation Council (MISTIC), Directorate of Science & Technology leh Mizoram Mathematics Society (MMS) tangkawp hmalaknaa National Mathematics Day lawmna leh hemi kaihhnawih programme hrang hrang online-a tunlai hripui lêng mila neih a ni chu lawmawm a ti a. Mathematics leh science pawimawhzia sawiin tunlai khawvel hmasawnna kawng hrang hrang - Agriculture, ram venhimna (defence), hriselna lam kawnga hmasawnna, inbiakpawhna (communication), zirna lam thlengin science leh mathematics-ah a innghat a ni, a ti a. Mizoramah pawh he subject pawimawhna leh kan nitin nuna a tangkai zia hriaa kan uar thar a tul hle a ni, Deputy Chief Minister chuan a ti.
Pu Tawnluia chuan khâwl leh tualchher thil siam lama mithiam te (grassroot innovators) thiamna chhawpchhuaha a awm leh MISTIC hmalaknaa Indigenous Grassroot Technology & Innovation Competition (IGTI 2020) buatsaih chungchang sawiin lawmman dawngtute duhsakna a hlan a. Mahni kutkawiha eizawnna nei te, mahni irawm atanga ei leh bar zawnna tur siam leh din hi hmasawnna atan thil tangkai tak a ni a, hetiang lama hma latute hi sawrkarin a ngaihthah hauh lo ang tiin a fuih a ni.
Pu L.Thangmawia chuan mathematics leh science-a sulhnu ropui tak hnutchhiahtu mithiam hmasa te ngaihsanawm a tih thu leh thangtharte tan chona nasa tak an pe nia a hriat thu a sawi a. Maths hian naupangten ngaihtuahna fing taka an hman thiam theih nan training a neih tir a, thutlukna siam thiam ni thei turin a pui a, mi nawlpuiin subject har anga an ngaih ni mahse a pawimawh em avangin uar thar tul a tih thu a sawi a ni.
Pu C.Vanlalramsanga chuan tunlai thiamna leh hmasawnna hrang hrang, computer lam a ni emaw, science & technology lam a ni emaw, a bulthum leh a innghahna chu Mathematics a ni tiin he subject pawimawhzia hi a sawi bawk.
National Mathematics Day hi India Sawrkar laipuiin February ni 26, kum 2012 khan Mathematics lama India mihrâng Srinivasa Ramanujan-a piancham denchhenin a puang a, December ni 22, 2012 khan National Mathematics Day hi lawm tan niin, kum 2012 kha National Mathematics Year-a puan a ni. National Mathematics Day-ah hian Mathematics subject pawimawhna leh kan nitin nuna a tangkaina te mipui te hrilh hriat thin a ni. Mathematics Day pual hian Panel discussion leh Popular lecture on Mathematics te buatsaih a ni bawk a, hengte hi Local TV leh YouTube channel (mistic mizoram) lamah en theihin pek chhuah a ni.
Vawiin programme-ah hian Mizorama Innovators ten thil thar an siam chhuah hmanga intihsiakna Indigenous Grassroot Technology & Innovation Competition (IGTI) 2020, October leh November thla chhunga neih result puan leh lawmman semna hun hman a ni a. He intihsiakna hi category pahnih – A taka hman theih (Working model) leh ngaihtuahna din chhuah (Idea) te a then a ni.
Working model-a lawmman dawngtute chu:
Pakhatna:- Kuhva thelna khawl - Lalthafela, Kawnpui.
Pahnihna:- Kuhva kawrpui thelna – Lalbiakzuala Ralte, Ramhlun South
Pathumna:- Bamboo disposable fork machine – Ramdinmawia Haulawng, Lunglei District
Idea category-a lawmman dawngtute chu:-
Pakhatna:- Semi Automatic Round Stick Machine - Lalbiakzuala Ralte, Ramhlun South
Pahnihna:- Substrate pasteurization –Henry Saingura, Serchhip
Pathumna:-Balu silfaina khawl – Lalramsanga, Tanhril
National Mathematics Day 2020 lawmnaah hian Mizo zinga Mathematics subject a PhD degree nei hmasa ber Dr.L.N.Tluanga chawimawina hun hman a ni bawk.
