3110/2022-2023

Aizawl 20th December 2022: Vawiin khan Deputy Chief Minister Pu Tawnluia chuan BN College of Nursing 1st Lamp Lighting Ceremony chu Dawrpui Multipurpose Hall-ah hmanpuiin, khuallian a ni.

Khuallian Pu Tawnluia chuan thu sawiin vawiina Lamp Lighting a tel zawng zawng mi 55 te lawmpuina leh duhsakna a hlan a, Pi K.Thansiami, Nurse Superintendent Rtd. chu tun thlenga Lamp Lighter-a tanga, chakna a neih avangin a lawmpui thu a sawi a. Thiamna bik neia, midangte damna thlentu nurse zirlai leh zirchhuak te chu rawngbawltu ropui tak an ni a ti a. Sawrkar chuan thiamna, zirna institution chi hrang hrang sawrkar hian mipuite tan siam mahse, sawrkar ringawt hian a ti vek seng lo a, ram changkang zawk te angin private players ten institution an din hi sawrkar chuan a thlawp a ni, a ti a. Dan zawm tur hrang hrang erawh awmin, chung dan zawm chu an tih makmawh a ni, a ti a. Nursing zir hi thil namai lo niin, inpekna thuk tak, midangte tana nun inhuamna nei chunga zir leh thawh ngai a ni a ti a. Mihring damna leh hriselna pawimawhzia kan hre chho zel a, chung hriselna nei tur chuan nurse service hrang hrang nasa takin naute pianghlim kan nih lai atangin kan mamawh a, chung ti thei tura, nursing zirna Mizoram in a nei hi lawmawm a tiin, zirlaite an kal zelna turah duhsakna a hlan a ni. Khuallian hian BN College Magazine a tlangzarh nghal bawk a ni.

BN College of Nursing hi BN Foundation Society hnuaia din niin Mizoram sawrkar Health & Family Welfare Department chuan Nursing College din phalna a pek hnuah Ni 1 December 2020 khan BN College of Nursing chu din a lo ni ta a ni. College Building hi Hualngohmun-ah sak mek niin, a then luah a ni tawh a. June Ni 1 2022 atangin Hualngohmun-a College Building-ah insawn niin, BN Hospital Extension Clinical Classroom-ah te class lak tan a ni a. College Motto hi, “Caring Seed With Mankind," tih a ni.

BN College of Nursing hi Mizoram Nursing Council phalna a din niin, MNC Inspection hi tum thum lai Ni 11 December 2020, Ni 20 August 2021 leh Ni 13 April 2022 ah te neih a lo ni tawh a. Indian Nursing Council Inspection a hmachhawn mek bawk a ni.

Mizoram University hnuaiah Provisional Affiliation leh College hawn phalna ni 15 March 2021 khan an hmu a ni. B.Sc (Nursing) hi kum 4 zir a ni a, kumin hi Lamp Lighting Ceremony vawikhat hmanna a ni. BN College of Nursing hian batch khatah seat 30 neiin, tunah hian 1st Semester zirlai 24 neiin, 3rd Semester zirlai 28 leh 3rd Year zirlai 27, an vaiin zirlai 79 an nei mek bawk a ni. An curriculum hi Indian Nursing Council siam niin, Mizoram University hnuaia zir a ni a, INC hian zirlai ten Practical leh Theory experience an neih zat tur a bituk vek bawk a ni.