439/2023-2024

Aizawl the 13th May 2023: Vawiin khan Deputy Chief Minister leh UD & PA Minister ni bawk Pu Tawnluia chuan khuallian niin Durtlang community hall-ah Aizawl Smart City Project hnuaia sak tur Durtlang Playground  lungphum a phum a, AMC Mayor, Pu Lalrinenga Sailo chu khualzahawm a ni.

Deputy Chief Minister Pu Tawnluia chuan Smart City hnuaia playground changtlung leh tha tak tur lungphum phum a ni chu lawmawm a ti hle a. Playground tha tak neih a nghakhlel hle tih sawiin chumi kawngah sawrkar chang nilo Durtlang mipui leh khawtlang hruaitute an tanrual thu a sawi. Pu Tawnluia chuan Durtlang playground tur chu a hmunhma in a zo a,a rem em em bawk a ni tiin Mizo thalai leh infiam mite tan chhenfakawm tak tur, ramchhung leh khawvel huap-ah pawh Mizote hming chherchhuaktu a nih ngei a beisei thu sawiin tangkai taka hmang turin a fuih bawk. Veng mipuite pawh fuihin neitu thinlung pu a; a enkawlna kawngah theihtawp chhuah fo turin a chah a, Durtlang playground chu Zoram mipuite huapzo, veng hran leh khaw dang tha taka lo dawngsawngtu ni thei tura enkawl turin kalkhawmte a chah a ni.

Khualzahawm Pu lalrinenga Sailo pawhin thu sawiin playground lungphum phum a ni ta chu mellung pawimawh tak a ni a ti a; sawrkar leh a bikin UD & PA Department changtu Minister Pu Tawnluia hmalakna chu ropui a tih thu a sawi. Dứrtlang playground chuan eizawnna kawng hrang hrang a hawng dawn a ni tiin vengchhung mipuite tan a lawmawm tak zet a ni a ti.

Tangkai taka mipuiten an hman theih nan leh thalai ten hlawhtlinna atana an hman chu a duhthusam a nih thu a sawi bawk.

Vawiin lungphum phumna-ah hian Pu Lalmalsawma Pachuau, Secretary UD & PA chuan lawmna thu a sawi a, Rev. Malsawmdawngliana’n hunserh a hmang. Aizawl Smart City Project CEO Pu C.C Lalchhuangkima’n technical report pein Durtlang Local Council Chairman Pu RC Lalrinliana chuan lawmthu sawiin hun a khar a ni.

Durtlang playground tur hi Aizawl Smart City Limited hnuaia sak a ni a, play area tur chu 110 m X 68 m niin Astro turf phah a ni ang. A Project cost tura ruahhman chu cheng vaibelchhia 17.87 a ni.