574/2023-2024

Aizawl The 25th May 2023: Vawiin khan Government Zemabawk Primary School-I chuan an kum-100 tlin lawmna (Centenary celebration) chu Judo Hall, Tlang veng, Zemabawk North-ah an nei a, Deputy Chief Minister Pu Tawnluia chuan khuallian ni a hmanpuiin souvenir a tlangzarh nghal.

Pu Tawnluia chuan Govt. Zemabawk Primary School-I ten kum-100 an tling thei chu a ropuiin a lawmawm takzet a ni a ti a, zirtirtu lo thawk tawh leh thawk mekte, khawtlang mipui thawhrimna leh inpekna zar a ni tiin an kal zelna turah duhsakna a hlan nghal a ni. School din tirh atanga bultantu, sulsutute chu fakin an thawhrim rah chu school leh khawtlang in an seng mek a ni a ti a, school changtlung tak, zirlai naupang tam tak tana zirna run tha leh mihring puitlinga chherchhuaktu a nih theih nan khawtlang hruaitute tawiawmna a ngen nghal bawk a ni.

Khuallian chuan a bikin primary school chu mihring nun chherchhuahna a bultumtu ber, a bulthut leh a lungphum a ni tiin a pawimawh hle a ti a. Bultan that chu zo tluk a nih angin zirlaite thanlen zelna turah zirtirtute an pawimawh hle a, an mawhphurhna sang tak chu hria a dawhthei taka naupangte kawng kawhhmuhtu leh tuamhlawmtu ni zel turin zirtirtute a fuih a ni.

Deputy Chief Minister chuan zirlai naupangte chu taima taka zir chhunzawm zel turin a chah a, nakin lawka ram hruaitu turte an ni tiin mi hmantlak ni ngei turin tumruhna leh hmasawn duh zawng a rilru pu fo turin a chah a ni. Minister chuan Govt. Zemabawk Primary School-I te chu an kum 100 tlin lawmpuinan pawisa fai cheng 20000 a hlan bawk.

Govt. Zemabawk Primary School-I centenary lawmna inkhawm-ah hian AMC Ward-7 Councillor Pu Vanlalneia pawhin thusawina a nei a, kum-100 an tling thei chu a lawmpui hle thu sawiin an kal zelna turah duhsakna a hlan nghal a ni.

Vawiin programme hi Govt. Zemabawk Primary School-I Headmaster Pu David Vanlalhruaizela Pachuau, Centenary Celebration Committee–a Chairman ni bawk chuan a kaihruai a, Rev. C Sangliana’n hunserh hmangin Centenary Celebration Committee Secretary Pu C Lalrinnunga chuan report a pe a ni. He hunah hian school din tirh atanga zirtirtu lo thawk tawhte chawimawina hun neih a ni bawk. Vawiin kum-100 tlin lawmna inkhawm-ah hian Zemabawk Local Council aiawh bakah NGO hrang hrangte leh Mizoram Primary Teachers Association (MPTA), Zemabawk Teachers Association (ZTA) aiawhte an tel a ni.

Government Zemabawk Primary School-I hi a tirah chuan Zemabawk Primary School tih a ni a, kum 1969 a Primary School-II a lo din tak hnu chuan Govt. Zemabawk Primary School-I tih a ni ta a ni. Govt. Zemabawk Primary School-I-ah hian a din tirh atanga vawiin thleng hian zirtirtu (officiating tel lovin) 54 an lo thawk tawh a. Kumin 2023-2024 session-a zirlai naupang awm zat chu 168 an ni.