3960/2022-2023
Aizawl the 23rd March 2023: Vawiin khan Hlimen YMA Hall-ah Hlimen playground; Aizawl Smart City hnuaia cheng vaibelchhia 6.81 a sak tur chu Deputy Chief Minister Pu Tawnluia’n lungphum a phum.

He hunah hian Deputy Chief Minister Pu Tawnluia, UD & PA Minister ni bawk chuan playground changtlung leh chhenfakawm tak tur lungphum phum a ni ta chu lawmawm a tih thu a sawi a; playground siamna kawngah harsatna hrang hrang leh hmunhma rual remlo kara playground neih theih a ni dawn ta leh International standard tehna a field te thei ang ber tal siam thei a ni dawn ta chu lawmawm a tih thu a sawi. Deputy Chief Minister chuan playground chu nghahhlelhawm a tih thu sawiin; Hlimen khawtlang mipuite leh a bikin thalai infiammite tan a phurawm lehzual a, Hlimen mipuite bakah veng hran leh khaw dangte huapzo field niin, Mizoram ah mai nilo, National leh International level-a Mizote hming chhertu leh khaichhuaktu a nih ngei theih nan a hmang theuh turin kalkhawmte a chah a ni.

Deputy Chief Minister Pu Tawnluia chuan Smart City Project hnuaiah Mizoramah project hrang hrang 40 chuang an siam tih tarlangin. chung zingah 30 chu hmalak tawh leh hmalak mek a nih thu a sawi a; a bak 10 te pawh hmalak theih tura chhawpchhuah mek ni tawhin; a puitlin hunah Mizoram hmel a tih danglam ngei a rin thu a sawi bawk. Sawrkar in theihtawp chhuahin hma a la mek a, Project Management Consultants (PMC) ten uluk takin an vil reng a, hmanhmawhin nghahhlelhawm hle mahse kalphung leh standard nei a nih avangin duh angin hna a chak thei lo chu mipuite hriatthiamna a ngen nghal bawk a ni. Minister chuan Hlimen playground chu khawtlang mipui leh thangtharte tana tangkai tak a hman a nih theih nan duhsakna a hlan nghal bawk.

Vawiin a lungphum phumna programme-ah hian Bialtu MLA Professor F. Lalnunmawia pawhin thu sawiin; Hlimen leh a chhehvel in a an awh em em playground lungphum an phum thei chu lawmawm tiin a phurawm takzet a ni, a ti a. Hlimen tana bungthar a ni tiin kalkhawm mipuite chu a enkawlna kawngah lungrual a, thangthar lo awm zel turte tana rotling a nih theihna tura enkawl zui zel turin kalkhawmte a chah bawk a ni.

Vawiin programme-ah hian Pu Lalrosiama, Executive Engineer (Civil), Aizawl Smart City Limited in lawmna thu a sawi a; Pu Lalrothanga, Chief Executive Engineer, Aizawl Smart City Limited in technical report pein, Pu Lalhmuchhuaka, Vice President, Hockey, Mizoram pawhin thu sawiin hun tihtawp a ni.

Hlimen playground tur hi Aizawl Smart City Limited hnuaia sak a ni a, play area tur chu 90 m X 45 m niin Astro turf phah a ni ang. A Project cost tura ruahhman chu Rs. Vaibelchhia 6.81 a ni.