No.2959/2020-2020

Vawiin 10.7.2020 chawhma dar 11:00 AM khan Deputy Chief Minister Pu Tawnluia chu Administrative Training Institute Auditorium-ah Mizoram Civil Service Foundation Training hun kharna Valediction Programme-ah Khuallian niin, hun a hmanpui.

Khuallian Pu Tawnluia chuan Mizoram neitu thinlung pu chunga hna thawh a tul thu sawiin, MCS officer te chu an theihtawp chhuaha mipui tana rawngbawl tura lak an nih angin an hnathawhna kawng tin rengah theihtawp chhuah turin a chah a. Mi lian leh mi te ang khat vek a dawr a, mi te berte tan pawh biak nuam leh hawihhawm taka thawhpui thiam mi ni turin a chah a ni.

MCS Officer-te chu neitu thinlung pu chunga ram hmasawnna hna thawk turin a chah a. Sorkar hnathawh phungah, insawn changte a awm thin a, chungah chuan Sorkarin a dahna apianga awm zel tura rilru siam a pawimawh thu Deputy Chief Minister chuan a sawi a. Sorkar hnathawk officer leh officer lo zingah, mi thenkhat awm duhna bik nei tlatte, khawpui chhuahsan tumlo awm angte an awm thin hian rorel an tiharsa a, mipui tan harsatna siam bawkin, staff emaw officer pakhat awm loh avanga sorkar hna kal thei lo anga ngaihna awm thinte chu sorkar hnathawh phungah thil tih dan tur a nih loh thu a sawi a ni.

Deputy Chief Minister chuan a sawi zelnaah, Mizoram Sorkar-in flagship programme SEDP kalpui turin ruahmanna a siam chu COVID-19 hrileng avangin thil tam tak a tih theih rih loh thu te, Sorkar-in hrileng laka mipui him damna a ngaih pawimawh avangin chumi lamah chuan Sorkar pawhin tha leh zung, sum leh pai pawh a thlurbing rih thu a sawi a ni. SEDP chu Sorkar flagship programme a nih avangin Sorkar hnathawkte pawhin mipui tana hlawk taka hna an thawh theih nan SEDP hnuaia ruahmanna hrang hrangte chu an bel a pawimawh thu a sawi bawk.

Vawiina MCS Foundation Training Valediction Programme hi Pu Lalmuansanga Ralte, Joint Director, ATI-in a kaihruai a, Pu Kesavan R, Director, ATI-in welcome address a sawi a, Pi Angela Zothanpuiin, Director, LR&S-in Training kalpui dan a sawi bakah MCS Officer training aiawhin Pu H. Lalramenga, SDC, Khawzawl-in thu a sawi bawk a ni.

MCS Foundation Training hmang zo chiahte hi MCS 2019 batch an ni a, Training Regulations-in a sawi angin thla 12 chhung training neiin, 8th July, 2019 khan tanin 10th July, 2020 hian training kharna hun hman a ni.