958/2022-2023
Aizawl, 20th June,2022: Deputy Chief Minister Pu Tawnluia'n vawiin khan 23 Sector Assam Rifles ten an buatsaih Ruihhlo Dona atana campaign ‘Anti Drugs Awareness Campaign’ chu Loch Hall, Assam Rifles hmunpui Lammual-ah a khar.

Campaign kharna-ah hian Deputy Chief Minister Pu Tawnluia chuan thu sawiin ruihhlo dona kawnga thawktute zawng zawng chungah lawmthu sawiin, ram hmel tibawlhhlawh thei leh mihring nunphung tibuai thei ruihhlo chu mitinin kan do a tul a ni, a ti a. Sawrkar, Kohhran leh NGO hrang hrang te bakah Assam Rifles ten thahnemngai taka ruihhlo dona kawnga hma an lakna chu ropui a tih thu sawiin, dan loa ruihhlo zuar leh ruihhlo ngai ten an sim theih nana thawk hoa, in tanpui tlang a, Zoram nuam siam turin kalkhawmte a sawm a. Deputy Chief Minister chuan ruihhlo dona kawngah Sawrkar, Kohhran leh pawl hrang hrang bakah Assam Rifles ten an hma zawn theuh a ruihhlo do nan a nasa taka hma an la chu tuna aia nasa leh zawka kan kalpui a ngai a ni, a ti a. 23 Sector Assam Rifles te an kal zelna turah duhsakna a hlan bawk a ni.

Pu Tawnluia chuan Lunglei Bikers' Association leh Mizo Students' Union te hnenah Anti-Drugs Awareness Campaign puala Lunglei atanga Aizawl thleng bike rally an neih avangin citation a hlan a. Ruihhlo ngaite tanpui kawnga thahnemngai taka thawktu Dr RL Sanghluna, Synod Hospital; Pi Zothanpuii, Director Agape Centre; leh Pu Lalduhawma Chawngthu, President MDUF te hnenah citation a hlan bawk a ni. Anni bakah hian Anti-Drug Awareness Campaign denchhena painting competition-a tel school naupang te hnenah lawmpuina a hlan nghal bawk a ni.

Anti-Drugs Awareness Campaign hi June ni 7 khan hawnna neih a ni a, kar hnih chhung a awh a ni. Anti-Drugs Awareness Campaign hi chhawng thumin buatsaih a ni a, thalai te tintuah (focus) a ni. Vawiin kharna programme-ah hian school hrang hrang zirlai naupang engemawzat bakah tlawmngai pawl hrang hrang aiawhte an tel a. Awareness campaign chhawngkhatnaah Ruihhlo Do thupui-ah hmangin school naupangte lem inziahsiak buatsaih a ni a. Chhawng hnihnaah awareness campaign te, ruihhlo ti thin sim tawh te nen inkawmna te, panel discussion leh a dangte buatsaih a ni a. Chhawng thumnaah Lunglei atangin Aizawl thleng bike rally buatsaih a ni bawk a ni.