1289/2022-2023

Aizawl, the 19th July 2022 : Deputy Chief Minister Pu Tawnluia’n vawiin khan Lammualah LBS Suzuki All Mizoram Inter Village Football Tournament, Final Match kharna programme tawite chu hmanpuiin, Final Match – Champhai Kanan VC leh Sialhawk VC team inkhel a chhim zui nghal a ni.

Deputy Chief Minister Pu Tawnluia chuan Mizoram Sawrkarin thalaite tan infiamna hmun hma hrang hrang buatsaih kawngah theihtawp a chhuah mek thusawiin covid hripui leng avang erawh duhthusam angin hma a lak theih lova, chuti chungin Chief Minister kaihhruaina hnuaia Sports & Youth Services kaltlangin a theih ang angin hma lak chhoh mek a ni, a ti. Aizawl khawpuia football khelhna tur field puitling 2 chauh kan neiin min dawl tawh lo tiin UD & PA Department hnuaia Smart City Project katlangin Aizawl khawpui chhunga khelmual 6 ah phullem phahna tur tender mek a nih thu a tarlang a. Hetianga Tournament lian neih leh hunah chuan Lengpui leh Sairang ah te inkhel ngai tawh lovin Aizawl khawpui ah ngei a rualin hmun 6/7 lai ah a ruala inkhelh theih a beisei tiin a sawi bawk.

Pu Tawnluia chuan Lammual chu Mizo mipui rilruah a lianin kan ngaihlu hle tiin Lammual hi I League Match inkhelh theihna turin chei leh ruahman chu Sawrkarin a tum thu a sawi. LBS Suzuki All Mizoram Inter Village Tournament chu inelna satliah a ni lova, Mizoram thalai ten hma lam an panna tur a ni a, Mizoram mai ni lo Mizoram pawna Football Club te pawhin player tha te thulchhuakin an Club zawm tura an ziahluh mek nia a hriat thu chu he Tournament hlawhtlinna lian tak a ni, a ti. LBS Suzuki sponsor-in MFA in he Tournament hlawhtling taka an buatsaih chu lawmawm a tih thu a sawi bawk a ni.

Final Match hi Assembly Speaker Pu Lalrinliana Sailo; Sports Minister Pu Robert Rommawia Royte, E, F & CC Minister Pu TJ Lalnuntluanga bakah MLA thenkhatte te pawhin a hmunah inkhel hi an en a ni.  

Final Match-ah hian Champhai Kanan VC Team chuan Sialhawk VC Team 2-0 a hnehin an champion a ni.