496/2022-2023
Aizawl the 13th May, 2022 : Vawiin khan Deputy Chief Minister Pu Tawnluia'n Aizawl West Joint YMA Multipurpose Sports Complex a hawng. He hunah hian Deputy Chief Minister Pu Tawnluia chu khuallian a ni a, Sports Minister Pu Robert Romawia Royte chu khual zahawm a ni a, Information and Public Relations Minister leh Senior Adviser, Aizawl West Joint YMA nibawk Pu Lalruatkima chuan khualte hi a lo thleng a ni.

Khuallian Pu Tawnluia chuan thu sawiin Aizawl West Joint YMA in khuallian ni tura an sawm avangin lawmthu a sawi a, Aizawl West Joint YMA Multipurpose Sports Complex Building sual chhuahna kawngah lawmpuina chibai a buk bawk a ni. Aizawl West Joint YMA huam chhunga chengte tana chhenfakawm, Aizawl West Joint YMA chu ding reng se a tih thu leh thalaite tana hmasawnna ngaihtuah zel bawk turin a chah a. Sawrkar hmasa in hnuhma chhunzawm tlak tak a hnutchhiah chu fakawm a ti bawk a ni. Khuallian chuan he Sports Complex Building tih changtlun nan a tul angin, hmalak belh a nih tur thu a sawi bawk a. Aizawl West area chu Aizawl panna leh luhna atana kawtchhuah pawimawh tak, highway leh railway te pawn hmasawn zelin Aizawl West chu area pawimawh tak a la ni chho zel ang, tiin a sawi a. Sawrkar chuan thalai te hma khua ngaihtuahin, Smart City Project kaltlangin Aizawl West Area-ah Music City pawh a siam mek a ni, tiin a sawi a. Hmasawnna ruhrel hrang hrang kan neihte hi uluk taka enkawl zel turin leh faina kawngah hmala zela, thianghlim taka hmasawnna ruhrel kan neih Building hrang hrangte, hnum tak leh duat taka enkawl zel turin YMA member lokal khawm te chu a chah a. Khawtlang hmasawnna tana ngaihtuahna sengtu, ram leh hnam neitu rilru pu, YMA te chungah lawmthu a sawi a ni.

Khual zahawm Pu Robert Romawia Royte chuan thu sawiin helai Joint YMA hmun remchang tha tak maia Multipurpose Sports Complex lo ding thar hi lawmawm a ti a, Chief Minister hmasa leh Sports Minister hmasa Pu Zodintluanga te chungah lawmthu a sawi a; Multipurpose Sports Complex Building puitling tak sak theih a nih hi a sa tu Lushai Engineers te chu fakawm a ti a. Anni bakah hian Sports Complex Building sak puitlin theihnana a hmawrbawktu leh ngaihtuahna sengtu, tihdanglam ngai deuh leh a tul anga hma la zel tu Bialtu MLA Pu Lalruatkima chungah Sports Minister a nihna angin lawmthu a sawi a. Aizawl West Joint YMA area chauh nilo, thalai, a tam thei ang berin tangkai taka an hman nan duhsakna Branch tin hruaitute bakah member te a hlan bawk a ni.

Khual thlengtu Pu Lalruatkima chuan thu sawiin Aizawl West Joint YMA huam chhunga Branch YMA pasarih te chungah lawmthu a sawi a. Hruaitu hmasa kal ta te; a bikin Pu C.Lalsangliana (Chawnpui), Pu Thanghuama (Dawrpui Vengthar), Pu C. Laitanga (Hunthar), Pu P.C Zoramsangliana (Kanan Veng), Pu T. Vanlalhluna (Dinthar) leh midangte hriatreng an nih thu a sawi a. He project hlawhtlinna atana tha hnem ngai taka thawktu te bakah sawmbik Aizawl West Joint YMA President lo ni tawh vawiin a lokal te chungah pawh zahna chibai a buk a ni. Khual thlengtu hian Table Tennis Table pathum Aizawl West Joint YMA hnenah a hlan nghal a bawk a ni.

Khuallian hi MLA te Pu Lalrinsanga Ralte, Pu K. Laldawngliana, AMC Deputy Mayor Pu Thanglura, AMC Councilor Pu Lalfakawma Chenkual leh Pi Chuauzikpuii ten an tawiawm bawk a ni.

Aizawl West Joint YMA President Pu Vanlalzuiliana'n he hun hi a kaihruai a. He hunah hian MSSC Secretary Pu John Tanpuia hnen atangin technical report ngaihthlak a ni a. Aizawl West Joint YMA Sr. Vice President Pu B. Lalruma Sailo chuan lawmthu sawiin he hun hi a khar a ni.

Aizawl West Joint YMA Field nen a in chaw be tur Multipurpose Complex sak ni se tih chu Kum 2014 khan rel a ni a, Project Committee in a buaipui nghal a, DPR buaipui in kum 2015 khan Planning Department ah thehlut niin, NEC Project priority list ah sawrkarin a dah a, thahnem ngai takin sorkar in buaipuiin, kum 2015 December ni 1 khan inspection neih a ni a, January ni 3, kum 2017 atanga hna thawh tan niin Lushai Engineers kutah a sak hna hi a awm a. Approved fund hi Rs 959.71 lakhs a ni a, he project atana sum ruahman zawng zawng hi a vaiin NEC in a tum a. January ni 16, 2021 khan zawh fel a ni a. Main building hi chhawng nga a sak a ni a, basement 1,2,3 leh Ground floor awmin, light medium vehicle 50 vel leng parking a aqm a. First Floor/Main Hall hi 662.50 Sq m a zau niin, sports indoor hall atana ruahman a ni a, volleyball leh contact Sports lam te spectator gallery, changing room, leh stage te dah a ni bawk a. Generator 16 kilowatt dah tel a ni bawk a. Football Pavillion tha tal chhawng hnih sak a ni a, a zau zawng hi 148 Sq m niin ground floor ah hian official rest room, general store, changing room 2, toilet leh bathroom te a awm a. Mi 120 vel thut theih tura ruahman a ni a, generator 8 kilowatt dah tel a ni bawk.

Aizawl West Joint YMA hi March ni 1, Kum 1971-ah din a ni a, Founding President hi Pu RL Thianga (Chawnpui) a ni. Branch YMA pasarih Dawrpui Vengthar, Chawnpui, Vaivakawn, Dinthar, Zotlang, Hunthar, Kanan Veng intel khawm a ni a. Kum 1995 tangin Conference neih tan a ni a, 2019 khan Conference vawi 15 hman a ni. 2020 khan Covid-19 avangin Conference hi neih a nilo a ni.