No.5599/2020-2021

Vawiin khan Deputy Chief Minister Pu Tawnluia chuan Mizoram Youth Commission (MYC) Coaching Centre leh Youth Centre, MINECO-a sak tur lungphum a phum.

Khawvel thang chak takah Mizoram hian thalaite thluak a mamawh a, ramin a hman tangkai theih tura nasa taka tuai hriampui a pawimawh, Deputy Chief Minister Pu Tawnluia chuan a ti a. Thalaite hmasawnna tura hmalakna pawimawh tak chak taka kalpui mektu Mizoram Youth Commission (MYC)-in Youth Centre leh Coaching Centre sakna tur bul a tan thei ta chu lawmawm a tih thu a sawi. Sawkar chuan thalaite a ngaihvenzia ti langin a tih tur a ti a, a tihhlawhtling tura chona ropui tak hi thalaiten an chhan let a tul a ni, tih sawiin Deputy Chief Minister chuan Mizoram Coaching Centre leh Youth Centre chu thalaiten tangkai taka an hman ngei a beisei thu a sawi a ni.

Mizoram Youth Commission Chairman Dr.Vanlaltanpuia, MLA chuan thalai zawng zawng ten ‘kan office’ an tih theih tur building pahnih sa tura lungphum phum a ni ta chu lawmawm a ti a. India ram pum inelna sanga Mizo thalai tam zawk an lan theihna tura thil tangkai a nih a beisei thu a sawi. Delhi-a coaching kal turin Mizo thalai lehkhathiam beiseiawm zual thlanchhuah 20 rual vel thawn tum a nih thu te, COVID avanga ram danga hnathawk hna chan ta te tuam hlawm dan tur ruahman a nih thu te, chhung tinte hman tangkai theih tur online job portal siam mek a nih thu te bakah MYC hmalakna dangte Dr.Vanlaltanpuia chuan a sawi a ni.

He huna report petu MYC Secretary Pu Donny Lalruatsanga tarlan danin MYC Coaching Centre sak nan hian cheng vaibelchhe 3 leh Youth Center sak nan cheng vaichelchhe 5 ruahman a ni a, kum thum chhunga sak zawh hman tura duan a ni. Coaching Centre hi chhawng thuma sak tur niin Coaching Room te, computer room te, cafeteria, Conference Hall, office leh quarters te a awm dawn a. Youth Centre-ah hian career guidance/knowledge centre, gym room, guest room, indoor hall, meeting room, officer leh art & craft room te a awm dawn a ni.

MLA pahnih - Agriculture Development Board Vice Chairman Pu H.Biakzauva leh Horticulture Development Board Vice Chairman Prof. F. Lalnunmawia ten Deputy Chief Minister hi an tawiawm a. Labour, Employment, Skill Development & Entrepreneurship (LESDE) Special Secretary Dr.Lalzirmawia Chhangte chuan lawmthu sawiin Mizoram Youth Commission Coaching Centre leh Youth Centre sakna tur lungphum phumna programme tawi hi a khar a ni.