Vawiin khan Mizoram Deputy Chief Minister thar Pu Tawnluia chuan New Secretariat Complex-ah a office thar luahin amah tawiawmtute nen Pathian hnena lawmthu sawina hun an hmang. 

Pu Tawnluia chuan Mizoram sawrkar thara a lu ber dawttu Deputy Chief Minister dinhmun hial luah theia a awm leh kum sawm hnuah ama office luah thin ngei luah leh theia Pathianin a hruai chu lawmawm a tih thu a sawi a, Pathianin Zoram mipuite rawngbawl turin inthlanna hmangin a buatsaih a ni, a ti. Deputy Chief Minister chuan mawhphurhna thar an chelh rual hian ngaihtuahna thar hmang a, he hnam rawngbawl tura rilru siam thar turin mipuite a chah bawk.

Deputy Chief Minister thar Pu Tawnluia hian Public Health Engineering Department, Urban Development and Poverty Alleviation Department, Animal Husbandary and Veterinary Department leh Personnel and Administrative Reforms Department te a enkawl dawn a. Vawiinah hian heng a enkawl tur Department a officer te leh Aizawl North -III bialtu MLA Pu C.Lalmuanpuia ten an tawiawm a. UPC North East India Pastor Zohmingthanzama’n hunserh a hmang a ni.