No.6760/2020-2021

Vawiin khan Ramhlun South High School tualzawla programme buatsaihah Deputy Chief Minister Pu Tawnluia’n Multi-Utility Centre sakna tur lungphum a phum.

Deputy Chief Minister Pu Tawnluia chuan Mizoram chhunga khawpui 23 enkawl leh cheibawl hna thawk a, khawpuia cheng mi retheite dawm kan nana hma latu UD&PA Department chu department naupang ni mah se thang duang leh thawh hlawk tak a ni, a ti a. Central sawrkar atanga sum lo kal leh Mizoram sawrkar sum hmangin kawng hrang hrangin khawpui tihhmasawn nan hma an la a, vawiina  lungphum phum tak Multi Utility Centre pawh hi khawtlangina tangkai taka hman theih tur, a building sak dan tur ruahmanna pawh kawng hrang hranga hman tangkai theih turin dawng hlawk taka duan a ni, a ti.  UD&PA changtu Deputy Chief Minister chuan khawpui chung tihhmasawn nana hma lak a nih rualin vantlangin an chhawr tam theih tur chu an ngai pawimawh zual tih a sawi a. COVID-19 hri leng avanga sawrkarin harsatna a tawh avangin duh anga chakin hma lak theih ni rih lo mahse vantlang tana tul leh pawimawh atana ruahmanna siam mek puitlinna an hmu zel thei chu a lawmawm tak zet tiin ramin hma a sawn zel theih nan sawrkar tawiawm zel turin mipuite a sawm a ni.

Multi-utility Centre sakna tur hian sum Rs.3,29,31,900 dah niin kum hnih chhunga sak zawh tura ruahman a ni a. Building hian chhawng 6 a nei anga, a mamawh apiang hman theih tur utility room chhawng thum dah a ni ang a, floor khatah hall a awm ang a, floor hnihah lirthei ke pali nei 32 leh ke hnih nei 56 hun theihna tur siam a ni bawk ang.

UD&PA Secretary Dr.C.Vanlalramsanga kaihhruai programme-ah hian MLA Pu C.Lalmuanpuia, Councillor Pu Laltlanzova Khiangte bakah UD&PA official-te leh khawtlang hruaitute an tel a. UD&PA Jt.Director Pu H.V.L. Zarzoenga’n technical report a pe a, Local Chairman Pu K.Lalduhawma’n thu a sawi a, UD&PA Director Pu H.Lianzela’n lawmthu sawiin hun hnung a khar a ni.