No.2049/2021-2022
Aizawl 30th August 2021: Vawiin khan UD&PA changtu Deputy Chief Minister Pu Tawnluia chuan internet kaltlangin Serchhip Sports Stadium a hawng. Hawnna programme, Aijal Club-a neihah hian Sports Minister Pu Robert Romawia Royte, Sports Minister hlui Pu Zodintluanga, MLA bakah Sports and Tourism Board Vice Chairman Pu TC Pachhunga, Ex MLA te pawh an tel a. Serchhip District atangin DC charge la mek Pu Lalmuansanga Ralte leh mi pawimawh dangte an tel bawk a ni.

Hawnna thu sawiin Deputy Chief Minister Pu Tawnluia chuan Serchhip District mipuite, he stadium a lo din theihna tura a bulthuma thawktute, a tak taka chhawr tangkai tur infiam lama tui mite a lawmpui thu sawiin he stadium hi mipui ta a ni tih hriaa neitu thinlung pu theuh turin a chah. Khuallian chuan Serchhip District thalaiten State, National leh International thleng pawha infiamnaa hming an chher theih nan an hman tangkai a beisei tih a sawi a. Serchhip District mipuite, khawtlang leh sports lama hruaitute leh a enkawltu department ten theihtawp an chhuah hnuah a rah kan seng ta a ni, a ti.

Deputy Chief Minister chuan thalaite sports discipline hrang hranga hma an sawn theihna tura Mizoram Sawrkarin hma a lak dan thenkhat sawi langin sports policy siam te, infiammite lawmman tihpun te, sports a mi hlawhtlingte tana sawrkar hnaa reservation 5% siam sak chungchang te he hunah hian a sawi a. UD&PA department-in a kenkawh Smart City project hnuaiah khawpui chhunga khelmual engemawzat tihchangtlun te, Indoor stadium leh futsal ground siam belh te chu Sports Deparment hotute nen thutlanga ngaihtuahho a nih thu sawiin, hmachhawp pawimawh tak zingah dah tel a nih thu Pu Tawnluia chuan a sawi a ni.

He huna khual zahawm Pu Robert Romawia Royte pawhin Serchhip Sports Stadium hawn a ni ta chu Mizoram mipui, a bikin Serchhip District mipuite tan chuan ni chhinchhiahtlak leh lawmawm a ni, a ti a. UD&PA leh sports thawhhona a tha hle a, sports department tana tih theihloh thil tam tak tihsakin Mizoram thalai infiamna lama tui mite tan “change” a thleng mek a ni, a ti. Serchhip Sports Stadium hi a tira duan sa ang tidanglamin, thalaite mamawh leh awh ngawih ngawih phullem leh synthetic athletic track phah belh a ni chu a lawmawm tak zet a ni, Sports Minister chuan a ti a. Mumal leh tha taka enkawl a nih theih nan theihtawp an chhuah tur thu a sawi a ni.

Serchhip Sports Stadium sakna cheng vaibelchhe 15.25 hi sawrkar laipui atanga hmuh niin synthetic athletic track phahna senso cheng vaibelchhe 3.30 hi State Sawrkar atanga hmuh a ni a. Pavillion leh Gallery hi mi 5000 bawr vel len theihna tura siam a ni. A tir takah DPR hi Pavilion leh gallery, stadium panna kawng leh field chei that (leveling)-na turin siam a ni a. Mamawhna a nasat avangin a tira project-a thun tel loh phullem (artificial turf) telh belh a ni. Synthetic Athletic Track hi 1.22m a zauin lane 5 siam a ni a. Deputy Chief Minister Pu Tawnluia chuan a lane 6-na tur siambelh turin sawrkarin hma a la mek tih vawiin khan a sawi a ni.

Vawiin programme-ah hian UD&PA Secretary Pu K.Lalthawmmawia chu Chairman niin Pu Lalmuansanga Ralte, Addl DC Serchhipin thu a sawi a. Er C.Malsawma’n technical report a pe a. Pu H.Lianzela, Director UD&PA chuan he Stadium thar hawn tak hi Pu Lalsangliana, Sports Director hnenah a hlan a ni.