Vawiin chawhnu Dar 1 khan Deputy Chief Minister Pu Tawnluia chuan Vaivakawn Cultural Centre cum-Auditorium Building hawngin, khuallian a ni a. Rural Development Minister leh Aizawl West II Bialtu MLA ni bawk Pu Lalruatkima chu Khualzahawm a ni. Cultural Centre cum-Auditorium Building hawnna hi Art & Culture Department Director Pu Hmingthanzuala’n a kaihruai a ni.

Khuallian Pu Tawnluia chuan thu sawiin, mizo hnam zia pho chhuah theihna tur Cultural Centre leh sawrkar tan leh a bik taka Vaivakawn leh a chheh vel veng ten an hman tangkai em em tur Auditorium Building ni nghal bawk hawnnaa khuallian a ni chu lawm awm a ti a, a remchang hria veng Aizawl tlak lamah an awm chu fakawm a tih thu a sawi a. Khuallian Pu Tawnluia chuan Aizawl khawpui cheina Smart City Project nen pawha inmil tak North Eastern Council, Shillong kal tlanga, hma lo la tu zawng zawng, khawtlang leh ram hruaitute chu fak awm a tih thu a sawi a. UD & PA Department Minister a nih anga khawpui in a mamawh, Multipurpose Hall siam belh zel a ngaih pawimawh thu leh Aizawl veng thenkhatah Multipurpose Hall siam tawh a nih thu leh, Department pawhin hma a lak belh zel tih a sawi bawk a ni. Cultural Centre cum-Auditorium Building chu sawrkar programme bakah khawtual mite tan leh, a chhehvel huam chhunga chengte tana, tangkai taka hman anih theih nan duhsakna a hlan a, hei bakah hian building enkawl nan leh tul dangte ngaihtuah belh zel a nih theih nan, Business Mode mumal tak nena kalpui turin khawtlang hruaitute thurawn a pe bawk a ni.

Khualzahawm Pu Lalruatkima pawhin thu sawiin, khawtlang tana thawktu YMA leh Local Council member bakah nu leh pa kalkhawm te hnenah lawmthu a sawi a, Cultural Centre cum-Auditorium Building Kum 6 chhunga sak zo a nih chu khawtlang tan lungphum pawimawh tak a nih bakah Aizawl West Area ah chuan Vanapa Hall tluka hman tangkai a nih a rin thu a sawi bawk a ni. A neitu veng Vaivakawn tan pawh malsawmna a thlen theih a beisei thu leh khawtlangin chhiatthat a tawhah Kohhran Programme pawimawh tak te pawh hman theih a rin thu leh inthlanpui (general election) awm huna, Polling Booth siam nan pawh Building chu hmun tha tak, ke a kal theilo leh upa chaklo tan pawha kal awlsam zawk a nih avangin, a beisei thu a sawi bawk a ni. Minister Pu Lalruatkima chuan UD&PA Department kal tlangin Aizawl khawpui cheinan veng tamtakah hmalak a ni a, chung zingah chuan Vaivakawn Bazar chu sa tha tura ruahmanna siam mek a ni, a ti bawk a ni.

Vaivakawn Cultural Centre cum-Auditorium Building Technical Report hi Er. David Sapzova chuan pe in, PWD in a lawmpui nan Bible Society of India hnuaiah Patron Member Certificate a hlan nghal bawk a ni.

Vaivakawn Cultural Centre cum-Auditorium Building sak nan hian Sanction Amount hi Rs 6.19 crore a ni a, December Ni 20, 2013 khan sak tan niin; September Ni 10, 2019 khan sak zo fel a ni. Basement panga a awm a, Ground floor leh first floor bakah Gallery Floor a awm a, a vaia total area hi 2850.03 sq.m a ni. Auditorium ah hian mi 363 thut theih a ni a, gallery floor ah hian mi 92 an thu thei bawk a, sound system nen changtlung taka Auditorium stage hi siam a ni. Vaivakawn Cultural Centre cum-Auditorium Building ah hian Parking motor 14 leh two wheeler 10 dahna siam a ni bawk a ni.

Vaivakawn Cultural Centre cum-Auditorium Building hawnnaah hian AMC Councillor Pi F.Zonunsangi leh Local Council Chairman Pi Lalhliappuii te, PWD, UD & PA, Art & Culture Department aiawhte leh Central YMA OB leh CEC member te bakah, vengchhung nu leh pa, thalai te an tel a ni.