No.684/2021-2022

Dated Khawzawl, the 26th May, 2021:Deputy Chief Minister Pu Tawnluia, Tuichang Assembly Constituency bialtu MLA ni bawkin a bial chhunga Damdawiin pathum leh Village Level Task Force sawmhnihpali (24) te hnena Covid-19 hrileng dona hmanrua engemawzat a pekte chu vawiin  khan Khawzawl phurh thlen a ni a, chhun dar 12:00 khan Covid-19 hrileng dona hmanraw lo thlengte dawnsawnna leh semchhuahna programme Deputy Commissioner’s Office tualah hman niin, hemi hnu hian hmanruate hi semchhuah zui nghal a ni.

He hunah hian Pu Zothanmawia, Deputy Commissioner, Khawzawl District chuan Covid-19 hrileng dona atana mamawh tak mai hmanruate a hun taka dawn a ni thin chu lawmawm tiin, Khawzawl District mipuite ngaihtuah em em thintu bialtu MLA chungah lawmthu a sawi a. Covid-19 dona hmanruate chu Hospital leh VLTF-te kutah hman lohin a awm mai mai dawn lo a, tangkai taka hman tura Deputy CM in a rawn pek a nih ang ngeiin chhawr tangkai tum a ni, a ti.

Mipui nawlpuiin Covid-19 vanga inkhuahkhirhna dante tha taka an zawm  chu lawmawm a tih thu pawh sawiin,  Covid-19 hrilengin a hma aiin Khawzawl District pawh a hnaih lehzual tawh a, chuvangin mahni in a tawm tama thuawih zel a tul a ni, a ti bawk. VLTF-te chu an veng/khaw chhunga chhuanchham leh harsa bik an awm a nih phawt chuan thuneitute hriattir vat thin turin a chah a. Hemi hnu hian Damdawiin pathum leh VLTF aiawhte hnenah bungruate hi a hlan chhunzawm nghal a ni.

Thusawitu dang Pu C. Kera, Khawzawl Dinthar Veng chuan Deputy Chief Minister-in Covid-19 natna vanga taksa harsatna a tawh lai pawha a bial chhung mipuite a ngaihtuah em em reng thu sawiin, a bial chhungah chhuanchham an awm loh nan leh, VLTF-te tha tichak turin tunhnaiah buhfai leh pawisafaite a lo sem tawh thu a sawi a. Damdawiin leh VLTF-te tana tangkai tak tur bungrua engemawzat a pe leh ta chu lawmawm tiin, hrileng dona atana theihtawp chhuahtu Deputy CM chungah khawtlang aiawhin lawmthu a sawi a ni.

Vawiina programme hi Pu Lalrohlua, Additional Deputy Commissioner chuan a kaihruai a. Pu H Lalramenga, SDC in bungraw dawn zat report a pe a ni.

Deputy CM in hrileng dona hmanrua a pek zingah hian Tuichang Assembly Constituency huamchhunga Damdawiin pathum- District Hospital Khawzawl, Khawhai PHC leh Sialhawk PHC a hman turin PPE Full Set 110, Facemask 900, Hand Sanitizer Bottle 20, Face Shield 90, Glove Box 40 bakah Pulse Oxymeter 20, Thermometer Digital 20, Steamer 30, Bleaching Powder bag 4 leh Sodium Hypochlorite Solution gallon 14 a tel a. VLTF sawmhnihpalite hnenah Facemask engemawzat leh Hand Sanitizer litre 5 theuh pek an ni bawk. Heng bungruate hi Deputy Chief Minister aiawh ten VLTF tinte hnenah an semchhuak nghal a ni.

Vawiin programme-ah hian DC Office-a Officer leh Staff-te, khawtlang hruaitute, Tuichang Assembly Constituency chhunga Damdawiin pathum aiawhte leh Khawzawl khawchhunga VLTF aiawh theuhte an tel a ni.

Vawiin vek khan Lengteng A/C bialtu MLA Pu L.Thangmawia chuan Covid-19 hrileng do nan țul leh mamawh apianga hman turin MLA fund ațangin Rs 30,000/- (singthum) Khawzawl District Hospital hnenah a pe. Tanpuina pawisafai hi MLA aiawhin Pu C.Kera'n  Dr. Albert Lalhminghlua, Medical Officer hnenah a hlan a ni. 

Khawzawl District mipuite mamawhna hriaa Pu L.Thangmawia'n Khawzawl District Hospital tana tanpuina a pek avangin  Khawzawl District mipuite leh Damdawiina thawkte chuan lawmthu an sawi a ni.