No.515/2021-2022 

Dated Khawzawl, the 14th May, 2021: Vawiin khan Pu Tawnluia, Deputy Chief Minister-in a bial Tuichang Assembly Constituency chhunga Total Lockdown vanga hna thawk thei lo, chhuanchham mai thei dinhmuna ding chhungkaw 489 te tana buhfai a pek chu semchhuah a ni.

Tuichang Assembly Constituency huamchhunga a mamawhte hnena buhfai semna hun hi Pu Zothanmawia, Deputy Commissioner, Khawzawl Distict chuan a kaihruai a. Covid-19 hrileng laka himna tura sawrkar SOP duante zawm chungin DC Office Staff, veng/khaw hrang hranga VLTF te leh khawtlang hruaitute nen tangruala sem a ni.

Vawiin hian buhfai quintal 50 leh kg 80 sem a ni a. Hengte hi DC Office-ah phurhkhawm niin, Pik-up pathum leh LPK pakhat hmangin Khawzawl khawpui chhung leh Tuichang Assembly Constituency khaw hrang hrangahte semkual a ni a. Buhfai dawngtute hi Khawzawlah chhungkaw 264 leh khaw dang sawmpahniha chhungkaw 225 te an ni.

Deputy CM Pu Tawnluia chuan a bial chhunga khawtlang hruaitu leh mipuite tan a inhawng reng thu leh mamawh an neih phawt chuan tanpui turin engtiklai pawhin a inpeih reng thu a hrilh a. A bik takin Covid-19 hrileng karah ei leh bar mamawh ang nei lo emaw, chhuanchham mai thei dinhmuna ding an awm a nih phawt chuan inthlahrung hauh lova hriattir zel turin a ngen a, an mamawhte chu ngaihtuahpui zel an nih tur thu khawtlang hruaitute a hriattir a ni.