1539/2023-2024

Khawzawl, 16th August 2023: Khawzawl Vengthar Pastor bial enkawl Presbyterian English School chuan vawiin khan HSLC Examination 2023 a Mizoram Presbyterian English School zinga pakhatna dinhmun an hauh lawmna hun an hmang a. Deputy Chief Minister, Tuichang AC bialtu MLA Pu Tawnluia chuan khuallian niin he hun hi a hmanpui a, Khawzawl DC Pu K. Lalrohlua chuan khualzahawm niin a hmanpui bawk.

Khawzawl Electric Veng Hall-a inkhawm tawi neihah khuallian Pu Tawnluia chuan he hunah hian thu sawiin Mizorama Presbyterian English School 160 zet zinga pakhatna dinhmun an hauh chu lawmawm a tih thu a sawi a. Tun dinhmun an thlen theihna tura rim taka thawktu School Managing Board, Principal, zirtirtu leh zirlai te hnenah lawmthu sawiin; zirlai kal mek te chu vawiina hlawhtlinna chhawm nun tum turin a fuih a. Vawiina hun hman chu lawmthu sawina hun mai piah lamah zirlaite fuihtu leh titangtu, hmalam an panna kawnga vawrh sangtu leh thahnemngaihna petu ni se a duh thu a sawi bawk. Khuallian hian Bialtu MLA a nih angin bial chhung thalaite result leh performance te chu a ngaihpawimawh thin thu leh en hmasak berah a neih thin thu a tarlang a. Bial chhung school leh college te result tha tak tak bakah nimin lawka Mizoram aiawha Sikkim-a Independence Day Invitation Tournament a kal Khawzawl Vengthar FC ten champion nomawi an rawn hawn chu a lawmawm hle a ni, a ti.

Khuallian chuan zirna hi changkanna a ni tiin zirlaite chu thiamna, hriatna, finna leh hmasawnna bul chu zirna hi a ni tih hre reng turin a chah a. Zirlaite chu tawng thiam a pawimawh zia hrilhin, English hi sapho ta bik chauh ni lovin khawvel tawng tualleng a nih tawh avangin thiam a pawimawh a ni, a ti a. Hetih rual hian mahni hnam tawng zahpui leh ngaihthah erawh a that loh thu a sawi. Mizorama chenga Mizo hnama an piang chu inchhuang tur leh, ‘Mizo nationalism’ lungphum Mizo nun zemawi - tlawmngaihna leh aia upa zahna te vawng nung zel turin zirlaite hi a fuih bawk a ni.

Deputy Chief Minister hian Khawzawl Vengthar PES hlawhtlinna lawmpui nan pawisa fai cheng singthum a hlan.

Khualzahawm Khawzawl DC Pu K. Lalrohlua pawhin he hunah hian thu sawiin Khawzawl Vengthar PES hlawhtlinna chu a lawmpui thu a sawi a, vawiina an dinhmun atanga hnungtawlh lova hmasawn zel turin a chah. Zirna chu mitin intluktlang a min siam tu a ni, a ti a. Zirlaite chu Khawzawlin hma a sawn ang zela hma an sawn ve theih nan zirna ngaipawimawh turin a fuih bawk.

DC chuan kumthar lamah chuan Khawzawlin HSLC exam center pahnih a neih theih a beisei thu a sawi a. Khawzawlin hriselna kawnga hmasawnna hmel a hmuhna tur pawimawh tak - District Hospital khum 50 awmna tur chu bialtu MLA Department enkawl UD&PA kaltlangin DPR siama peihfel a nih tawh thu a tarlang bawk.

Khawzawl Vengthar Presbyterian English School hi kum 2001 khan din a ni a. Kum 2010 atangin HSLC Exam an hmachhawn tan a, kum 14 (2010-2023) chhungin zirlai 400-in exam hmachhawn tawhin, zirlai 385 in hlawhtlinna an chang tawh a ni. Tun dinhmunah zirlai 624 an awm mek a. HSLC exam mai bakah District, State leh National Level Science Congress leh Seminar, Maths & Science Olympiad bakah INSPIRE Awards ah te zirlai engemawzat in hlawhtlinna an lo chang tawh a ni.

Vawiin inkhawm hi Upa Lalthanliana, Khawzawl Vengthar PES Managing Board Chairman chuan a kaihruai a, Principal Pu K. Zothanpuia chuan inhmelhriattirna hun leh school chanchin inhrilhriatna hun a hmang a. Zirlai ten item hmuhnawm tak tak entirin, Upa C. Pazawna’n lawmthu sawina hun a hman zawhah inkhawm hi tih tawp a ni.