Vawiin chawhnu khan Deputy Chief Minister Pu Tawnluia, Urban Development & Poverty Alleviation Department Minister ni bawk chuan Multi-Purpose Community Hall, Ramthar Venga sak tur chu a hmunah lungphum a phum a, Dr Vanlaltanpuia, Chairman MYC, Pu C Lalmuanpuia, MLA, Pu PC Lalhmingthanga, Mayor AMC, sawrkar hotu leh Ramthar veng khawtlang hruaitu thahnemtak ten he hun hi an hmanpui a ni.

Deputy Chief Minister leh UP&PA Department Minister ni bawk Pu Tawnluia chuan Sawrkar hmalakna hrang hrang hlawhtling taka kalpui anih theih nan tlawmngai pawl te leh khawtlang hruaitute tawiawmna a pawimawh thu sawiin,” Multi-Purpose Community Hall, Ramthar Veng a sak tur hi anih tur ang taka sak a nih theih nan Department lama thawktute bakah khawtlang hruaituten a tul anga in enpui a  vilpui turin ka chah duh che u a ni,” a ti a,” Veng bil ta ni lovin mizo mipui ten tangkai taka kan hman tlan theih nan kan enkawl tur a ni,” a ti bawk. Pu Tawnluia chuan AMC hnuaia hmalakna hrang hrangte a tar langa, AMC hnuaia hna post 98 hnawkhahna tur te, Multi-level car parking sak mek te, City Centre sak nana hmalakna te tar langin AMC in chak zawka hna a thawh theih nan leh mumal zawka hma lak anih theih nan Mizoram Municipal Common Cadre Service Rules leh Mizoram Municipal Subordinate Service Rules duan anih thu a sawi bawk a ni.

Vawiin Multi-Purpose Community Hall lungphum phumnaah hian Dr C Vanlalramsanga, Secretary, UD & PA in kal khawmte lawmna thu a sawi a, Pu C Malsawma, Executive Engineer in technical report pein Pu Joseph H Lalramsanga, Director in lawmthu sawina hun a hmang bawk a ni.

Multi-Purpose Community Hall hi cheng nuai 500 seng a sak tur a ni a, a satu tur hi Torel Consultancy, Tlangnuam West a ni. Community Hall hi chhawng li (4) a sang tur niin a hmun hi 879.47 Sqft a zau a ni.