212/2022-2023

Khawzawl, the 20th April, 2022: NABARD (RIDF-XXIV) sum cheng nuai 1261.78 (cheng nuai sangkhat zahnih sawmruk pakhat, singsarih leh sangriat) senga Raifan lui atanga nizung chakna hmanga Sialhawk khua chawm tur tuilakna siam, Sialhawk Water Supply Scheme chu vawiin chawhnu khan PHE Department changtu Deputy Chief Minister Pu Tawnluia chuan khuallian niin a hawng. He hun hi Pu C.Lalmuanpuia, MLA, Veterinary, Fishery and Sericulture Board Vice Chairman chuan khualzahawm niin a telpui bawk.

Hawnna pual programme Sialhawk Community Hall-a neihah Pu Tawnluia chuan thu sawiin, tui harsatna khua Sialhawkin hnianghnar zawka tui an dawn theih nana tuilakna thar hawn a ni ta chu lawmawm tiiin, khaw mipuite a lawmpui takzet thu a sawi a. Sawrkai laipui duh dan angin tuilakna enkawl, tuaihnum leh vilzui zel kawngah a chhawrtu mipuite dah tel zel an nih thu a sawi a. Tui pump chhuah mai bakah in tina tui connection pek vek tum a nih thu sawiin, nizung chakna emaw, gravity leh tul dangte hmangin bial chhung khuate tui hnianghnar taka pek kim vek a ni, a ti. Cheng vaibelchhe 25 hmangin Khawhai Water Supply Scheme siam tum a nih thu leh hemi kaltlang hian tuitlan mai bakah Khawhai khaw chung Dil leh a vel cheimawi hna thawh tum a nih thu a sawi a. Khaw dangahte pawh tuilakna thawh mek niin, thawhlohna khuaahte pawh ruahmanna siama kutthlak thuai tum a ni, a ti bawk.

Deputy Chief Minister chuan Covid-19 hrilengin min tlakbuak avangin sawrkarin sum leh paiah harsatna tawkin duh angin hna a thawk thei lova, dam khaw chhuahna ngaihtuah hmasain theihtawp a chhuah a, hun leh tha, sum leh pai tam tak a seng ral a ni, a ti a. Covid vanga thi tlem berna State-te zinga kan awm hi Pathian kaihhruaina vang leh hrileng kara khawtlang hruaitute, mipui, NGO leh kohhran ten tha taka sawrkar an thlawpna leh theihtawp an chhuahna rah a nih thu a sawi bawk.

SEDP kengkawh tura din SEDP Executive Board Vice Chairman ni bawk chuan hrilengin ziaawm lam a pan mek zel chu lawmawm tiin, sawrkar flagship programme SEDP chu hamthatna dawng tur chhungkua tinzawnin tun sawrkar kum thar kalpui mekah hmalak tan tum a ni, a ti a. A thawhkhat nan Mizoram pumah chhungkua 60,000 tuam hmasak phawt tum niin, MLA bial tinah chhungkua 1,500 zelin chhungkaw khat zelah Rs. 50,000 theuh peka bultan tum a ni a, a ti a. SEDP dawng hmasa tur thlangtu committee chu khua, district leh state level anga din vek tur a nih thu a sawi bawk a. Kuthnathawktuten leirem an raha an dinchhuah theih nan sawrkarin theihtawp a chhuah zel dawn thu sawiin, a hlawhtlinna tak tak chu a dawngtute kutah a innghah dawn avangin theihtawp chhuah tur leh hlawhtlinpui tuma rinawm leh taima taka thawk turin mipuite a chah bawk.

Khualzahawm Veterinary, Fishery and Sericulture Board Vice Chairman Pu C.Lalmuanpuia chuan bialtu MLA Deputy Chief Minister hmalaknaa tuilakna tha tak tak bial chhunga hawn takte leh tui hnianghnar zawk nei thei tura hmalaknate chu chhawrnahawm tak tur a nih thu a sawi a. Mipuite chu hrileng vanga hun khirh tak tawh karah beidawng mai lova hmasawnna kawng zawh turin theihtawp chhuaha sawrkar hmalaknate thlawp turin a chah a. Sawrkar flagship programme SEDP sem chungchangah ruahmannate kalpui chhoh mek zel a nih thu sawiin, tum leh duh angin a hmaa ruahmana neihte ti thei dawn lo mah ila theihtawp chhuaha SEDP kalpui tura ruahmanna siam a ni, a ti bawk.

Thusawitu dang District Bawrhsap Pu C.C. Lalchhuangkima chuan zawh hun tur bituk aia hma daiha nizung chakna hmanga Sialhawk tuilakna zawh fel a ni thei chu lawmawm tiin, bialtu MLA, Department thawktute, Contractor leh tha thawhtu zawng zawngte chungah district aiawhin lawmthu a sawi a. Neitu nihna thinlung pu chunga enkawl tur leh tuihna humhalh kawnga theihtawp chhuah zel turin kalkhawmte a chah bawk. 

Hawnna pual inkhawm buatsaih hi Er. F.Liantluanga, Chief Engineer, Zone-II, PHE Department chuan a kaihruai a. Rev Rory Lalrinsanga'n hunserh a hmang a, Er. Lalzakhama, Sr. EE, Khawzawl WATSAN Division-in technical report a pe a. Sialhawk VCP Pu J.Lalremruata'n lawmthu sawiin hun a khar a ni.

Sialhawk Water Supply Scheme (Solar pumping) hi August ni 19, 2019 khan bul tan niin, May ni 31, 2022 a zawh hman tura tih chu September ni 1, 2021 khan tui pump chhuah theiha siam a ni a. Tui connection hi in 520 tan pek chhuah tum niin, PHED/Gangwal Engineering & Construction Company Private Ltd. te chu Implementing Agency an ni.

Mi pakhatin nikhatah tui litre 55 zel hmang anga chhutin mi 3,212 te kum 30 lo la awm leh tur thleng chawmzo tura duan a ni a. Tui pump chhuahna lui atanga tuidahkhawlna tuizem lian Sialhawk khaw lu a awm insanhleihna hi metre 860 a ni a. Nikhatah darkar 7 chhung tui pump thei tur leh nitin tui litre nuai 2,12,000 (nuaihnih singkhat leh sanghnih) pump thei tura duan a ni. Tui hi gravity hmangin kilometre 1 a thui  lakkhawm hmasak zet hnuah nizung chakna hmanga pump chhuah a ni a. Tuilakna pipe hi 100 mm diameter GI pipe niin tuilakna pipe thui zawng hi kilometre 6.5 a ni a, Sialhawk khuaa tuizem litre 3,00,000 (nuai thum) dawngah chhungluh niin heta tang hian khaw chhungah sem chhuah leh a ni. 

Tui pump chhuah nan hian Pumping Station 4 siam niin, avaiin Solar Power Plant Kilowatt (KW) 243.1 bun a ni a, hemi atan hian Solar Plate 748 dah a ni. Tui dahkhawlna leh thlitfimna RCC Sump 4, litre nuai 2,80,000 (nuaihnih leh singriat) dawng pakhat leh litre 40,000 (singli) dawng 3 te dah a ni a. Control room 4, Chowkidar quarters, Site Office leh a panna kawng pawh siam tel a ni bawk. A enkawl hna hi Department enpuina hnuaiah Village Water & Sanitation Committee kutah a awm dawn a, Contractor ten kum 5 chhung servicing an ti dawn a ni.

Deputy Chief Minister hian vawiin vek khan Vangtlang, Tlangpui leh Tlangmawi khuate tlawhin damlohnain a tlakbuak chhunga bial mipuite, offical leh sawrkar hotulute tawiawmna leh thlawpna avanga tun hun thleng thei a nih thu sawiin, VC leh bial mipuite chu bial chhung tihhmasawn leh chei kawnga theihtawp chhuahpuiah a sawm a. Khawtlang mipuiten inthliar hrang hauh lova inpawhtlang taka hma an la ho thin chu hmuhnuam tiin, chhawmnung zel turin a fuih a. Mamawh leh harsatna an thlente a tul ang zela bawhzui a nih tur thu a hrilh a ni.

Deputy CM hi Pu C.Lalmuanpuia, MLA, Vice Chairman, Veterinary Fishery and Sericulture Board;  Pu H.Lianzela, Director, UD&PA; Pu C.C. Lalchhuangkima, DC, Khawzawl; Er. J. Liantluanga, Chief Engineer, Zone-II, PHED; Er. C.Lalhmachhuana, SE, Champhai WATSAN Circle leh Official dangten an tawiawm a ni.