519/2024-2025

Kolasib dated 20th May, 2024: Vawiin khan Kolasib District Consumers’ Union (KODCU) General Meeting, 2024 chu UD&PA Conference Hall, Brig. C. Vankunga Shopping Centre, Diakkawn Kolasibah neih a ni a. Pu John LT Sanga Deputy Commissioner, Kolasib chuan khuallian niin he hun hi a hmanpui.

Khuallian Pu John LT Sanga Deputy Commissioner, Kolasib chuan, ‘Consumer’ chuan pawisa hmang a indawrtawnna a tel zawng zawngte a huam avangin ‘Consumer’ zingah kan tel vek a ni tih hriat hmasak a pawimawh thu sawiin kan chanvo te palzam a nih loh nan ‘Consumer’ kan nih ang a kan dikna chanvo kan hriatchian a pawimawh thu a sawi a. Chumi tur chuan ‘Consumer Awareness Campaign’ buatsaih fo a tul thu a sawi bawk a ni. Khawvel changkanna ina a ken tel thiamna hrang hrangte pawh awlsam zawk a insumdawntawn nan hman tangkai mek zel a nih rualin inbumna pawh a hluar chhoh ve zel thu Deputy Commissioner chuan tarlangin, chung thil tha lo hluar zel tur ven nan Consumer Union chu pawl pawimawh leh tangkai tak an nih thu a sawi bawk a ni.

He hun hi Dr. C. Lalmuankima, President, Kolasib District Consumers’ Union in kaihruaiin, Consumers union hmalakna leh nihphung te sawifiahna a nei a. Consumer leh mipui kaihhnawih Department hrang hrang hotuten thusawina hun neiin, mipui tan a an service pekchhuah chungchang ah zawhna leh chhanna hun te hman a ni.

Consumers Union General meeting 2024-ah hian pawl inrelbawlna bakah mipui leh consumer te tan a hmalakna tur thupui 7 chhawpchhuah te rel ho niin, hruaitu thar thlanna neih a ni a, Kolasib district chhung a Consumers Union dinna khaw hrang hrang atangin he hun hmang tur hian member an kal khawm a ni.