No.678/2020-2021

Nimin ni 28.4.2020 (Thawhlehni) khan Pu H. Lianzela, Deputy Commissioner & Chairman, District Level Task Force on COVID-19 leh a kaihhnawih hrang hrang Department- PWD, Agriculture, Horticulture, Minor Irrigation, Rural Development, LRS&WC Deptt, KVK, EF&CC Department, PHED leh Village Council aiawh ten COVID-19 hripui leng mekin a ken tel ei leh bara harsatna lo thleng thei tih ziaawmna tura hmalakna pakhat 'Enhancement of Food Production' atan Khawzawl District chhunga buh leh bal hlawk zawka thar chhuah theihna tur hmun- Bawnzawl, Kangbur leh Tiau Zau leilet phai te a hmunah an tlawh a, buh leh thlai tharchhuah theihna tur hmun leh hma leh kut hnathawktute mamawh an enchiang a.

Khawzawl, Chhawrtui leh a chhehvela khawtlang hruaitute leh kut hnathawktute nen hmalak dan tur an sawiho a, PWD hmalaknaa Highway atanga Kangbur Zau thlenga kawng laih tur a ruahmanna awm mek te chu a hmunah enfiahin, loneituten hlawk zawk leh tha zawka tharchhuah an neih theih nana Department hrang hrang hmalakna kal lai mekte leh an tih tur hmachhawpte enfiah nghal a ni bawk a ni.
Deputy Commissioner chuan Department hrang hrang hotute chu Khawzawl District mai ni lo, Mizoram chhung mamawh- buh leh thlai thar chhuak thei tur khawp a ruahmanna tha leh daihrei, loneitute tana hmasawnna tluantling a awmtheihna turin an Department chan theuh atanga ruahmanna felfai tak nei theuh turin a hrilh a. He hmalakna hi a bultanna chauh ni mah se kut hnathawktute tan leh Khawzawl District tan thil chhinchhiah tlak tak a ni. Inspection Team-te thilhmuh dan leh rawtna te hi Sawrkarah thlen tum a ni.

Vawiin ni 29.4.2020 hian Khawzawl-a Dawrkai lian ten COVID-19 dona atana hmalatute leh Lockdown avanga harsatna tawk chhungkuate tanpuina atan ei leh bar (Essential Commodities)- Buhfai, Alu, Artui, Satin, Dal, Chi, Purun sen thahnem tak leh leh Pawisa fai Rs.5000/- chu Deputy Commissioner & Chairman, District Level Task Force on COVID-19 hnenah an hlan a. Hetianga khawvel pumin Hripui COVID-19 avanga harsatna namenlo ramin a tawrhdan hrethiam a, Khawzawl District Mipuite he hripui laka an him theih nana hmalatute leh inkharkhip(lockdown) avanga harsatna tawkte tana inphal taka thilpek petu Khawzawl Dawrkai (Wholesaler)-te chungah District Level Task Force chuan lawm thu a sawi tak bawk a ni.

Heti lai hian Mumbai atanga Contact tracing avanga mi pakhat Nasopharyngeal Swab sample test tura lak, Khawzawl District Hospital atanga ni 27.4.2020 a Zoram Medical College-a thawn chu nimin ni 28.4.2020 khan result a chhuak a, COVID-19 a vei lo(negative) a ni tih tihchian a ni bawk a ni.