2916/2025-2026 

Lawngtlai, the 14th, January, 2026 : Vawiin chawhma dar 10:00 AM khan Pu Donny Lalruatsanga, Deputy Commissioner Lawngtlai chuan a Office Chamber - ah Lawngtlai khawpui chhunga 'Jio Tower ' phun belh a nih theihna turin Jio Company -thuneitute a kawm.

Pu Donny Lalruatsanga chuan, Lawngtlai khawpui chu khawpui dang aiin Internet facility lamah a hnufual hle a, Mobile Connectivity- lam a hmasawn theihna turin thuneitu hmasa te pawhin hma an lo la tawh thin a ni, a ti a. An hmalakna chhunzawm zelin tunah hian Jio Company te pawhin Tower phun tura hma an la mek chu lawmawm a tih thu a tarlang.

Pu Donny Lalruatsanga chuan, Internet signal a that loh chuan sawrkar mai ni lo, sumdawng leh mimal eizawnna thlengin harsatna a siam thin a. Company ten mipui te harsatna sutkian tuma Tower bun belh an tumna kawng ah lo tawiawm thiam pawh a tul hle ani, a ti . Jio Company ten Lawngtlai Electric Veng Area - a mobile tower dah belh an tum chu thil lawmawm tak a nih thu a sawi a. Company lam pawh theihtawp chhuah tur leh a hma thei ang bera a ram neitute leh an dahna tur hmun neitute nen inremna thutlung ziak a, hna chak thei ang ber a tan turin a ngen bawk a ni.

Jio Company Mizoram State Co-ordinator Pu Gilbert Renthlei chuan, Jio Company- ten mipui ah service tha thei ang ber pek an duh tih a sawi a. Chumi tur chuan tower pawh a tam thei ang ber Lawngtlaiah hian dah tum a hma lak mek ani, a ti. District Bawrhsap hmalaknaa Tower dah belh a ni tur chu lawmawm a tih thu a sawi bawk.

Vawiin District Bawrhsap leh Jio Company- te inkawmhona ah hian Pu David Lalrinawma Addl DC, Pu David Chakma, EE P&E, Pu Elvis Lalthangzuala MJA President, Pu Lalngaihzuala Fanchun, Treasurer CYLA leh Pu K. Laldinmawia, President LDVCA-  te an tel a ni.