No.1685/2020-2021
Mamit 4th June, 2020 : Ni 3.06.2020 zanlaia Mizoram Covid-19 RT-PCR test result chhuakah positive pathum (3) hmuhchhuah belh an ni a. Vanduaithlak takin heng positive zinga pakhat (1) hi Mamit District mi leh sa a ni a. Positive hi Delhi atanga rawn haw zing ami a ni. Result hriat a nih veleh a rang thei ang berin Ni 4.6.2020 (Thursday) zingkar khan Covid-19 Dedicated Hospital, Zoram Medical College, Aizawl-ah Ambulance-a phurh chhoh nghal a ni.
Positive leh a chuanpuite hi Bairabi screening zawh veleh, khawiah mah peng lo in Bus-in Mamit-a rawn dah a ni a. Mamit-a test titu Medical Team-te nen lo chuan inhnaihchilh leh in-contact pui an neih hriat a ni lo. Positive leh a chuanpui zing ami midang pariat (an vaiin pakua)-te chu Rapid Antibody Test an tih zawh veleh hian Tourist Lodge, Mamit Quarantine Center-ah felfai tak leh mipui tlawhpawh theih loha khunghran lehnghal an ni. Ni 1.6.2020 khan heng mi pakuate hi an sample lak vek tawh an ni a, tuna positive tih loh, a dang zawng result hi a negative vek a ni.
Sawrkarin tangkhang hruai haw dan felfai taka a siam anga hruai haw an ni a. Mamit khawtual mite nen in-contact miah lovin, felfai taka Quarantine Center-a hruai leh dah an nih avangin, mipuite tan chiai hluaina tur engmah a awm lo a ni. Amaherawhchu, kan fimkhur lehzual theuh erawh a tul hle a ni.
