No.2891/2020-2020

Vawiin chawhma khan Deputy Speaker Er. Lalrinawma chuan a pisa-ah Deputy Speaker lo ni tawh, Pu K.Sang Chhum ziah ‘FLAM’ (Former Legislators Association of Mizoram) lehkhabu tlangzarhna hun a nei.

Deputy Speaker Er. Lalrinawma chuan hun chep tak karah sawm bik lokal hnenah lawm thu a sawi a, Mizorama MLA lo ni tawh infuankhawmna forum tha tak FLAM chanchin ziaktu leh FLAM Treasurer ni mek Pu K. Sang Chhum hnenah lawmthu a sawi bawk a ni. FLAM chu political party dah tha a, MLA leh MP lo ni tawh ten ram tana thahnemngai a; inepna leh indaidanna awm lo a, inlungrualna hnuaia ram hmasawn nana forum an din pawimawh tak a ni, a ti a. Lehkhabu chhuah tur thu ziah hi awlai lo tak a ni a, rilrua vei zawng thawnthu ni lo, thil chhui chian ngai Research leh Statistics belhchian dawl dap khawma thuziak phei chu, a harsa leh zual a ni, a ti a. Thangthar lo la awm zel tur te tan pawh lehkhabu tangkai a nih a beisei thu sawiin, FLAM chhiartuten mipui rorel (democracy) hlutzia leh roreltute dinhmun pawimawhna te pawh hlut lehzual a, inpumkhatna tha zawk cho chhuahna lehkhabu ni ngei turin Deputy Speaker chuan duhsakna a hlan a ni.

Lehkhabu tlangzarh ‘FLAM’-ah hian FLAM a lo in din dan leh a thiltum pawimawh te, FLAM din tirh atanga OB leh Executive Member te, FLAM Member ni lai te leh boral tawh te tarlan a ni a. Hon’ble Speaker lo ni tawh Pu R.Romawia leh Deputy Speaker lo ni tawh Pu John Rotluangliana ten Office an pek chungchangte, MLA Fund/LADS khawtlang leh mipui tana tangkai taka a lo pianchhuah theihnana hmalaknate, MPF (Mizo People Forum) a lo pianchhuah theihnana hmalaknate, North East State hrang hranga thalaite, zirlaite, hnathawktute harsatna leh tihduhdahna a kiam theihnana Commission din tura India President ngenna leh tih hlawhtlinnate leh thildangte ziah a ni.

FLAM hi 1994 khan din a ni a. Member-te ko khawm a a bul tantute chu Dr. Kenneth Chawngliana leh Pu TC Pachhunga te an ni a, hruaitu hmasaberte chu President ah Dr. Kenneth Chawngliana, Vice Presi­dent Pu R.Lalawia leh General Secretary Pu K.Sang Chhum te an ni.

FLAM tum bulpui berte chu ram leh hnam tana an theihna an lo hman tawhna atanga kawng tinrenga ram intodelhna leh hmasawnna atan te, remna leh muanna vawng him tur te, hnam inpumkhatna atan te, sik leh sa leh nungcha humhalh te, Democracy humhim zel te leh FLAM Memberte inpumkhatna leh thawhhona tha siam a, a tul ang zela an hamthatna tura hmalakte a ni. FLAM Member ni theite chu MLA leh MP lo ni tawh te leh an nupui pasal thihsan tawh te an ni. FLAM member zingah MLA lo ni tawh 77 leh MP 7 an boral tawh a, member 151 awm mekin pensioners 104 leh family pensioner-47 te an ni.