2257/2022-2023
Dated Serchhip, the 10th October, 2022: Vawiin khan Er. Lalrinawma, Deputy Speaker leh Tuikum bialtu MLA chuan a bial chhung khua Sialhau chawmtu tur Tui Pump leh Volleyball Court thar MLA Fund hmangtea siam chu a hawng.

A hawnna inkhawm Sialhau Community Hall a buatsaihah Er. Lalrinawma chuan, Tui Pump thar leh Court thar hawn a ni ta chu Sialhau khawtlang tan hun hlimawm tak leh ni chhinchhiah tlak nia a hriat thu sawiin, he ni kan hman theih chhan hi Sialhau mipuite inpekna avang leh thawhrimna vang a ni, a ti a. Tuilakna thar chuan mipuite nitin nunah awlsamna nasa zawkte, hriselna leh thianghlimna lama hmasawnna duhawm zawkte a thlen dawn a ni, a ti a. Chutiang bawkin Volleyball Court thar pawh thalaiten infiamna lama hma an sawn phahna tur a nih ngei a beisei thu a sawi a ni. Deputy Speaker chuan, hmasawnna hrang hrang kalpui mek leh lo la awmzel turah te mipui leh sawrkar kan thawh ho that a pawimawh em em a, kan thawh hona a that phawt chuan hnathawh a thain a chak bik thin a ni. Tin, hmasawnna ruhrel kan neih ang ang te mipuiten mahni ta ang taka kan enkawl thiam a pawimawhzia tarlangin, vawiina kan hawn takte pawh hi a enkawl zui zelnaah khawtlang mipuiten mawh phurhna sang tak kan nei a ni tih i hria ang u, tiin Sialhau mipuite a chah a ni. Infiamna lama tui mite tan eizawnna kawng zau tak a inhawn thu tarlangin, infiamna chu eizawnna tling anih bakah hriselna atan pawh a tangkai em em a. Nunkawng dik lo leh tha lo tak takte laka inthiarfihlima taksa leh rilru hrisel zawk neih nan Volleyball Court thar chu thalaiten lo hmang turin a chah a ni.

He hunah hian Sialhau Secondary School zirlai titha chawimawina neih nghal niin chawimawina thilpekte hi khuallian hian a hlan a. Zirlai titha chawimawina hlan tlak engemawzat an neih theih avanga lawmthu sawiin, zirlaite chu nakin lawka kan hruaitu turte in ni a, nungchang uluk a, zirtitute leh nu leh pate thuawih turte, nasa zawka inzir zui zel turin a chah a ni.

Tuivamit tuipum leh Volleyball Court hi Tuikum Bial MLA Fund atanga thawh an ni a. Tuivamit tui hi khua atanga Kilometer khat vela hla a mi niin khaw chhungah pump thlen a ni a, khuaah hian Tanky pahnih siam niin chuta tang chuan sem darh leh a ni. A fur a thala khawtlang mamawh phuhru thei tura ngaih a ni.

Deputy Speaker hi Pu H. Lalroliana, Member, Sports, Youth Affairs & Tourism Board leh official pawimawh dangten an tawiawm a ni.

A hawnna inkhawm hi Pu PC. Lalduhsanga, VCP in kaihruaiin Pi VL. Hriatpuii, MHIP President in hunserh a hmang a. Report tawi Pu V. Lalduhzuala VC Secretary in a pek hnuah lawmthu sawina Pu F. Pazawna VC Treasurer chuan inkhawm a khar a ni.