918/2024-2025

Dated Kolasib the 24th June, 2024:  Vawiin Chawhma khan  Khuangpuilam Community Hall sak thar hawnna,  Khuangpuilam Community Hall, Kolasib ah neih a ni a, he hall hawngtu atan  hian Deputy Speaker Pu Lalfamkima chu Khuallian atana sawm a ni.

Hall hawnna program-ah hian Khuallian, Deputy Speaker  Pu Lalfamkima chuan  Khuangpuilam Hall hawnna a kalkhawmte chu Hall tha tak an nei chu a lawmpui thu sawiin, Khuangpuilam Community Hall awmna hmun chu veng thar deuh a nihna chin a la awm avangin veng ina a mamawh hmachhawp tam tak a la awm a, chung te chu vawi leh khat a neih nghal mai a rem loh avangin zawi zawia hma lak a ngai a ni, a ti a. Vawiin a an Hall hawn mek pawh a tihphuisui kawngah theihtawp lo chhuah a tum thu a sawi bawk.

Deputy Speaker Pu Lalfamkima chuan ZPM sawkar thar chuan thil pawimawh tamtak zingah zirna, kawng leh hriselna chu a dah pawimawh hmasak a ni, a ti a. Tunhnaiah naupang ten tuition kal an in tih hmuh hle a, tuition kal loh chuan pass theih loh hial anga inngaihnate pawh tamtakah a awm ta chu a pawi a tih thu sawiin, zirtirtu ten naupang te an thiamna khawp school a an zirtir chu an tihmakmawh a ni, a ti. 

Pu Lalfamkima chuan sawkar chuan Mizoram hmasawn zel nan kawng hrang hrangah hma a lak avangin aikal lak chungchangte leh sawrkar hnathawk a pension emaw, alo boral avanga khawngaihna a  an chhungte hna engemaw a thun lo awm zeuh thin te pawh kalphung tharah chuan a awm tawh loh tur thu sawiin, sawrkar hna hrim hrim chu interview paltlang vek a ngai a ni, a ti a. Hna zawng mek  te tan pawh an thiltih ah rinawmna, taihmakna leh Pathian tihna a awm chuan hlawhtlinna awm a ni, a ti bawk.

Khuallian in thusawina a neih zawh hian he Hall Sak theih nana a bul tum tu Pu PC Zoramsangliana (L)  fanu  Pi Carolyn Zonunmawii, District Sainik Welfare and resettlement Officer chuan lawmthu sawina neiin, Khuangpuilam mipuiten a pa an hmangaihna ah lawmthu a sawi a, Hall chu tangkai taka an hman theih nan duhsakna a hlan bawk.

Khuangpuilam a Community Hall hawn tak hi a dung Ft 60 leh a vang Ft 50 a ni a, Bialtu MLA ni thin Pu PC Zoramsangliana (L) chuan he hall sak theih nan hian bul tan in Bialtu MLA, Ex- Minister kalchhuak ta Pu K Lalrinliana'n Hall sak mek chu sak chhunzawm a nih theihna tur ngaihtuah sakin December 2023 khan Community Hall hi sak puitlin a ni.

Vawiin a Khuangpuilam Community Hall hawnna program hi Pu Robert VL Hruaia, Hall Committee Chairman chuan inkhawm a kaihruai a,Khuallian thusawi bakah hian sawmbik te thusawina hun leh malzai leh hnam lam entirna hun te hman a ni. He hunah hian mipui thahnem tak kalkhawm in Local Council aiawhte bakah YMA, MHIP, UPA PAWL, School naupangte leh sawmbik mi pawimawhte an tel a ni.