Vawiin chawhma dar 11:00 khan Mizoram Legislative Assembly a Deputy Speaker thar Pu R. Lalrinawma chuan a pisa, Assembly Secretariat Annexe ami chu Pathian hnena hlanna nei in a luah tan a. Deputy Speaker hi Parliamentary Secretary Lt. Col (Rtd) Z.S. Zuala, Parliamentary Secretary Pu K. Lalrinthanga leh ZIDCO Chairman Pu Lalrobiaka ten an tawiawm a ni.

Pu R. Lalrinawma, Deputy Speaker thar chuan chanvo pawimawhtak petu Pathian leh mipui te hnenah thinlung taka a lawmthu a sawi a. Legislator te tana mawhphurhna pawimawh ber pakhat chu dan siam a ni a. Dan tha leh felfai neih chu ram hmasawnna leh ngelnghehna a nih avangin ngaihpawimawh hmasak ber a ni fo tur a ni a ti.

Deputy Speaker Pisa thar hawnna programme hi Mizoram Assembly Secretariat a Joint Secretary Pu Lalrinawma’n a kaihruai a. He hunah hian ZIDCO Chairman Pu Lalrobiaka leh Pu Ngurthanzuala, Secretary, Assembly Secretariat te paw’n thusawina hun an hmang a ni.