1221/2026-2027

Dated Aizawl, the 29th June 2026: Vawiin khan Mizoram Peace Accord vawi 40-na pualin Zoram Research Foundation leh NCCI hnuaia India Peace Centre leh Aijal Club-te chuan Mizoram State Planning Board Meeting Room-ah ‘40 Years of Harmony: Legislative Dialogue on Peace Building’ tih thupui hmangin sawihona hun an buatsaih a. Mizoram Legislative Assembly Deputy Speaker Pu Lalfamkima chuan he hun hi a hmanpui a, MLA ni mekte leh MLA lo ni tawhte an tel a ni.

Pu Lalfamkima chuan Zofate tan hun kal tawh hriatreng a pawimawh thu sawiin, kum 1986 hma lamah chuan Mizoram chu silai puak thawm leh nunau mangang au rawla khat a ni thin, a ti a. Remna kan neih hnuah chuan hlauhna tellovin Mizoram chuan ropui zawngin hmalam a pan mek tih a sawi a. Inremna kan neih theihna atana thawktu hruaitu hmasa: Pu Rajiv Gandhi-a te, Pu Laldenga te, ram hruaitute leh kohhran khawtlang hruaitute inpekna thuk tak vang a ni, tiin Deputy Speaker chuan a sawi bawk.

Deputy Speaker chuan he Mizoram Peace Accord hi khawvel hriatah pawh chhuanawm tham a nih thu sawiin, Peace Accord dang hlawhchham tam tak karah Mizo Peace Accord erawh nghet takin a ding zel a ni, a ti a. He Peace Accord hlutzia hre reng chunga vawnhim hna thawh zel chu an mawhphurhna a nih thu MLA leh MLA hlui kalkhawmte hnenah a sawi bawk a ni.

He hunah hian MLA leh MLA hlui kalkhawmte chuan kum 40 liam taa Mizoram Peace Accord ziah a nih atanga tun thlenga Mizoramin remna tluantling kan neih dante, inremna ngelnghet kan neih avanga kum 40 chhunga kawng hrang hranga Mizoram dinhmun te leh remna boruak hnuaia Mizoram than zelna tur leh hmasawnna tur kawngte an sawiho a. Remna leh muanna derthawnzia hre reng chungin kum 40 chhung kan lo vawnhim tawh inremna chu chhawm nung zel turin mipui aiawha thlan MLA te pawimawhna pawh an sawiho bawk a ni.

Vawiin inkhawm hi Zoram Research Foundation-a Executive Committee Member Rev. Dr. Lalchungnunga’n a kaihruai a. India Peace Centre Director Pu Michael Angelious-an thupui a sawi a, Zoram Research Foundation-a Executive Committee Member Rev. Dr. Vanlalchhuanawma’n sawihona khaikhawmin he hun hi a khar a ni.