Vawiin chawhnu khan Sihphir Government High School-ah Deputy Speaker Pu R.Lalrinawma chuan Sihphir khawtlang enkawl mek, Sihphir Higher Secondary School atanga pawl 12 pass chhuakte pass lawmpuina a hmanpui.
Zirlai hlawhtlingte lawmpuina leh fuihna thusawiin Deputy Speaker Pu R.Lalrinawma chuan pawl 12 passed tawh chuan a sang zawnga zir chhoh zel nge tha ang eizawnna lam hawi thiamna hranga training tha zawk ang tih a buk thiam tawh a hun a ni a ti. Sawkarin NEDP kaltlangin mahni kutke din tum te tan kawngka zau tak a hawng meka, skill development programme hrang hrang leh MYC hmalakna kaltlang tein eizawnna atana tangkai thiamna training tur tam tak thalai tan a awm mek tih a tarlanga. Mizoramah lehkhathiam zawng zawngte tan hnathawh tur a awm seng lo a, phailamahte leh rampawn thleng te pawha thawk thei tura rilru leh thiamna kawngah te pawh Mizo thalaiten inpuahchahna thatak an neih a tul tawh a ni a ti.
Deputy Speaker chuan mithiamte chiah an hlawhtling lo a, mi taima te erawh an hlawhtling deuh vek zawk a ni tiin hlawhtlinna atan thawhrim a pawimawh ber tih awiin zirlaite chu a fuih a. Zonunmawi zirthar a tul thu te, hnamdangte thawhpui thiam tulna te sawiin "Mizo te hian hmasawn ve kan duh chuan kan penchhuah a, kan dai dar leh midangte nen pawh tun aia nasa zawk kan indawr a ngai tih kan chian a ngai a ni. Kan pi leh pu atanga Mizo nunmawi - tlawmngaihna, taihmak, thawhrim, huaisen, aia upa zah leh kawng hrang hranga kan ze mawi te bakah hnamdangte zia kan hriat tel phawt chuan khawiahmah harsatna kan tawh a rinawmloh a ni", a ti.
Kumin pawl 12 result-ah HSS engemawh zah te chu vantlangin an enkawl, sawrkar hnuaia la awm rih lo te an ni a. Chung mite hlawhtlinna chu a chhuanawm hlea, sikul changtlung zawkte hlawhtlinna aiin a nep chuanglo tih a sawi a. Hlawhtlinna dik zawk chu mark hmuhsan leh result tha neih a ni ringawt loa; chhungkua, vengchhung, khawtlang leh ram tanna thiamna leh theihna chhawrtlan theih neih a ni a ti . "Hmun tamtakah Higher Secondary School te din niin sawrkar lak an ngiat tih sawrkarin a hria a. Mahse, sawrkar ngaihdan erawh chu - sikul siambelh aiin a awmsa thawm that leh tihchangtlun a ni zawkmah a, zirlaite hlawkpui turkhawp zirna in tha zawka siam kan tum a ni", a ti.
Sihphir Higher Secondary School hi Siphir khawtlangin an khawchhunga High School 6 atanga zirchhuakte leh zirzawm duhten harsatna an tawh thin tihziaawm nan kum 2009 khan an din a ni. Tunah hian sikul naupang 67 an nei mek a. Vawiina pass tharte lawmpuina hunah hian he sikul tanpuina atan, Deputy Speaker Pu R.Lalrinawma, bialtu MLA ni bawk chuan ama pualin sum fai Rs 2, 00, 000/-(nuai hnih) leh infiamna bungruate a pe a ni
