Tukin zing dar 8:00 AM khan Assembly Deputy Speaker, Pu R. Lalrinawma chuan Labour, Employment & Industrial Training Department leh Mizoram Youth Commission bultuma Emporium Training & Consultancy Pvt. Ltd., Kolkata-a ‘6 Months Certificate Course in Aviation, Tourism & Hospitality’ training tur thalai mipa 40 chu Ch. Chhunga Bus Terminal atangin a vailiam. He hmunah training tur thlahna hun tawite buatsaih hi MYC Chairman Pu T. Sangkunga chuan a kaihruai a ni.

Deputy Speaker Pu R. Lalrinawmna chuan thalai training a kal tur te ko ah Mizoram hming thatna leh hming chhiat theihna a innghat a tiin nawmsak hmasak tum lova, harsatna engkim hmachhawn a beidawng lova, hlawhtling taka training paltlang turin a fuih. MYC hmalakna in thalai lehkha thiam tam tak te tan training kawng dap sak a, hma a la zel chu lawmawm a tih thu a sawi.

Pu T. Sangkunga chuan training a kal tur te tumruhna nei tura fuihin hlawhtlinna chu anmahni ah a innghat a ni, a ti.

He hun hi Pu Rotluanga, Director, LE &IT leh Pu J.T. Vanlalngheta, Secretary, MYC te pawhin an hmanpui a. Training tur te hi Pu Anirban Mukherjee, ETC, Kolkata chuan hoin naktuk khian Guwahati atangin train in Kolkata pan tura beisei an ni.

Vawiina training tura kal te hi Batch 2-na niin Batch 1-na mi 40 dangte chu April thla khan a lo kal tawh bawk a ni.