2135/2026-2027

Kolasib, 9th September, 2026: Vawiin khan Mizoram Legislative Assembly Deputy Speaker, Pu Lalfamkima chuan Mizoram Governor, General (Dr) Vijay Kumar Singh, PVSM, AVSM, YSM (Retd), hmuin Vairengte atanga Sihmui panna kawng siamthat chungchang leh Kawnpui atanga Aizawl panna kawng zauh chungchang a sawipui.

Deputy Speaker hian Vairengte leh Sihmui inkar kawng chhe zual lai, tui putin a tihchhiat thinte siam that nan PQC (cement a chhun) hmang tura NHIDCL in 'Change of Scope' an siam, Delhi lamin 'in-principle' a an lo pawm tawh chu Governor hi sanction nawrpui turin a ngen a.

He kawng tui put thin siamthatna tur PQC hman rawtna NHIDCL in central-a an thehluh hi a taka hna thawh theih nan sanction hmuh a ngai a, fur ruahtui a ban ruala working season ințan hunah hna tan nghal a nih theih nan sanction hi nawr chhuahsak turin Deputy Speaker hian Governor hi a sawipui a ni. Governor hian he ngenna hi lo ngai pawimawhin, kar leha Delhi a kal hmasak ber hunah theih tawpin hma a lo lakpui tur thu a lo hrilh a ni.

Hemi bakah hian Deputy Speaker hian Kawnpui atanga Durtlang kaltlanga Aizawl panna kawng (tlang kawng) pawh chu double lane-a siam a nih theih nan central hotute hnena nawrpui turin Governor hi a ngen nghal bawk a. Governor pawhin Aizawl khawpui luhna leh chhuahna hi kawng pakhat chauh rinchhan lova, kawng pahnih tal a awm theih chu a duhthu a lo sawi ve bawk a. He kawng double lane a siam tura ngenna hi a ngaihpawimawh thu leh theih tawpa a lo bawhzui tur thu a sawi bawk a ni.

Pu Lalfamkima hian kawng siamna tura sanction pawimawh hrang hrangte hi a rang lama tihfel a, thal intan ruala hna tan nghal thei tura nawr chhuahsak turin Governor hi a ngen a ni.