Vawiin khan Pu Lalrokhuma Pachuau, IPS Director, General of Police, Mizoram chuan Aizawl-a Security Unit Staff te kokhawmin Arya Mess, Police Headquarters-ah fuihna thu tha tak tak a hrilh a. Disciplined Force an nih ang ngeia discipline kawnga tan la zual tur leh Police te chu ram mipuite tana thawktu an nihna zawn a ram leh mipuite rawngbawl hna chu a taka kalpui zel turin a chah a. Tunhma lam aia mipuiten police ah rinna an neih chhoh leh zel avanga lawmawm a tih rualin tha thlah lova rinawmna nena an duty hlen zel turin a chah bawk.
Security Staff te chu VIP leh mi pawimawh dangte venghimtu an nih ang chiah a khawsa tur leh an mi vente tan pawh mualphona thlen theitu an nih avangin an nitin khawsak nunphung pawh uluk lehzual tur an nih thu te, ram ralmuang pawh ni mah ila hriat lawk loh harsatna leh boruak thalo ten min chim theih reng avanga rilru leh taksa invawng uluk a, inring renga awm a pawimawh thu te a chah tel bawk.
DGP chuan vawiin a hmasawnna kan neih theuh bak hi hmasawnna thar neih zel tum turin a fuih a Security ten an hman tur hmanraw thar lam pawh ngaihtuah chhoh mek a nih thu a sawi bawk. Hemi hunah hian Addl. DGP pawhih fuihna thu tha tak tak a sawi bawk.
Hetih lai hian Security Staff te pawhin an harsatna neih te pawh DGP hnenah an thlen nghal bawk.
