DIET, Aizawl chuan kum tina an kalpui thin angin Micro Teaching chu April ni 26 leh ni 30 2010 inkarah neiin ; vawiin khan DIET Auditorium-ah Trainee ti tha thlanchhuah te chuan Demonstration Class hlawhtling takin an nei. Micro Teaching hi Practice Teaching chi khat niin zirlai hrilhfiah thiamna te, naupangte thil hriat phawrh chhuah tuma zawhna zawh thin te, example hmanga naupangte zirtir thin te leh blackboard hman thiam te chu a huam tel a ni. Trainees te chuan Micro Teaching chu an hlawkpui thu leh awmze nei taka, zirtir hna lamah ah puih ngei thu an sawi.
June ni 1 2010 khan DIET, Aizawl chuan Soil & Water Conservation Department nen tang kawpin Green Mizoram tihhlawhtlin nan, an Campus chhungah coffee phun runpui a nei a; hetah hian coffee kung 720 zet an phun a ni. DIET chuan heng coffee an phun hi a puitling theih nan, Chaltlang mipuite chu venpui turin an ngen.
