2330/2026-2027

Lunglei, 2026 Mimkut Thla ni 24: Nimin khan District Institute of Education & Training (DIET), Lunglei chuan an Multipurpose Hall-ah DIET Lunglei aṭanga Diploma in Elementary Education (D.El.Ed) leh Bachelor of Education (B.Ed) Final Examination 2026-a ti ṭha berte hnenah ZD Rongura Award an hlan.

Kum 2021 aṭanga bul ṭan ZD Rongura Award hi Mizoram Board of School Education (MBSE) hnuaia D.El.Ed Final Examination leh Mizoram University (MZU) hnuaia B.Ed Final Examination-a DlET Lunglei aṭanga ti ṭha berte hnenah kum tin hlan ṭhin a ni a. Tun ṭumah hian D.El.Ed-a Mizoram puma pakhatna Lallawmsangi, hnenah leh Lalruatmawii, B.Ed te hnenah ZD Rongura Award hi hlan a ni a. Hemi rual hian DIET Meritorious Award 2026 chu D.El.Ed-a Mizoram puma pasarihna Laldinliana Sailo hnenah hlan a ni bawk.

Award hlanna inkhawm hi Sr Lecturer Pi V. Lalliansangi'n a kaihruai a. DIET Lunglei Principal Pi Lalremruati Fanai, Pu ZD Rongura fapa Pu ZD Lalnunmawia leh MBSE Regional Officer Pu F. Ricky Lalremruatpuia te'n thu an sawi.

Pu ZD Rongura hi DIET Lunglei din tirh, UGTTI a nih lai aṭanga Principal hmasa ber a ni a. Amah hriat reng nan leh zirtirtu ṭha an lo chhuah zel theih nan a tu leh fate'n Award hi an buatsaih a ni.