Vawiin khan New Secretariat Conference Hall-ah DigiLocker chungchang workshop chu Information & Communications Department, Mizoram leh sawrkar laipui Ministry of Electronics and Information Technology hnuaia National eGovernance Division  tangkawp chuan Mizoram sawrkar Department tin hotute tan an buatsaih.

DigiLocker hi India Sawrkarin a khua leh tuite tan internet kaltlanga document pawimawh an dah that theihna tura a buatsaih a ni a. Lehkha pawimawh - Driving licence, voter’s ID card, education certificate, PAN card, Aaadhar Card, migration certificate leh a dangte  hmun hrang hranga kenkual ngai lovin, internet an khawih theihna hmun apiangah, digital device - cell phone, tablet, computer hmangin a mamawhtu ten an haichhuak zung zung thei  a ni. DigiLocker hi July ni 1, 2015 khan Prime Minister Narendra Modi chuan a duh apiang hman theih turin a lo hawng tawh a ni.

DigiLocker hmang hian sawrkar agencies - Taxation Department, Mizoram Board of School Education (MBSE), Transport Depatment leh a dang  ten lehkha pawimawh an issue thei dawn a. Sawrkar laipuiah chuan Central Board of School Education hian DigiLocker kaltlangin result te a tichhuak tawh a ni.  DigiLocker hmangtu sawrkar department te tan hian storage data an mamawh ang zat zat pek chhuah an ni ang a, mimal he application hmangtu te tan erawh a thlawnin 1gb thleng pek an ni ang. DigiLocker hi a duh apiang hman atan application download mai theih tura dah chhuah a ni tawh a ni. Sawrkar Department-a lehkha pawimawh submit ngai, entirnan, passport dil dawna a diltu nihna ti chiangtu tur document pawimawh engemawzat submit lo tul ta se, a taka office-a thehluh kher ngai lovin digiLocker hmang hian a submit theih ang.

Workshop-ah hian DigiLocker Team, National eGovernance Division aiawh ten a nih phung leh hman dan tur chungchang kalkhawm te an hrilhfiah a. Zawhna leh chhanna hun hman zui nghal a ni bawk. ICT Department Commissioner & Secretary Pu Vanlal Chhuanga chuan kamkeuna hun hmangin ICT Chief Informatics Officer Dr Lalthlamuana’n programme a kaihruai a. Informatics Officer Pu Vanlalringa’n lawmthu sawiin hun hnung a khar a ni.