Tukin zing khan Dinthar Thlanmual - Kanaan kawng thawmthat chu I&PR Minister Pu Lalruatkima’n a hawng a he hun hi Pu R Thanglura’n kaihruaiin PWD Aizawl Road North leh South Division, Dinthar leh Kanaan Veng khawtlang hruaitute leh veng mipuiten he hun hi an telpui a ni.

Minister Pu Lalruatkima chuan Dinthar leh Kanaan veng khawtlang hruaitute inphalna leh inpeknate chu fakawm a tih thu sawiin ,”Dinthar thlanmual - Kanaan Road chu Sawrkar hmun MINECO leh damlote pan hlawh tak Damdawiin panna kawng te a nih avangin he kawng hi laih zau a thawmthat a tul hle a, mipuiten tangkai taka an hman theih nan he kawng peih fel ani hi a lawmawm hle a ni,” a ti. Pu Lalruatkima chuan kawng nek a insakte, kawng chunga motor silte leh dim lo taka kawng hman a ni thin chu pawi a tih thu sawiin kawng kan neih ang angte chu uluk taka enkawl turin leh kawng chungchanga dan awmte chu zawm zel turin kalkhawmte a chah bawk a ni. Minister chuan PWD Road North leh South Division te hnathawh chu fakawm tiin sawrkar hmalaknaa contractor ten hna hrang hrang an thawh thin ah te anih dan tur ang taka thawh anih theih nan inthlahrung miah lova vil thin turin a chah bawk a ni.

Dinthar thlanmual-Kanaan road hi kum 2014 khan MLA LAD fund leh fund awm thei ang angte pawt khawmin LMV motor kal theih a laih zau a ni a, RCC pavement pawh siam a ni. He kawng hi Aizawl West constituency veng hrang hrang bakah Aizawl West II bial Kanaan leh Chawnpui veng tan Mizoram New Capital Complex panna kawng tangkai tak a ni. He kawng thawm that nan hian Aizawl Road South Division huam chhung Dinthar thlanmual peng atangin meter 294 leh Aizawl North Division huam chhung Kanan veng lam meter 340 a sei laih zau leh thawmthat hna thawh a ni. He hna hi phase 3 a thawh niin cheng nuai 164.24 sen a ni.