No.3646/2021-2022

Aizawl the 13th January 2022 : Vawiin khan Department of Information and Public Relations (DIPR) buatsaihin anmahni Auditorium-ah Mizoram Journalists’ Association (MJA) member te nen kum thar inhlantharna hun an hmang.

DIPR Director Pi Lallianpuii chuan MJA leh DIPR a thawkte chu tum thuhmun neia hnathawk, unau leh chhungkua, hman atanga vawiin thlenga inhnehnai leh thawkho an ni, a ti a. He an thawhhona boruak tha tak hi ngaiah nei mai lovin, a pawimawhzia leh hlutzia hrethar leh turin a fuih a ni.  Press mite leh DIPR te hnathawh chuan a thleng thui a, vawiin atan chauh ni lo, nakin hun lo la awm zel tur thlengin mite hnenah thu a sawi thin a ni, a ti a. Sawrkar leh mipui tana rawngbawl hna hlawk tak an thawk tih hrechiang a, hma lam pana theihtawp chhuah turin DIPR Director chuan kalkhawm te a sawm a ni. Pi Lallianpuii chuan I&PR Department hnathawh hrang hrang sawi langin Public Relations chu an hna peng pawimawh tak a nih thu te, thalaite talent haichhuahna leh eizawnna siamsak kawnga pawimawh - film, art leh photography lamah pawh nodal department an ni tih a tarlang a. Chawilar leh chawisan mamawh em em heng film, art leh photography tilar turin MJA te chu thawhhopuiah a sawm nghal a ni.

MJA President Pu Zonunsanga Khiangte pawhin IPR Department-in MJA te hamthatna tura hma an lak tawhna leh tun thlenga hma an lak zel chungchangah lawmthu a sawi a. An welfare atana hma an lakna kawngah Journalist Pension Scheme an ngaih pawimawhzia sawiin, tan lakpui turin Department hotute a ngen a ni. Pu Zonunsanga Khiangte chuan Journalist te leh DIPR mi leh saten ram tana an hmalakna tam tak zingah chi leh chi, hnam leh hnam inkara inpumkhatna ‘communal harmony’ pawimawhzia a sawi lang a. Hemi kawngah hian sawrkar kaihhruaina hnuaiah nasa lehzuala hmalak tul a tih thu a sawi bawk a ni.

Vawiin programme hi I&PR Deputy Director Pi PB Lianthangpuiin a kaihhruai a. Thusawi hrang hrang ngaihthlak a nih hnuah I&PR Deputy Director Pu Andrew H.Lalremruata’n lawmthu sawiin hun hnung a khar a ni.