No.3397/2019-2020

DIPR’S UPDATE ON COVID-19 FOR MIZORAM

DT. 29.03.2020 TIME: 10:00PM

ABSTRACT OF STATUS AT QUARANTINE FACILITIES ALL MIZORAM AS ON29/3/2020 : 7:30 pm

#Status of State Surveillance of COVID-19

(Time: 28.3.2020 12 Noon – 29.3.2020 12:00 Noon) 

 #Details of Screening at various screening sites in Mizoram, Date :29.3.2020

# LUNGLEI DISTRICT-A TANGKHANGTE CHUNGCHANGA DC HRIATTIRNA 

Lunglei District chhunga hnathawhna avanga mahni khua nilova tangkhangte leh State pawn atanga lokal te list thehluh tur tih kha list a rawn lut mek a, la thehlut lo emaw, hetiang mi neih thar pawh awm leh thei anih avangin a hnuaia proforma tarlan ang hian information thehluh tur a ni a. Thehluh a awlsam nan Village Council whatsapp group-ah khan thawn theih a ni ang.

List hi a hnuai ami ang hian hlawm thuma(Pont 1,2 leh 3 tan) siam tur a ni a.

1. Hnathawhna leh thil dang vanga awmna/chenna mumal neilo tangkhang laklawh mahni khua nilova awmte, State pawn atanga lokal ILP nei (emaw nei lo pawh),zin veivahna avanga tangkhang laklawhte.

2.Company/Contractor hnuaia thawk, Lunglei District-a awmte hi a hlawma camp-a awmte an ni hlawm a, an list pawh neih a ni a, chutih laiin hriat hmaihte awmthei a nih avangin VLTF te hian hemi chungchanga information tlangpui hi rawn thehluh tho tur a ni.

3. ILP neia Lunglei District-a awm hmun neisa-a khawsa/ inhlawh thin (e.g. cement mistiri, etc)te list hran neih tur a ni.

# AIZAWL KHAWPUI HUAM CHHUNGA PETROL PUMP HAWN HUN TUR SIAM 

No.3392/2019-2020 

Covid19 avanga mipuite himna ngaihtuah chungin leh Essential Commodities a harsatna kan tawhte hre reng chungin FCS&CA Department chuan Aizawl khawpui huam chhunga Petrol Pump/Filling station te hawn dan tur a ruahman a. Ni 30.03.2020 (Monday) atanga thu leh awm hma chu Aizawl huam chhunga Petrol Pump/Filling Station te a hnuaia mi ang hi an in hawn dan tur a ni ang. Petrol filling station ah hian filling station neitute’n ‘Social Distancing’ hmang thei ngei turin ruahmanna lo siam ngei ni bawk se tih a ni.

# DC HOVIN KOLASIB CHHUNG A KHUALZIN TANGKHANG ENKAWL DAN TUR NGAIHTUAH 

No.3391/2019-2020 

Vawiin chawhnu khan DC Conference Hall, Kolasibah Kolasib district huam chhung a khualzin tangkhang, Lockdown avang a mahni ina haw theilo te enkawl dan tur ngaihtuahin Executive Zonal Magistrate leh Nodal Officer ten thutkhawmna an nei a, Dr H Lalthlangliana, DC in he hun hi a kaihhruai a ni.

Dr H Lalthlangliana chuan Covid-19 hri darh zel tur ven nan Lockdown puan a nih hnu a khualzin tangkhang enkawl dan tur sawrkarin a chhuah angin, Kolasib district chhung a khualzin tangkhang awm zawng zawng te chhinchhiah a, an mamawh hrang hrang ngaihtuah sak a tul thu a sawi. Kolasib district chhung bialtu Executive Zonal Magistrate te atangin an bial chhung theuh a khualzin, mahni ina haw thei lo awm zat te, an awmna tur hmun ruahman dan tur te leh an ei leh in mamawh ngaihtuah sak dan tur te sawi ho a ni. Mi thenkhat, hnathawna avang a Kolasib district chhung a tangkhang, Ration card nei si lo te mamawh chu Village Level Task Force te leh Essential Commodities Team ten an mamawh ang eitur ngaituah sak tur a tih a ni bawk.

Dr H Lalthlangliana chuan Kolasib District chhung a Lockdown puan a nih hnu a harsatna lian tham awm miah lova hmalakna tluang tak a kalpui a ni thin chu District Officer te leh Village Level Task Force te inpekna vang a nih thu sawiin tha tak a thawh hona nei zel turin kalkhawm te a chah bawk a ni.

# MSO Jt.HQRS, AIZAWL HRUAITU TEN GOV'T QUARANTINE CENTRE -I, SIAHA INMATES TE TAN THILPEK AN HLAN 

No.3390/2019-2020

Vawiin chawhma khan MSO Jt Hqrs,Aizawl hruaitute chuan tuna Gov’t Quarantine Centre – 1, Siaha a awm mek te tan hmawmsawm leh an mimal mamawh a hman tur tanpuina thilpek chi hrang hrang an pe. He thilpek hi Pu C. Beimova Vice President, MSO Jt.Hqrs,Aizawl in Pu Ngulzathuama, MCS, Nodal Officer hnenah a hlan a ni.

Quarantine Centre-1 a thawkte leh awm mek ten lawmawm anti tak zet a, hetiang thil pek tihna chang hria MSO Jt.Hqrs, Aizawl te chungah Quarantine Center-1 a duty te leh awm mek ten lawmthu an sawi tak meuh a ni.

Tunah hian Gov’t Quarantine Centre-1 Siaha awm mek te hi a tam zawk zirlai vairam a awmte an ni. Ni 24 leh 25 March, 2020 atanga dah tan te an ni a, tlawmngai a an ni viltu hi mi 8 an awm mek bawk.

 Tun dinhmunah chuan Quarantine Centre-1 a dahte pawhin insawiselna nei an awm hriat a ni lo. Doctor in nitin vawi-2 a tlawh ziah bawk.

# LAWNGTLAI DISTRICT LEVEL TASK FORCE-IN VEGETABLE SUPPLY CHAIN KALPUI 

No.3388/2019-2020

Mizoram sawrkarin COVID-19 vanga inkharkhip laia ram chhung mipuite thlai thar mamawh pe chhuak tura thlai thar lak khawm leh sem chhuah dan tur (vegetable supply chain) a ruahman angin, Lawngtlai District-ah chuan Bawrhsap kaihhruaina hnuaiah District Level Task Force-in ruahmanna siamin, Lawngtlai Horticulture Division chuan thingtlang atangin thlai thar an phur khawm a, vawiin atang khan veng hrang hrang local level task force hnenah an sem chhuak.

March ni 27 (Zirtawpni) khan Lawngtlai Horticulture Division-a officer leh staff-te chuan hna chanpual insemin an bawhzui nghal a. Lawngtlai District chhunga thingtlang khaw hrang hrang - Ngengpuikai, Kawlchaw W, Chawntlangpui, Thingfal, Nalbonya, Sumsilui leh Udalthana bakah, Lunglei District-a Khawmawi atang te'n thlai thar hi an phur khawm a. Tuna an phurh khawm hi kar khat tla tur niin, pick up trip 6 a ni a, a vaiin quintal 90 bawr vel a ni.

Lawngtlai District-a vegetable supply chain atan hian sum che vel (revolving fund) atan District Administration atangin Rs 1,50,000/- leh Horticulture Department atangin Rs 1,00,000/-, a vaiin Rs 2,50,000/- hmangin bul tan a ni a. Department hian thingtlanga lo neitute thlai thar chu he sum hmang hian lei khawmin, local task force-te'n veng chhunga hralh turin Horticulture Department atang hian a hlawmin an la chhawng ve leh thin dawn a ni.
 

# CHIEF SECRETARY HOVIN INKHARKHIPNA KALPUI MEKAH MIPUI MAMAWH LEH HARSATNA SAWIHO 

No.3387/2019-2020 

Nimin khan Chief Secretary Pu Lalnunmawia Chuaungo leh Additional Chief Secretary Pu JC Ramthanga te hovin Chief Secretary Conference Hall MINECO ah Sawrkar hotulu pawimawh ten COVID-19 hrileng avanga kharkhipna kalpui mekah nitin mamawh phuhruk tura hmalakna te thlirhovin, harsatna hrang hrang te sukiang turin ruahmanna leh rawtna te an sawiho.

Meeting ah hian mipui nitin mamawh bungraw semdarh (bazar leh supply management) chungchang te, Aizawl khawpui chhunga bawlhhlawh paih chungchang te leh ran chaw leh damdawi dawr inhawn chungchangte sawiin, harsatna an tawh te an sawiho a. Sawrkar in thei rah leh thlai thar semdarhna tur ruahmanna a siam chu a khaihlak loh nana hmalakna te sawikhawm niin he ruahmanna hi tluang taka a kal theih nana Horticulture leh Commerce & Industries Department leh MIZOFED thawhho dan leh Local Level Task Force nen a an thawhho dan te sawilan a ni a. Nitin mamawh phurtu ten awlsam zawka bungrua an chawkluh nan awlsam zawka phalna pekchhuah dan leh Mizoram Distributors' Association (MIDA) ten bungrua an semdarh theih nana rawtna an siam te pawh sawiho niin heng an rawtna te hi bawhzui nise an ti a ni.

 COVID natna veite enkawltute inthuamna PPE leh thildangte March ni 27 a lo thleng chu a bika hetiang hmanrua India pumah Sawrkar Laipuiin a ruahmanna a thawnna hmasa ber niin Chief Minister-in Home Ministry lam a dawrna avanga rang taka phurh theih a nih thu meeting ah hian sawi a ni.

Mizoram a tangkhang state pawn mi chungchangte te pawh he meeting ah hian sawiho niin, hemi chungchang hi Sawrkar Laipui Ministry of Home Affairs thurawnna Advisory anga a theih ang ang tih nise an ti a. Hetiang tangkhang te ei leh in buatsaih turin Sawrkar Laipui thurawn angin State Disaster Response Fund (SDRF) sum chu hetiang a hman phalna NDRF ruahmanna hnuaiah phal a ni tawh thu sawi lan a ni a. DLTF ten LLTF/VLTF te hi hemi chungchangah ruahmanna an siampui theih thu meeting ah sawilan a ni bawk.

Mizo zirlai leh zin mi Mizoram pawna tankhang chungchangah Mizoram pawna Mizoram House ten a theih ang angin chutiang Mizo awm te tanpui turin hriattur an nih tawh thu sawilan niin Mizoram House awm lohna khawpui a Mizo thangkhang te Mizo Welfare Association te lo ngaihven tura ngen an ni tawh thu te sawi lan a ni bawk.

COVID-19 chungchanga State Control Room din chu mipuiin an tangkaipui theih nan puanzar a tul thu sawi a ni a. Control Room ah hian mi tupawh, COVID-19 kaihhnawih harsatna (medical lama harsatna ni lo) tawk apiang chuan inthlahrung lova an harsatna tawh te chu Landline : 0389-2335842 leh 2335837; Mobile : 9366331931 leh E-mail : mzdmr.covid@gmail.com ah te a zawh theih a ni.

Meeting chuan COVID dona kawnga Kohhran hmalakna te, LLTF/VLTF te thahnemngaihna leh inpekna te, Department hrang hrang thawhhona te leh mipuiin thu awi taka Sawrkar ruahmanna leh kaihhruaina an zawm chu ropui leh lawmawm tiin he natna a darh zel loh nan Sawrkar thu leh hla te chu zawm zel turin mipui an ngen bawk a ni.

Meeting ah hian COVID-19 vei tunah enkawl mek in thlawhnaa a chuanpui mi 140 te chu Police in an chhui zui a, contact tracing ngawrh taka an tih thu Police hotu ten an tarlang bawk.

 Meeting ah hian Police, Food, Civil Supplies and Consumer Affairs, Health & Family Welfare, Horticulture, Agriculture, Animal Husbandry & Veterinary Department leh Disaster Management & Rehabilation Department a hotulu leh AMC hotu te an tel a ni

#COVID-19 DONA ATAN CM RELIEF FUND AH MI THAHNEMNGAITEN PUIHNA SUM AN CHHUNGLUT 

No.3386/2019-2020

Vawiin khan Chief Minister's Relief Fund ah COVID-19 avanga harsatna tawk te tanpuina turin mi inphal leh thahnemngaite hnen atangin a hnuai ami ang hian puihna sum hmuh a ni:
 

1) Constable Pu R.K Hmingthansanga, Airport Security a duty chuan CM Relief Fund atan a thla khat hlawh chu Dy.SP Airport Security kaltangin a hlan.

 2) Harley Owners' Group ten Rs. 50,000 an hlan.

#LUNGLEI DC HRIATTIRNA 

No.3385/2019-2020

Lunglei District mipui leh Village Level Task Force -te’n a hnuaia thuchhuah hi zawm turin kan in ngenin kan in hriattir a ni.

1.   Nitin mamawh (essential commodities) phurtu lirthei te khawi hmunah mah dan (block) loh tur an ni a, Sorkar ina dan khaw muan (delay) emaw dan (block) loh tura a tih dangte pawh harsatna siam sak loh tur an ni. Essential commodity phur lirthei khalhtuten kawng laka an mamawh ang ei leh in leh thil dangte VLTF ten a anlo ngaihtuah pui thin beisei leh ngen anni a. An thil phurh dahna tur hmun an thlen hnu pawhin an thil phurh hlan thlakna (unloading) chungchangah harsatna siam sak loh tur a ni.

2.  Mipuiin thlai ei tur an tlakchham lohnan leh thlai thar tur neiten an thawhrah seng chungchanga harsatna an neihloh nan huan/nulneite chu a huho lovin, pakhat emaw/pahnih emaw-a an feh phalsak tur an ni a, silai an keng tur a ni lo. Thlai thar chhuahte chu khaw chhunga lakluh leh hralh chhuahna kawngah mipui pungkhawm lova kalpui a nih theihnan VLTF ten ruahmanna fel tak an siam tur a ni.

3.   Loneituten hna hmanhmawh thlak leh nghah khawmuan theihloh ang chi hnathawh ngaite an thawh theih nan a chunga tarlan ang khian a huho lova feh phalsak tur an ni.

4.   He hriattirna chhuah a nih hun vawiin 28.3.2020-ah hian Lunglei District chhunga khaw tam takah ration buhfai sem tawh leh sem mek a ni a. Reilote-ah District pum huapin sem chhuah a ni dawn a, hun engemaw chen atan chuan buhfai hi mipuiin kan mamawh tawk kan nei theuh dawn ani.

      Chuvangin kan zavaia kan lo him tlan zawk nan mamawhna tak meuh leh loh theihloh thilah lo chuan pawnlama chetvelna leh khaw dang pana veivah hi khap a ni.

     5.  Hriattirna chhuah a nih tawh angin veng dang pana damdawi lei tur emaw, nitin mamawh (essential commodities) lei tur bakah damlohna emaw, thil dang tul bika veivah ngaite chuan an chenna VLTF ah phalna lehkha an la hmasa tur a ni a, VLTF in phalna lehkha a siamsak chu veng dang/ khaw dang VLTF ten lo dan loh tur a ni. VLTF te hian phalna lehkha hi uluk leh fimkhur takin an pe chhuak tur a ni.

# LONEITUTE ACCOUNT AH CHENG 2000 THUN 

No.3384/2019-2020

PM Kissan hnuaiah loneitute hnena pek tura Union Finance Ministry ruahmanna angin nimin March ni 28 khan Mizoram chhunga hamthatna dawngtu (beneficiary) chhungkaw 16,350 te Account ah Rs.2000 theuh thun fel a ni ta. Sumfai thun zat belh khawm hi cheng vaibelchhe 3.27 a ni.

# THINGTLANG MIPUITE HARSATNA TAWH MEK HRIAIN RD DEPARTMENT CHUAN LOCKDOWN CHHUNG PAWHA NI 100 INHLAWH DAN TUR A RUAHMAN 

No.3383/2019-2020

Rural Development Minister Pu Lalruatkima hmalaknain Mizoram Sawrkar Rural Development Department chuan thingtlang mipuite harsatna hriain Lockdown chhung pawha ni 100 inhlawh dan tur ruahmanna a siam.

Inkharkhip a nih avangin a taka hna thawh theih hmain demand lo siam lawk a ni a.  Boruak a pangngai chhoh veleh hna hi a taka thawh tura ruahmanna kalpui mek a ni. Hei hi a dan pangngaiah chuan phal loh a ni chungin mipuite harsatna hriain hetiang hian ruahmanna sawrkar chuan a siam a ni. MGNREGS hnuaia nikhat hlawh chu Rs 211 atangin Rs 225 ah tihsan a ni bawk a. Hei hi kum 2020 April atanga hman nghal tur a ni.  

Ni 100 inhlawhna hi District thenkhat chuan sawrkar kum 2019-20 chhung atan an thawk zo tawh a. Ni 100 la inhlawh ve lo District te pawh tunah hian demand siamtir mek an ni.Central Ministry of Rural Development atangin MGNREGA inhlawhna (Wage) chu March ni 3 khan cheng vaibelchhe 30.22 leh March ni 17-ah cheng vaibelchhe 15.31 Mizoram sawkarin a dawng a. NeFMS (National Electronic Fund Management System) hmangin Job Card holder-te Account ah thun a ni tawh. 

Kum 2020-21 chhung hian Job Card Holders tinin ni 100 theuh an inhlawh theihna tur in Sawrkar laipui chuan 200 lakhs persondays chu Labour Budget atan Mizoram sawrkar tan a remtihsak tawh bawk a ni.

# MIDANG HLATA AWM TURA NGENNA 

No.3382/2019-2020

Tunlai hrileng laka kan him theih nan mitinin kan tih theih vek kan doctor thiam ten an sawi chu, hmun khatah awmho mah ila inhlat deuh taka awm, thut emaw din emaw  a ni. He thil mawlte mitinin kan tih theih bawk si hi Health Minister chuan Mizoram mipui zawng zawngin zawm vek turin min chah a ni. He ngenna hi kan him tlanna tur a nih hriain veng tin leh khaw tinah mipuiin kan zawm theuh theih nan uar leh zuala puang turin Aizawl DC chuan Local leh Village Level Task Force hruaitute zawng zawng a ngen a ni.

#AIZAWL DC CHUAN MIPUI NITIN MAMAWH PHURTE DANGLO TURIN THUPEK A TICHHUAK 

No.3381/2019-2020

Chief Secretary, Govt. of Mizoram leh Chairman, State Executive Committee, State Disaster Management Authority, Mizoram-in Ni 25 March 2020-a Order a tih chhuah No. B-13021/ 103/2020- DMR Dt.25-03-2020 angin mipui nitin mamawh buhfai, thei, thlai, bawnghnute, sa, sangha, ran chaw, chawhmeh chi hrang hrang, eirawngbawlna gas, damdawi leh hospital hmanraw dang phur motor eng chi pawh tlan tir a, an thlenna tur hmun an thlen hma chu dan khawtlai loh tur a ni a. Chuvangin, heng mipui nitin mamawh phur te hi mi tumahin khawiah mah dan khawtlai loh tur a ni, tiin Aizawl DC chuan thupek a tichhuak.

#SIAHA DC HRIATTIRNA

No:85/2020

Covid-19 leng mek avangin State dang atanga rawn kal,hna hrang hrang thawka kan district chhunga awm mek mi tha hnem tak chu an ram lamah kir leh tum in an inbuatsaih mek tih hriat a ni a.

In kal pawhna lama kan harsatna leh he natna inkaichhawn palh hlauthawnawmna te ngaihtuah chuan state pawna kal chhuah hi tun dinhmunah chuan a him lo a ni.

Chuvangin, Ministry of Home Affairs thupek (vide No. 40-3/2020-DM-1 (A) dated 29 March,2020) bawhzuiin leh Regulation 11 (1) (b&d) of The Mizoram Epidemic Diseases (Covid-19) Regulations-2020 tlawh chhanin  Kei Bhupesh Chaudhary,IAS, Deputy Commissioner, Siaha District chuan  hetiang hian thuchhuah ka siam e: 

Chung hnathawktute zawng zawng chu tuna an awmna-ah theuh an la awm chhunzawm tur a ni a. District ramri pela kal chhuah reng reng chu thu leh awm hma zawng khap tlat a ni.