DIPR’S UPDATE ON COVID-19 FOR MIZORAM DT.11.04.2020  TIME: 3:30PM

# KANHMUN AH HRILENG LAKA INVENNA TUR HMANRUA THAWN THLAK A NI

No.267/2020-2021
Vawiin khan Dr.R.Lalthangliana, Health & Family Welfare Minister ruahmanna in Kanhmun, Mamit District a Covid19 hripui leng avanga venhim hna thawktute hman turin hmanraw hrang hrang - masks, kutkawr, kut tihfaina leh a dangte chu Aizawl atanga thawnchhuah a ni.

Bungraw thawnchhuah te chu a hnuai a mi ang hi a ni:

Bleaching Powder - Bag 1
Hand Sanitizer - 10 Litres
Gloves (Rubber kutkawr) - 200 pairs
3 Layer Masks - 50
PPE - 50
N-95 Masks - 100
Protective Goggles - 50
Silpauline - 10

 Health Department chuan heng hmanruate hi Kanhmun PHC Medical Officer, Dr. Malsawmi hnena thleng turin vawiin khan a thawn a ni.

Written by: Pratap Chhetri, MIS, IPRODated: 11^th Apr 20 2:24 PM

# KOLASIB DC-IN COVID-19 CHUNGCHANG AH PRESS MITE KAWM

No.270/2020-2021

Vawiin chawhnu khan Dr H Lalthlangliana, DC Kolasib chuan a pisa ah Kolasib District chhung a Covid-19 hri venna hna kalpui dan chungchang ah press mite a kawm a, hmalakna kal mek leh hmalak chhunzawm dan tur te a sawipui a ni.

Dr H Lalthlangliana chuan Press mite chu mipui te rilru leh ngaihtuahna kaihruaitu pawimawh tak an nih thu sawiin, Covid-19 chungchang a mipuite tangkaipui tur thu thehdarh leh mipui tichiai lo zawng a thuziah a pawimawh thu a sawi a. Tun ang inkharkhip ngawrh tak a kalpui a nih lai a Social media hrang hrang kaltlang a thubelhchian dawllo hmuh tur awm thin chuan mipui a tih chiai bakah thawktute a tih hah phah thin thu a sawi bawk a ni. Kolasib DC chuan Covid-19 hri venna kawng a district chhung a hmalakna pawimawh zualte tarlangin, ramri hrul, state dang nen a inkalpawh theihna hmunah te chuan duty tha tak a siam vek a nih thu te, Vairengte leh Bairabi National Highway a Screening gate siamah te motor leh bungrua tih thianghlimna (sanitised) kalpui a nih thu te leh ramri hrul a task force duty te chu ngaih pawimawh bik an nih thu a sawi a. Phalna la lo a ramri kan a lo let, Task force ten enthlak tur a an dah hran mi 50 vel chu Polytechnic, Thingdawl-ah an awmna tur ruahman a nih thu a sawi bawk a ni.

Dr H Lalthlangliana chuan mipui nitin mamawh phur motor te chu Vairengte leh Bairabi screening point ah uluk tak a endik tawh an nih avangin kawng lakah tih khawtlai loh hram ni thin se a duh thu sawiin huan leh lo a hnathawk tur te pawh, ei leh bar a harsatna lian zawk a awm loh nan, hnathawk tur a kal tir thin a pawimawh thu a sawi bawk. DC chuan ramri hrul a ke a inkalpawh theihna hmun bakah Tlawng lui dung a hmun pawimawh zualah te chuan tlaivar a duty thin a nih thu a sawi a, bialtu MLA Pu K Lalrinliana hmalakna zarah tukin khan Kolasib district chhung a mi harsa zual te hnenah a thlawn a sem tur buhfai bag 400 a lo thlen thu a sawi bawk a ni.

 Vawiin DC pisa a inkawmnaah hian Kolasib district chhung a Mizoram Journalist Association member te leh electronic media lam a thawktute an tel a ni.

Attachment

Written by: Dr. Hmingthanzuala, MIS, DIPRO - KOLASIBDated: 11^th Apr 20 2:50 PM

# ARSA THIANGHLIM HRALH NIH THEIH NAN AH&VETY HOTU TEN AMPFA AR PUAHNA HMUN HRANG HRANG ENDIK

No.265/2020-2021

COVID-19 Lockdown chhung leh a hnu lamah Mizo mipui ten sa thianghlim leh tharlam tak kan ei theih nan Animal Husbandry & Veterinary(AH&Vety) department chuan theih patawp chhuahin hma a la mek a. He hmalakna kal mek zelah hian Ni 9.04.2020 khan Joint Director, Dr Lalchungnunga Pudaite leh Dy Director, Dr Lalrotluanga Sailo te chu hmun hrang hranga ar puahna hmun tlawhin ar an sawngbawl dan a tianghlim tawk leh tawk loh te, ar damlo leh thisa te supply chain a a luh leh luh loh te an endik a ni.

Ar puahna hmunah ar an talh dan te, an puah dan te, an chet thianghlim tawk leh tawk loh te endikin a fel tawk lo lai siam that dan te an hrilh nghal zel a. A tlangpui thu in AMPFA member te ar puahna hmun hi a tha thawkhat hle a, duhthusam ni rih lo mahse tun dinhmun atan chuan a him tawk a hle a ni.

AH&Vety) chuan Ar vulhtu lam All Mizoram Poultry Farmer Association (AMPFA) te leh Local Task Force te thlun zawmin mipui mamawh fel fai taka phuhruk turin facilitator hna a thawk mek a. Ar leh ran dangah thil panngai lo emaw hrileng thar emaw a awm em tih englai pawha thlithlai turin officer leh staff ten Lockdown chhung hian nasa takin an thawk reng a ni. Nitin report la khawmin Chief Secretary te hneah nitin report pek thin a ni.

AMPFA hnuaia arpuahna te hi Animal Husbandry Department Officer te chuan ar puahsa dahna tur food grade packing material department hming chuang an pe zel a. Mipui tan heng department hming chuanna packing material a fun arsa te hi ei atan tun dinhmunah chuan a him tawk a ni. Local Task Force ten an huam chhunga mipui mamawh rawn thenin Animal Husbandry Department in AMPFA ar puahna hmun atanga phur chhuakin veng hrang hrangah a sem thin a. Hei hi ar vulhtute leh mipui te kan him tlanna tur leh Lockdown bawhchhiat a tlem nana ruahman a ni.

 Hetih mek lai hian Animal Husbandry & Veterinary Department in a hriat pui loh arpuahna hmun hrang hrangah a awm a, LTF thenkhat heng ho atanga arsa lei thin an awm a. Arpuahsa, department kal tlang lo leh department packing material hmang loa sem chhuahah harsatna leh sawisel kai a awm anih chuan Animal Husbandry & Veterinary Department chuan mawh a phur lo ang tih mipuite an hriattir nghal a ni.

Written by: Malsawmsanga, MIS, Deputy DirectorDated: 11^th Apr 20 2:12 PM

# CM RELIEF FUND FOR COVID-19 ATAN SUM LUT (11.4.2020, 2:00 P.M)

No.268/2020-2021

COVID-19 hripui leng do tura Chief Minister's Relief Fund a sum chhunglut an pung zel a. Nimin atanga vawiin chawhnu dar 2 thlenga sum hmuhte chu a hnuai a mi ang hi a ni:

1) Zo Zo Filling Station, Sailam - Rs. 1,00,000

2) Futsal Association of Mizoram - Rs. 10,000

3) Centre for Indian Trade Union- Mizoram - Rs. 5,000

 4) Civil Transport Corps Association (Govt. Porters & Transport Sirdars) FCS&CA - Rs. 5,000

Attachment

Written by: Emily Lalrinpuii, MIS, PIO to Chief MinisterDated: 11^th Apr 20 2:27 PM

# COVID-19 KAIHHNAWIHA HEALTH & FAMILY WELFARE DEPARTMENT-IN JANUARY-MARCH, 2020 CHHUNGA AN HMALAKNA

No.269/2020-2021
 

1. Health & Family Welfare Minister Dr. R. Lalthangliana kaihhruaiin January ni 30, 2020 khan COVID-19 chungchang meeting neih a ni a. Hetah hian Health & Family Welfare Department, Civil Aviation & Home Department te an tel a, Task Force din leh Lengpui Airport screening te rel a ni.
2. COVID-19 buaipui tur bik State-level Task Force din a ni a. District-level Task force leh Village level Task Force Mizoram pumah din zui niin, SNO(IDSP) chu       State Nodal Officer - COVID-19 atan ruat a ni.
3. Thlawhtheihna hmanga Mizorama rawn lut te leh ramri kan a lo lut te endik (screen) vek an ni a. He screening hi Medical Team, Police, Local Level Task Force leh tlawmngai pawl ten anmahni hmazawn theuh ah an ti thin a, Lengpui Airport leh ramri-a checkpoint hrang hranga screening tih tan ni chu a hnuaiah hian tarlan a ni.

            4^th February, 2020                  - Zokhawthar

            6^th February, 2020                  - Lengpui Airport

            10^th February, 2020                - Kawrpuichhuah, Tlabung

            12^th February, 2020                - Vairengte & Bairabi

            12^th February, 2020                - Khawkawn

            19^th February, 2020                - Kanhmun

Heng a chunga screening tihna hmun bakah hian, ramri khar anih hma chuan heng – Archhung, Sangau, Lungkawlh, Vawmbuk, Saisihchhuah, sailulak leh siminisora-ah te pawh screening neih thin a ni.

1. March ni 24, 2020 khan Mizorama COVID-19 positive case hmasa ber hmuhchhuah a ni.
2. Health Department hnuaia thawktu zawng zawng te a tul dan anga training pek mek zel a ni a,Video Conferencing pawh vawi engemaw zat neih a ni. Health Minister hovin vawi duailo meeting neih ani a, MKHC, CYMA, leh Mizo Zirlai Pawl       te leh Local Council Association te pawh meeting neihpui thin an ni. Health Department hnuaia he hripui dona kawnga tha thawhtute leh Service Association aiawhte review meeting te pawh neihpui thin a ni a.
3. Mizoram Epidemic (Covid-19)Regulations 2020 duan a ni a, sawrkarin a pawmpui hnu-ah March ni 17, 2020 khan Mizoram Gazette-ah chhuah a ni. Hetah hian temporary regulations for prevention leh containment of COVID-19 pawh a tel a ni.
4. NHM Call Centre No. 102 chu COVID-19 Helpline atan ruahman nghal niin,  phone number 0389-2323336/2318336 pawh call centre-ah dah ani bawk. Heta  duty tur te hi DHS conference hall-ah training pek vek an ni a, he call centre bik-ah hian  a inchhawkin 24x7 an duty char char a ni. He call centre hi NHM hnuaia MBBS doctors te a tul hun atan thlunzawm an ni a. Health Minister hmalaknain rilru lam doctor thiam bik leh medicine specialist te pawh he call centre nen hian thlunzawm an ni.

1. Zoram Medical College (ZMC)  chu COVID-19 kaihhnawih damlote enkawlna tur bik atan ruat a ni a, ward-ah hian khum 134 leh ICU-ah khum 29 a awm mek a ni.
2. State chhunga sawrkar damdawiin hrang hrangah Isolation Ward buatsaih vek a ni a, tunah hian khum 479 a awm mek. Hemi bakah hian. Quarantine (khunghran)te tan khum 1443 buatsaih a ni. Hospital thenkhatte hi thuam tha-in Covid Care Centres (CCCs), DCHC (District Covid Health Centres) and Dedicated Covid Hospital (DCH) atan buatsaih tum mek a ni.
3. COVID-19 sample test tur te hi an chenna inah emaw hospitalah emaw a remchan dan anga lak thin a ni a, sample te hi ZMC-ah test theih a nih hma chuan Kolkata, Guwahati leh Silchar -ah thawn thin an ni. 
4. Health Minister Dr. R. Lalthangliana hmalakna-in RT PCR COVID-19  testing Laboratory neih theih dan ngaihtuahtu sub-committee din a ni a, ICMR recognition neih a nih hnuah ni April ni 7, 2020 atangin COVID-19 test tih tan a ni.
5. District hrang hrangah a tulna hmun apiangah health department staff te hian screening, khunghran ho endik, khualzin tangkhang tlawh leh endik an ti thin a ni.
6. COVID-19 positive case  hmuhchhuah takin a contact zawng zawng te leh ramdang atanga lo haw zawng zawng te, police nen tangkawpin chhuichhuah vek an ni a. Thurawn pek nghal an ni.
7. Health Minister kaihhruaina hnuaiah, a chunga tarlante bakah committee/units/teams hrang hrang din a hnuai a tarlan ang hian din an ni:

• Health Family Welfare Board Vice Chairman Dr. Z.R. Thiamsanga kaihhruaina hnuaiah Medical Operational Team din a ni.

• Mental Health on COVID-19 Team

• Physicians group on COVID-19

• Committee on Psychological and Social Guidance

• Sub-Committee on Dead Body Management and its related issues

Directorate of Health Services hnuaiah a hnuaia  Committee/Unit/Team hrang hrangte hi dina  ni :

• Working Group Committee On COVID-19 

• State IDSP and COVID-19 Portal Unit

• COVID-19 IEC & Planning cell

• State Health Directorate COVID-19 Co-ordination Unit

• State Data Management Unit

• State Contact Tracing Management Unit

• State Sample Collection and Transport Management Unit

• State Sample Packaging and Storage Management Unit

• State Isolation Management Unit

• State Containment Management Unit

• State Surveillance Management Unit

• Logistics & Supply Management Unit

• Sub-committee on Case Management Protocol

• Sub-Committee on Infection Management Protocol

1. Mizoram state COVID-19 dinhmun nitina tarlanna “daily bulletin” chu March ni 17, 2020 atang khan tih chhuah tan niin, I&PR department-ah mipuite hriattura thehdarh turin thawn thin a ni.
2.  Mizoram Kohhran Hruaitu Committee-ah awareness campaign on COVID-19 buatsaih tura ngenna siam a ni.
3. Mizoram Kohhran Hruaitu Committee-ah mipui pun khawm buatsaih lo/ti tlem tura ngenna siam a ni.
4. Mizoram sawrkar department zawng zawngah office hmuna kut silna hmun, tui leh sahbawn leh hand sanitizer dah vek tura ngenna leh thurawn pek vek an ni.
5. In lama khunghran te awm dan tur inzirtirna/guidelines mizo tawnga lehlin chu tih chhuah a ni.
6. Hmai tuamna (mask) hman dan dik inzirtirna/kaihhruaina mizo tawnga tih chhuah a ni. 
7. Lengpui Airport leh ramri-a check point a hman tur, mahni in report na form buatsaih a ni. 
8. COVID-19 chungchanga mipui te tana thurawn pawimawh chi hrang hrang tih chhuah a ni.
9. COVID-19 chungchang zin mite hriat tur thurawn tih chhuah a ni.
10. Sawrkar damdawiin zawng zawngah damlo kan hun ti tlem tura thurawn pek a ni.
11. Picnic spot, gym leh intihhlimna hmun te chawl lailawk tura thurawn siam a ni.
12. COVID-19 chungchang leaflet siam a ni a, District tinah thawn chhuah a ni.
13.  COVID-19 chungchang mipuite zirtirna tur hoarding siam niin, Aizawl Municipal Corporation  in man chawilova tar phalna a pek hnu ah Aizawl khawpui lun laiah te tar a ni. 
14. WHO-in COVID-19 zirtirna a siam video clip chu mizo tawnga letlingin, local cable operator-ah te pek a ni. A.I.R, Aizawl Station in COVID-19 chungchanga mipui zirtirna tur atana Health department thuchhuah a thlawnin a puang thin a ni.
15. Sports and Youth Services department buatsaih Purushkar Award Ceremony-a zawm tur       COVID-19 darh tur venna thurawn pek a ni.  
16. Local Task Force te hmalakna leh tih tur te buatsaih a ni.
17. Ngenna leh COVID-19 chungchang thurawn recreational/ home hrang hrang leh Jail te pek a ni.
18. The Dead Body Management Committee and its related issues sub-committee, CYMA leh MKHC te telna chuan COVID-19 vanga thi te sawngbawl dan chu, MoHFW, GoI buatsaih chu pawmin, zawm a remtih hnu ah  hriattirna pek chhuah nghal a ni.
19. “Role of Frontline Workers in prevention and management of coronavirus” MoHFW, GOI siam chu mizo tawnga lehlin a ni a, print tura pek a ni.
20.  “Standard Practices of Infection Control and Prevention for House-keeping and Support Staff” video clip NHSRC, GoI siam chu Mizo tawnga siam a ni a, approval nghah mek a ni.
21. Social Distancing chungchang General Secretary, WHO thu sawi video chu Mizo tawnga siam niin, approval nghah mek a ni.
22. COVID-19 chungchanga Ambulance Driver-te hriat tur pawimawh mizo tawnga lehlin a ni. 
23. Sodium Hypochlorite siam dan kaihhruaina mizo tawnga lehlin a ni.
24.  Tunge COVID-19 test ngai tih poster chu mizo tawnga lehlin a ni.  

Procurement

Health Minister-in Union Health Secretary ah COVID-19 dona atana Mizoram mamawhte lehkha ziakin a thlen a, hmanraw mamawh ang ang te pawh pek kan ni tawh, Central Health Minister nen Video Conference a an lo sawidun tawh angin Central Health Minister hnenah Mizoram in COVID-19 dona atana mamawh hrang hrang te ziakin a thlen bawk a, COVID-19 atan mai bakah Mizoram mamawh pawimawh tak tak a thlen tel bawk a ni.

Disaster Management & Rehabilitation Department atanga pawisa ruahman atangin Quarantine, sample collection leh screening atana senso tur Rs. 1,48,70,000/- bakah Checking, Screening leh Contact Tracing atana senso tur Rs. 56,40,000/-, COVID-19 do na atana bungraw tul hrang hrang lei na tur Rs. 99,95,200/- hmangin heng hmanraw hrang hrang :- 3 layer Mask, Tongue Depressor, N95 mask, VTM, Thermocol Box, Deep Freezer, Sample transport, Gloves, PPE, Hand Sanitizer, Infrared Thermal Sensor, Silvicide Disinfectant te hi rang taka lakkhawm nghal an ni a. Heng bungrua sawi tak te bakah hian damdawi leh bungraw dang tam tak mamawh a la awm a. State Fund atanga Finance Department in sum Health department a pek tawh sa atangin engemaw zat lei belh turin ruahmanna siam tawh a ni. Damdawi leh inenkawlna bakah COVID-19 dona atana tul dangte pawh sorkarah thlen nghal zel a ni bawk.

Written by: Andrew H Lalremruata, MIS, IPRODated: 11^th Apr 20 2:37 PM

# NITIN MAMAWH (ESSENTIAL COMMODITIES) MIZORAMA LO LUT TE (11.4.2020)

Mipuite nitin mamawh (Essential Commodities) phur, April ni 9, 2020 tlai dar 5 atanga April ni 10 2020 tlai dar 6 thlenga Vairengte Supply Check-gate a in report te -

DT.9.4.2020 (5:00PM) - 10.4.2020 (6:00PM) VAIRENGTE SUPPLY CHECK GATE PALTLANG TE BUNGRUA

Written by: Pratap Chhetri, MIS, IPRODated: 11^th Apr 20 12:42 PM
 

# MIZORAMA POL LEH LPG DINHMUN (11.4.2020)

Vawiin thlenga report hmuh theih ah IOC Depot, Vairengte atanga POL pekchhuah zat leh Borkhola Assam atanga LPG lo lut, Vairengte a report zat chu a hnuai ami ang hian a ni:

POL - 10.4.2020 chhunga IOCDepot,Vairengte atanga Oil pekchhuah a awm lo 

LPG REPORT  -  10.4.20 6:30 AM to 11.4.20. 6:30 AM chhunga Borkhola Assam atanga LPG lo lut Vairengte a report te

#MINISTER PU K LALRINLIANA'N A BIAL CHHUNG A MAMAWH TE EITUR BUHFAI BAG 400 CHAH THLENG

Tukin khan Food, Civil Supplies & Consumer Affairs Department Minister Pu K Lalrinliana, Kolasib Assembly Constituency bialtu MLA ni bawk chuan Covid-19 hri leng darh tur ven nana inkharkhipna kalpui mek avang a bial chhung a chhuanchham leh mamawh zual te hnen a sem tur buhfai bag 400 a chah thleng.

Buhfai hi quintal 200 chah thlen niin Kolasib DC Dr H Lalthlangliana leh DC Office, Kolasib a hotu thenkhat ten an lo dawngsawng a, Kolasib chhung a chhuanchham te leh a mamawh zual te tan a thlawn a sem tur a ruahman tur a ni. Buhfai chah thlen te hi AMFU building, Project veng, Kolasibah dahluh rih a ni.

# TV ATANGIN ZIRTIRNA PEK A NI DAWN TA

No. 261/2020-2021

Covid-19 leng avangin India ram pumah Lockdown hman mek a ni a, School luh hunah  pawh Zirlaite an luh theih tak loh avangin School Education Department chuan TV hmanga zirtirna pek chhuah dan tur ruahmanna an siam.

Doordarshan Kendra Aizawl-ah Thawhtanni atanga Inrinni thlengin tlai dar 3:05 apiangin darkar chanve chhung naupangte zirtirna tur  tihchhuah thin a ni dawn a. Ni 13.4.2020 Thawhtanni atangin tihchhuah a ni ang. 

A bul tan nan Class X zirlai Science leh Mathematics zirtirna tihchhuah a ni ang. Zirlaite chu hemi hunah hian DDK Aizawl lo thlir a, note book leh pen nen inchhawp a, a pawimawh lai apiang lo chhinchhiah ve zel tura beisei an ni. 

Lockdown chhung hi hri leng a reh fel hma chu pawhsei zel theih anih avangin zirlaiten he hun hi ngai pawimawh tur leh, nu leh pa te pawhin lo ngaihven pui turin Department hotute chuan an ngen a ni.

Written by: F. Lalfakzuala, MIS, Joint DirectorDated: 10^th Apr 20 11:17 PM

# DR. K. BEICHHUA, HON’BLE MINISTER IN CIVIL HOSPITAL SIAHA LEH KHAWCHHUNGA COVID-19 TASK FORCE DUTY POST TE A FANGKUAL

No.266/2020-2021

Tukin chawhma dar 7:00Am khan a bial fanga cham mek Dr. K. Beichhua, Hon’ble Minister leh Siaha Bialtu chuan Civil Hospital, Siaha tlawh in, COVID-19 laka invenna leh ruahmanna hrang hrangte a hmunah a enfiah.

Minister hian Hospital a COVID-19 thleng palh thei laka inven dan, inenkawl zuina leh ruahmanna hrang hrangte chu uluk takin a enfiah a, CMO leh Medical Superintendent ten an hmalakna leh ruahmanna te lo hrilfiahin hmalak la ngaite an lo thlen nghal a ni. Duhthusam angin ruahmanna la awm thei lo mahse tun dinhmunah Siaha Civil Hospital inbuatsaihna leh ruahmanna hi tha tawk hle a ngaih a ni. Hospital-ah hian COVID-19 Casualty, 20 Bedded- Isolation Ward, 5 Bedded -ICU leh Preparation & Changing Room te siam fel vek tawh a ni.

Civil Hospital a tlawh zawh hian Minister chuan Siaha khawchhunga veng hrang hranga COVID-19 Local Task Forces Duty Post zawng zawng Minister hian a tlawhchhuak nghal vek bawk a ni.

Minister chuan Task Force Duty te chu an thawhrimna leh inpekna ropui tak avangin lawmthu a hrilh hlawm a, tun ang zela inthladah miah lova he rawngbawl hna hi thawk chhunzawm zel turin a chah hlawm a ni.

Task Force Duty Post hrang hrangah thusawina nei zelin Minister chuan, “He hri hlauhawm tak hi lo thleng thut a nih avangin inven lawk a ruahmanna lo siam lawk thei a ni lova. Chuvangin sawrkar, NGO’s leh VC ten tlachawpa rilru fim tak leh thukhat vuana rem kan ruat hi kan hmalak theihna awmchhun a ni ber mai a, nang leh kei intih lovin leh Political Party inthliarna awm miah lova thawktlang tur kan ni.He hri hian khawvel ram hausa leh Health Care nei tha ber berte ram pawh a dim lova, vei tam leh thihpui tam ber an ni zawk zel tih kan hria. Kan ram hi min rawn luhchilh tak tak chuan kan dinhmun tur hi suangtuah ngam pawh a ni lo. Chuvangin kan himna awmchhun chu thuawi taka inven a, Task Force te inthladah miah lova mahni veng theuh venhim hnathawk hi a ni.” a ti.

Minister chuan sawi chhunzawmin, “He hri lakah hian tih tur pawimawh em em pahnih kan nei a. Pakhatna-ah chuan fimkhur taka theihtawp chhuaha inven a ni a, pahnihna- ah chuan khawvel Economy tlusawp vek tur hmachhawn mai thei leh tam mai thei dinhmunah kan ding thuai dawn a, hemi laka kan him theihnan lo leh huan lamah kuthnathawh i uar ang u. State dang atanga Supply kan hmu a tawp hunah chhuanchham a kan awm loh nan veng tin leh khaw tinte hetiang lamah ruahmanna siam thuai ang u. Kan hun tawng mek hian eng chen nge a awh dawn kan hre lo, chuvangin Task Force leh Sawrkar chuan Management thiam takin kan kalpui a tul, Kan essential Commodities neih ang ang te pawh renchem taka kan hman thiam a ngai hle ang. Mi harsa zualte dinhmun en thlithlai reng u la, inthlahrung lovin kei, CEM leh DC te pawh min hrilh zel mai dawn ni a. Lo thlaphang lutuk lo u la, CM Relief fund te pawh a lo la thleng dawn, Disaster Management fund te pawh kan dil belh zel ang, a tul chuan kan MLA fund te pawh kan hmang vek mai ang.Amaherawh chu engtianga rei nge kan inkharkhip dawn tih a la hriat si loh avangin, Sawrkar chuan ei leh barah inrenchem taka kan neih sa te kan hmanthiam a duh hle a, tanpuina pek kawngah pawh vawikhata KI sang taka rik nghal bawrh bawrh ai chuan inremchem takin, kan hmalam huna mamawhna sang tak awm theih thlir renga chet hi a duhdan a ni.” a ti bawk.

Minister hian a bial a fan lawk theih lohna chhan sawiin, Aizawl leh State danga kan District mi zirlai te, damlohna avanga mangang taka awm mek te leh hnathawk mi tam tak tangkhang leh harsatna tawk mek te buaipui reng an tul thu a sawi a. Aizawl atanga Siaha inkarah Bus 13 lai an tlantir tawh thu leh hmun hrang hrang mite pawh thei ang anga a buapui ve zel thu sawiin, Mizoram pum huap ang pawha hmalakna tur a kovah tam tak a innghah ve avanga a bial a tlawh lawk thei lo thu a sawi a, bial mipuite hriatthiamna a ngen nghal bawk a ni.

 Minister hi Pu N. Zakhai, CEM MADC; Pu Bhupesh Chaudhary, DC Siaha; Pu HC. Lalmalsawma Zasai, Opposition Leader, MADC; Dr. C.Hniecho, CMO Siaha; Dr. C. Lalrosanga, Medical Superintendent, Civil Hospital, Pu.N.Vabeiratlua, I&PRO, Pu Lalthakima, SDC leh Pu Lalrosanga , Chairman, Joint VC te’n an tawiawm a, Task Force Duty Post tin te chu tanpuina sum a hlan theuh bawk.

Attachment

Written by: N. Vabeiratlua, MIS, DIPRO - SIAHADated: 11^th Apr 20 2:20 PM

# BIALTU MLA IN LENGTENG CONSTITUENCY CHHUNGA COVID-19 DONA KAWNGA HMALAKNATE ENDIK

No.271/2020-2021

Ramri hrula awm Lengteng Constituency chhunga COVID-19 darh zel tur venna kawnga hmalaknate chu Pu L.Thangmawia, Bialtu MLA chuan a hmunah kalin a endik.

Ni 10.4.2020 khan a bial chhung mi Manipur-a lehkhazira awm mi 8 (mipa 6 leh hmeichhia 2), Manipura an awmna Hostel kharsak an nih avanga hun eng emaw chen tangkhang, mahni ram lam pana ke-a risk la a Mimbung khawdai thleng rawn kal te ngaihven turin a kal a.MLA chuan Mimbung khua a thlenin ramri khauh taka dan chah a nih avangin heng zirlaite hian Mizoram an lo lut thei lo tih leh Mimbung khaw daiah zan khat heng zirlaite hi an lo riak tawh bawk tih a hmunah a hmu a.MLA hian heng mite dinhmun khirh zia a hmuhin sorkar thuneitute hnenah thil awmdan hrilh pahin an tan hian Mizorama lo luh a ngensak nghal a.Hemi hnu hian sorkar thuneitute remruatna angin Mimbung khuaa quarantine na hmun tura ruahmanah an zavai hian dah an ni ta a ni.

Hemi ni vek hian Pu L.Thangmawia chuan a bial chhunga International border pathum: Mimbung, Hrianghmun leh Teikhanga Police leh VLTF duty te tlawh nghalin Manipur border Khawkawna duty na hmun pawh a tlawh nghal a. Heng border post te khauh taka an lo venhim avangin vengtute hnenah lawmthu a hrilh a. Heng post an venhim that leh that loh hian Mizoram Covid 19 laka a him leh him loh thui tak a hril avangin, ngawrh taka lo ven chhunzawm turin venhim hna thawktute a ngen nghal bawk a. Duty te hnenah hian Kutkawr(glove), mask leh hand sanitizer te a pe theuh bawk a ni.

Ni 11.4.2020 (inrinni) khan a bial chhung khaw hrang hranga VLTF duty te a tlawh kual leh nghal a. VLTF te hnenah hian glove, mask leh hand sanitizer te pe in an khawtlang leh Mizoram him nana rim taka an lo thawh tawh na ah lawmthu a hrilh a. Thahnemngai taka thawk chhunzawm zel turin a ngen nghal bawk a ni. Ngopa khawchhuak Pu F.Kapsanga te chhungkuain buhfai leh chawhmeh thahnem tak VLTF te kaltlanga Ngopa mipuite hnena an pe chu entawn tlak a tih thu a sawi a. "An ni tihdan ang hian neinung zawk ten an pian leh murna khua te tanpui nachang hre ve theuh se, sorkar leh VLTF te phurrit nasa takin a chhawk dawn a ni," a ti.

 Pu L Thangmawia hian a bial chhunga damdawiin hrang hrang ah PPE full set a sem nghal a, Covid 19 vei awm palh thuta damdawiin hrang hrang te dinhmun Medical Officer te a sawipui nghal bawk a. Dulte Village Level Task Force in an khuaa balhhla chhe mai tur MLA kaltlanga hralhsak tura an ngenna anga Aizawl Mission Vengthlang LLTF ten an lo hralhsakna sum Rs 61,500 chu Dulte VLTF te kutah a hlan nghal bawk a ni. Lengteng bial chhung khaw hrang hrang leh border post a tlawh na ah hian Saitual District thuneitute hmalakna a that em avangin lawmthu a sawi a. Heng thuneitute hmalakna a hlawhtlin theih nana rim taka thawktu officer leh staff te, Police te leh VLTF zawng zawng te hnenah lawmthu a sawi a. Hrileng laka kan him tlan theih nan Sawrkar thu leh VLTF te thu tha taka zawm chhunzawm chu thil pawimawh hmasa a ni a ti.

Written by: Malsawmsanga, MIS, Deputy DirectorDated: 11^th Apr 20 2:56 PM