DIPR’S UPDATE ON COVID-19 FOR MIZORAM

DT.31.03.2020  TIME: 6:00PM

# NITIN MAMAWH (ESSENTIAL COMMODITIES) MIZORAMA LO LUT TE (31.3.2020)

N0.3423/2019-2020

Mipuite nitin mamawh (Essential Commodities) phur, March ni 29, 2020 tlai dar 5 atanga March ni 30 2020 tlai dar 6 thlenga Vairengte Supply Check-gate a in report te -

DT. 29.3.2020.5:00 PM - 30.3.2020. 5:00 PM INKARA VAIRENGTE SUPPLY CHECK GATE PALTLANG TE BUNGRUA

# MIZORAMA POL LEH LPG DINHMUN (31.3.2020)

No.3424/2019-2020 

Vawiin thlenga report hmuh theih ah IOC Depot, Vairengte atanga POL pekchhuah zat leh Borkhola Assam atanga LPG lo lut, Vairengte a report zat chu a hnuai ami ang hian a ni:

POL 30.3.2020 chhunga  IOC Depot, Vairengte atanga  Oil pekchhuah 

 LPG REPORT 30.3.20 6:30 am to 31.3.20. 6:30 am.  chhunga Borkhola Assam atanga LPG lo lut Vairente a report te

# VEGETABLE SUPPLY CHAIN CHUNGCHANGA HMALAK DAN KIMCHANG

No.3435/2019-2020

Tunlai Khawvel pumpuia hrileng COVID-19 avangin Mizoramah ei leh bar zawnna kawngah leh mipui ten chawhmeh tur thlai leh anhnah lama harsatna an tawh nasat avangin Mizoram Sawrkar chuan theihtawp chhuahin hma nasa takin a la a. Hemi chungchang hi Vanglaini leh Aizawl Post 28.03.2020 chhuakah hian mimal hma lakna ang veka tarlan a ni a, thil awmzia kimchang zawk chu hetiang hi a ni.

Government of India- in COVID-19 laka inven nana Dt. 25.03.2020 atanga ni 21 chhung Lock Down kalpui tura ni 24.03.202 a a puan tak avang khan Zoram mipuiin ei tur thlai leh anhnah lamte an tlakchham lohna turin leh thlai chingtu ten an thlai chinte chhe mai thei dinhmuna ding an hralh a ngai bawk si a, hemi chungchang ngaihtuah hian Chief Minister Pu Zoramthanga ruahmanna in Prof. F. Lalnunmawia, MLA, Vice Chairman, Horticulture Development Board hovin CMO-ah ni 25.03.2020 3:00 pm ah meeting neih nghal a ni. Meeting hian Central Sawrkar in Lock Down kalpuina tura Guideline 4(a) anga exemption a siam angin thei leh thlaite lakluh dan leh mipui hnena pek chhuah dan tur ngaihtuah nghal a ni. Dt. 26.03.2020 khan Vegetable Supply Chain siam dan tur Addl. Chief Secretary, Pu J.C. Ramthanga hovin CMO ah Horticulture Department hotute nen Meeting neih leh a ni. He meeting hian Horticulture Department chu Nodal Department nise, MIZOFED leh Commerce & Industries Department te nen tang hovin Vegetable Supply Chain siam nise tiin a rel a. Horticulture Department in Mizoram thlai awm thei leh a zat te an survey in an report ang a, Commerce & Industries Department -in a rate bituk puiin, MIZOFED-in a lei leh hralhah mawh an phur ang tiin rel a ni. Hemi bawhzui hian a tuk Dt. 26.03.2020 ah Addl. Chief Secretary Office Chamber-ah Commerce & Industries Department, MIZOFED te telin meeting neih a bawhzui nghal a ni. Thlai thar thlengkhawm pek chhuah lehna tur Local Task Force te nen tangrualin Health Department in inven dan tur a ruahman Guideline zulzuia kal nise tiin a rel a. Hemi Meeting Minute bawhzui hian GAD chuan No B. 14015/50/2020-GAD hmangin ni 26.03.2020 vek hian Order a chhuah nghal a. Vegetable Supply Chain hi District tinah mumal taka kalpui a nih theih nan DC Chairman- na hnuaiah District Level Task Force ten mahni District theuhah Horticulture Department leh Local Level Task Force te nen ruahmanna an siam ang a, Horticulture Department hi Nodal Department a nih angin Zokhaw lam atanga thlaithar lakluh tur a ngaihtuah ang a, a hralhna tur rate chungchang leh sem chhuah dan turah Commerce & Industries, FCS & CA, MIZOFED leh Local Level Task Force te nen DC hriatpuina in ruahmanna a siam thin ang tiin GAD hian Order a chhuah a ni. Tin, Aizawl District Magistrate pawhin Vide No. C. 16011/298/2020-DC(A) hmangin Ni 27.03.2020 ah Order a chhuah nghal bawk a ni.

Hemi ang hian Horticulture Director hovin chak taka hma lak a ni a. DHO hrang hrang ten Aizawl khawpui chhung chawm turin an bial chhunga thlai thar Aizawla thawn luh theih zat an report nghal vek a. Serchhip Mat phai/ Zawlpui zauva chin Zikhlum, Bawkbawn, Tomato, etc. leh thlai chi hrang hrang hmun dangte atangin 300 Qtls. chuang chu 28.03.2020 ah Aizawl a thleng nghal a. Horticulture Department, Commerce & Industries Department leh MIZOFED thu khawmin, he hun harsat lai, farmers ten hna an thawh hleih theih loh lai hian an thlai tharte chhe lo leh a man chungchangah man zawka an tel theihna tura ngaihtuahna sengin, farmers te thatpui theihna ngei turin thlai hrang hrang man an bithliah nghal a. Heng Farmers-te thlai lo thleng hi MIZOFED-in a man alo pe nghal zel a ni.

Hemi bawhzui hian thlai chingtute pawhin theih tawp an chhuah a. Zokhua hmun hrang hrang atangin thlai thar lakluh nghal a ni a, Serchhip Division atangin 18 Trips, Aizawl leh a chhehvel atangin Trip 8 alo lut bawk. Dt. 28.03.2020 hian a thawh khatna a farmers ten an thlai hralhna atanga an dawn zawng chu Rs. 14.55 lakh ani. Farmer-te hian hun pangngaia Bazara an hralh aiin a hlawkna an tel tam zawk a ni. Tin, ar vulhtute mangangin Horticulture Department an ngen angin Addl. Chief Secretary hova rel hnuah hralh chhuah sak a ni bawk. Hun reilote chhung hian Aizawl khawpui veng hrang hrang 26 zetah a mamawhte tan thlai leh arsa a pe hman a ni. Mizoram Sawrkar ruahman anga thlaithar lei leh hralh chungchang hi MIZOFED kut a dah anih avangin hralh chhuah lamah Horticulture Department in mawh a phur lo a ni.

Mizoram chhunga thlai thar lakkhawmte hi dahthatna mai a awmloh avangin Horticulture Department in Sairang Cold Chain sak tharah pawh Chief Minister hma laknain P&E Department- in Transformer bun tumin hma an la nghal a. Tun kar chhunga zawhfel tum a ni.

COVID-19 hripui leng avangin mipui ten chaw tha an mamawh tih hriain Department chuan tan ala zel a. A tul dan angin Aizawl khawpui tan thlaitharte lalut turin nasa takin hma ala a, tun ang ṭhal lai pawh a hetiang thlai tam tak Mizoram chhung ngei ami lakluh tur a awm hi mipui tan pawh a thlamuan thlak hle a ni. He hun harsaah hian Horticulture Development Board Vice Chairman Prof. F. Lalnunmawia leh Addl. Chief Secretary, Horticulture Pu J.C. Ramthanga, IAS ten he Vegetable Supply Chain kal mek hi an vil reng a ni.

# CHIEF MINISTER IN A BIAL CHHUNGA MI HARSATE TAN BUHFAI A SEM

No.3437/2019-2020

Chief Minister Pu Zoramthanga chuan a bial Aizawl East-I chhung veng hrang hranga mi harsa leh mamawh zualte hnenah buhfai, hand sanitizer leh masks a sem.

Buhfai sem hi a vaiin bag 170 a ni a. Local Level Task Force on COVID-19 te kutah hlan a hi. CM Pu Zoramthanga hian 25.3.2020 khan a bial chhunga Local Level Task Force hrang hrang 12 hnenah puih nan  sum Rs. 1,20,000 a lo pe tawh bawk a ni.

# INKHARKHIPNA KALPUI MEKAH BNSL IN VALIDITY EXTENSION A THLAWNIN PE DAWN

No.3435/2019-2020

Deputy General Manager(Marketing), NE-I Circle, BSNL Shillong atanga lehkha dawn danin BSNL mobile service hmangtute inkharkhipna avanga March ni 22, 2020 atanga inkharkhipna kalpui chhunga  validity extension tinung (recharge) thei lo zawng zawng ten call an dawn chhunzawm zel thei nan, hetiang subscriber zawng zawng tan April ni 20, 2020 thlengin a thlawnin  an validity BSNL in a pawhsei sak dawn a. Inkharkhipna chhunga zero balance nei tan pawh talk time cheng 10 man hu zel a thlawnin  an pe dawn bawk a ni.

# CM HMALAKNA VEGETABLE SUPPLY CHAIN HNUAIAH THLAI THAR QUINTALS 500 CHUANG AIZAWLAH THAWN THLA

No.3431/2019-2020

Chief Minister Pu Zoramthanga hmalakna-in Vegetable Supply Chain hnuaiah a tum 2-na atan Serchhip Zawlpui leh a chhehvel zau hrang hrang atanga tharchhuah thlai 500 Quintals chuang chu nimin khan Aizawlah phurh thlak a ni leh ta.

Covid-19 hrileng vanga ram pumin Lockdown a kalpui lai leh Aizawl-a Curfew puan a nih tak avang hian mipuiten thlai tharhlam ei tur an nei thei ta lova. Hetihlai hian thlai chingtute pawh an thlai thar hralhna a awm takloh avangin an mangang hle a. Hei hi hriain Chief Minister Pu Zoramthanga chuan Vegetable Supply Chain  hi a duang ta a ni. He programme hnuaiah hian a tum khat nan ni 27.03.2020 khan thlai tharte thawn thlak a lo ni tawh a.  Nimin khan a thawh hnihna nei leh  a ni a. Zikhlum 254.34 qtls, Bawkbawn 250.58 qtls, Tomato 11.54 qtls, Vaimim Kawm 1001, Dhania tel 55, leh Anthur tel 12 te lakkhawm leh a ni. Heng thlai thar  te hi 207 Pickup truck 22 leh 407 truck pathum hmanga phurhkhawm niin  Serchhip Bazarah buk fela challan te siam a nih hnuah Aizawl lamah phurh thlak  leh a ni ta a ni.

Vegetable Supply Chain Nodal Department, Horticulture Department chuan hei hi buaipuiin MIZOFED leh Commerce & Industries Department ten Local Level Task Force te hnenah an hlan chhawng leh a. Chu chu an niin a tul angin mipui hnenah an pechhuak leh a ni.

Zawlpui leh a chhehvel zau ah hian thlasik thlai hi chhungkaw 120 vel an ching thin a, kum khata an tharchhuah hi Rs. 400 Lakh man te a chuang thei thin a ni. Zawlpui leh a chhehvel a thlaichingtute chuan Mizoram Chief Minister-in ruahmanna tha tak a siam hi lawmawm an tih thu an sawi bawk a ni.

# AIZAWL DC THUPEK

No.3430/2019-2020

Aizawl Municipal Corporation (AMC) huam chhunga pawn chhuah khapna Aizawl DC leh District Magistrate ni bawk in Order Memo No. J.13013/7/2016-DC(A) dt 25.03.2020 a tichhuak tawh a curfew in a huam loh zinga heng a hnuai ami te hi telh belh an ni.

1.Excise & Narcotics Department a thawkte

2.AH & Vety. Department hnuaia Dispensary a thawkte

3.Environment, Forest and Climate Change Department hnuaia thawk para C(f) of GOI, Ministry of Home Affairs Order No. 40-3/2020-DM-I(A) Dt. 25-03-2020 in a sawite.

# POL DEALER TE LEH LPG DISTRIBUTOR TE HNENA SUPPLY DEPARTMENT NGENNA

No. 3438/2019-2020

Food, Civil Supplies & Consumer Affairs Department chuan tui alhthei leh eirawngbawlna gas te chatlak lova mipuite te hnenah sem leh pek anih thei nan a hnuaia ami angin ngenna an siam:

1.      Pump/Filling Station ah POL chatlak  a awm lohna turin POL indent siam zung zung nise. LPG Distributor zawng zawng ten LPG chatlak/nghei a awm lohna turin IOCL ah a tul angin indent siam ran thin nise. Hemi kawngah harsatna a awm anih chuan bialtu DCSO/Department thuneitute hriattir vat zel nise.

2.      Pump/Filling Station hawn hun Sawrkarin a siam hi tha taka zawm nise. Hripui leng laka inven nan POL latu leh a semtu leh LPG sem, khawih leh latu zawng zawngten mask,glove,sanitizers te hmang uar se. Pump/Filling Station tinah leh LGP sem indawrnaah Social Distancing hi tha taka kal pui reng tur a ni.

# COVID-19 MEDICAL OPERATIONAL TEAM TEN PERSONAL PROTECTIVE EQUIPMENTS TANGKAI ZAWKA HMAN A NIH THEIH NAN MEDIA A THAWK TE KAWMNA AN NEI

No.3434/2019-2020

Vawiin khan COVID-19 Medical Operational Team Leader Dr. Z.R Thiamsanga leh team member ten Aizawl Hospital-ah COVID-19 damlo te enkawl nana Personal Protective Equipments (PPE) tangkai zawka hmandan leh India ramah PPE supply a tam tawk loh avanga mipuiten PPE hmandan tur dik leh a hmanna chiang zawka an hriat theihnan leh COVID-19 chungchanga hriattur pawimawh thehdarh nan, mipui rawngbawltu pawimawh tak, media firm hrang hranga thawkte kawmna an nei.

Hmalam hun a hriatloh avangin PPE hi thiamtak leh tangkai taka hman a ngai a ni tih COVID-19 Medical Operational Team Leader Dr. Z.R. Thiamsanga chuan a sawi a District zawng zawngah leh Primary Healthcare Center ah PPE sem vek turin sawrkar chuan rua hmanna a siam a ni, a ti a. Hriatchianloh leh hlauhthawnna avanga Personal Protective Equipments (PPE) mahni a lo leikawl leh chheprel chu ti lo hram turin leh; leikawl tam tak te pawhin medical personnel ho hman a tan pe (donate) hial se an duhthu team member te hian an sawi a. PHE Department te’n hmun hrang hrangah kutsilna an siam avangin lawmawm an tih an sawi bakah Local Task Force te thu awih a, mahni in a awm turin mipuite an ngen nawn leh a ni. Tun hnaia mi tam takin an lei leh an mahni thu a an lo ei lawk, Hydrochloroquine leh Azythromycin eipawlh chuan lungphu a tih muan theih avangin, doctor ten ECG test result an en hnu a, eitur an tih chauh loh chuan mahni thu a eilo turin mipuite an ngen nawn leh a ni. Gloves hman aiin, sahbawn a kutsilfai ngun a pawimawh zawk tih mipuiten hre nawn leh se an tih thu an sawi bawk a. Gloves hman tam hian environmental pollution a siam a, thawi thei mai a nih loh avangin environment ti chhe tu pakhat  a ni thei, tiin an sawi a ni.

Personal Protective Equipments (PPE) hmanna tur te:

• 1.    COVID-19 vanga rinhlelh damlo lak hran (isolate) ngai a awmin.
• 2.    ICU a COVID-19 damlo dahna-ah.
• 3.    Damlo thawhhah, COVID-19 kai rinhlelh an awm a, Ambulance-a buaipuitu doctor leh nurse te.
• 4.    Hrawk atanga sample swab la tu in.
• 5.    COVID-19 avanga mitthi ruang sawngbawltu leh tifaitu medical team te.
• 6.    Post mortem tur a awmin. 

N95 Mask hmang tur te:

• 1.    Symptoms nei- Kuh, Thawhhah
• 2.    COVID-19 damlo leh enkawltute
• 3.    Health Care pe tu-doctor, nurse, sanitation lam incharge te.

COVID-19 vanga mitthi medical team ten, fimkhur tak leh dan ang thlapa an sawngbawl hnua ruang zawn ngai a nih chuan Gloves leh Triple layer mask hman a tawk mai a, vengchhung disinfectant spray hmang tur te pawhin Gloves leh Triple Layer mask hman a tha tawk a ni. Ambulance khalhtu in damlo rinhlel a zawn dawnin Gloves leh Triple Layer mask a hmang tur  a ni. Hman zawhah uluk taka Gloves leh Triple Layer Mask te hi paih (dispose) tur a ni.  

PPE tih hian Gloves leh Medical Masks (Triple Layer Mask) leh N95 Masks, Googles emaw face shield (hmai khuhna), Gowns, Respirators, Aprons leh Shoe covers te a huam a. 

Hripui COVID-19 darh lohna atana pawimawh te:

• 1.    Kut tih thianghlim- Alcohol atanga siam kut silfaina (hand sanitizer) emaw Sahbawna silfai a ni. Hand Sanitizer hi neilo emaw leitur remchangloh avanga supply awmlo palh-ah chuan sahbawna a second 20 tal sil hian, virus a that thei a ni.
• 2.    Mit, Hnar, leh Ka khawih loh tur.
• 3.    Respiratory Hygiene vawn that tur a ni. Kuh emaw hahchhiau in kiu tih tawma khuh tur a ni a, a nih loh chuan tissue paper emaw a inkhuh a paih nghal tur a ni.
• 4.    Medical Mask (Triple Layer) hi hritlang khuh, hahchiau nei chuan hman tur. Mask hi nileng hman tur a ni lo a, darkar 6 emaw dana thlak theih a tha ber a, hman zawh a piang paih nghal bawk tur a ni.
• 5.    Social distancing (midang lakah) metre 1 tala awm hlat tur.
• 6.    Chil chhak mai mai loh tur. Chil chhak hnu midangin an lo khawih palh chuan inkai darhna awlsam leh tha tak a ni.

# HEALTH & FAMILY WELFARE MINISTER DR. R. LALTHANGLIANA'N MARCH NI 31, 2020 A COVID-19/LOCKDOWN CHUNGCHANGA MIZORAM MIPUITE HNENA A THUCHAH

Zoram mipuite chibai ka buk leh a che u. Vawiin Mizoram Lock Down ni 10 na leh National Lockdown ni 7 niah hian chanchin lawmawm kan nei zel a, Pathian hnena kan tawngtaina rah a ni. 

1. MIZORAM DINHMUN: Mizoramah Covid-19 vei mek pakhat kan nei a, a dinhmun a ṭha a, ngaihtuahawm a ni lo. 

▪  Total number of Sample sent = 44    (Positive = 1 (ZMC-a enkawl)

Vawiina result kan hmuh thar ber sample 15 result pawh a vaiin a negative vek a ni. A lawmawm hle. Kan tawngtaina rah a ni.

Mizoramah hian tualchhunga inkaichhawng (community transmission) a la awm lo nia hriat a ni a, a lawmawm tak zet a ni.

2. COVID 19 DONAAH MIZORAM KAN CHE ṬHA:

i) Kan hriat theih chinah Airport a khualzinte screening ti hmasa ber state  kan niin kan hria. 

ii) Lockdown kan zawm tha. India ramah a zawm ṭha ber State kan ni hial awm e. 

iii) Local Task Force kan nei ṭha. An zarah buai lutuk lovin kan awm thei rih zel a ni.

iv) Tun kan dinhmunah hian Vairengte lam atanga lo luhnaah hian Super strict-a kan inven chuan he hri lakah hian kan him theiin kan mithiamten an ngai deuh tawh hial a, eng emaw thleng palh thut erawh a la awm thei.

3. SORKAR HMALAKNA LEH HMALAK LEH ZELNA TURTE:

i) State Referral Hospital, Falkawn/ZMC Hospital ni bawk chu Covid-19 operational hospital/Dedicated Hospital atana identified (ruat bik) a ni. Covid-19 veite enkawl bikna tura ruahmanna siam niin a him thei tur ang bera duan a ni.

ii) Mental Health Committee din: Dr. C Lalhrekima kaihhruainain din a ni. 

iii) Physicians’ Committee: Sorkar doctor pension tawh leh thawk mek te leh private lama specialist thiamte tangho a din a ni.

 Mipuiten kan hriat ngai chu Covid 19 laka inven nan Chloroquine Hydrxychloroquine leh Azithromycin te mahniin an lei tih hriat a ni a. Heng dawmdawite hian nghawng tha lo tak tak a neih theih avangin Doctor leh mithiamte thurawn la lo chuan tumahin lo ei ve ngawt loh tur a ni. Lung lam leh kal tha lo tan phei chuan fimkhur zual a ngai hle.

Niminpiah maiah pawh khan Guwahati-a pa pakhat chu hetiang lam kaihhnawih nia ngaihzawn theih hian a thi a ni. Fimkhur a ngai hle. 

iv) Covid-19 testing laboratory (BSL-3): Laboratory nei tur hian nasa taka beih a ni a, 23^rd March 2020 khan hemi pual hian Core Committee din a ni a. Covid 19 test-na Laboratory nei tur hian Central sorkar leh ICMR nen indawrna neih reng a ni a. Rokhawlhna engemaw tak a awm loh chuan rei loteah Mizoramah ngei Covid 19 test-na khawl kan neih ve theih ngei a beiseiawm a ni. Hemi atan hian kan MLA helama thiam bik te, PUC Principal leh an mithiam bik te, MZU, CAU Selesih, ZMC, RIPANS lam mithiamte an thawhhlawk hle maia, an chungah lawmthu ka sawi mawlh mawlh a ni. 

v) Covid-19 Strategy and Comprehensive Action Plan (short-term and long-term): Strategy felfai tak, scenario hrang hrang ngaihtuah chunga kan hmachhawn dan tur siam  a ni ang.

vi) Telemedicine hman tangkai: Lock down hi hlih a nih hunah pawh kan him tlan nan mamawh thilah doctor te rawn nan telemedicine hi man tangkai tur a ni. Health & Wellness Centres (HWC) programme hnuaiah hian PHC/CHC a doctor te training pek vek tawh an ni a, mipuiten ngaihven ila. SC atangin kan Health & Wellness Officers te telemedicine hmangin khawpuia doctor te an rawnsak thei dawn a ni.

vi) Central lamah kan mamawh te thlen zel a ni. Union Health Minister-ah DO letter leh phone hmangtein bawhzui reng a ni.

vii) World Bank project cheng vaibelchhia 280 man chu tunah hian tihfel mek zel a ni a. He Project hian kan health system hi kawng hrang hrangin a tichak dawn a ni. 

LOCK DOWN HMAN TANGKAI TUM ANG:

i)        Hunbi fel taka vawn - Zan mut tam  

ii)        Lehkha Chhiar tam ila.  iii)     Exercise lak ṭhulh loh.

iv)      Naupang tan infiam leh a thei chuan Home Schooling te pawh tih nise.

v)       College zirlaite pawhin mahni zirlaite zir sela.

vi)      Competitive Exam ti tur ten tun hi hunthaah ngaiin theih tawpin lehkha zir hun tak a ni.

vii)     Ringtu kan nih angin Bible leh kristian lehkhabu ṭha chhiarna hunah leh fianrial hun ṭha hmanna hunah hmang ila.

LAWMTHU SAWINA:

Kan Chief  Minister in theih tawpin hma min lakpui renga. Kan Minister dangten an department  theuhah nasa takin hma an la a, kan MLA leh AMC Councillor te pawh an tang hle. Kan MP pahnihte pawhin theih tawpin hma an la bawk a, ka lawm hle a ni. Tin, COVID-19 dona atana pawisa hman mai tur kan mamawh ngawih ngawih lai anmahni duhthu ngeia thil min petu pawl eng emaw zat an awm tawh a, kan lawm em em a, mumal zawkin kan la puangchhuak zel dawn a ni.

Covid 19 do nan hian sorkar Department zawng zawngin an theih tawp tak meuh meuh an chhuah hlawm a. Mahni nunna atan hial pawh pawi thei khawpa thawkrim leh thawk nasa pawh an awm a ni.  Mahni hna theuh tlin tak leh rim taka thawktute zawng zawng mimal leh Department zawng zawngte chungah lawmthu ka sawi tak meuh a ni. 

Health Department a hnathawkte:

▪ Doctor te - damdawi leh office lama thawkte

▪ Secretariat lama thawkte

▪ Directorate a administrative staff - accounts, procurement, te

▪ Staff nurse *  ▪  Health Worker * ▪ Pharmacists

▪ Laboratory technicians/  ▪ X-ray technicians

▪ 4th Grade workers hrang2 * ▪ Drivers/ ▪ ASHA

Tin, tunah hian Main Centre, sub-centre, Clinic, Hospital, CHC leh CHC te a inhawng vek a, emergency-a mamawh tan pan theih vek an ni a, henga thawktu zawng zawngte chungah hian lawmthu ka sawi tak meuh a ni.

▪ Tin, ka sawi nawn fo duh chu Covid 19 beihnaa ralhmang tawng, tuna kan dam lo enkawl mektu, Doctor, Nurse leh thawktu dang zawng zawngte chungah lawmthu ka sawi nawn leh duh bawk a ni.

▪ Local Task Force Mizoram puma mite chungchangah lawmthu ka sawi tak meuh a.

▪ Tin, mipuite chiai lutuk lo turin ka chah nawn leh duh a, a bik takin Falkawn leh Chhimphei tlangdung khuate, kan dam lo hi a enkawl tur bikte’n enkawlna tur hmun bik siamah him tak leh uluk takin an enkawl mek a. ZMC leh sawm lam tlangdun tan hlauhawm tur a awm lo a ni, tih kha kan sawi nawn leh duh a ni.

▪ COVID 19 nitin dinhmun I&PR kaltlangin Health Department-in kan rawn update thin dawn a ni.

▪ Chhung tinte, kut fai taka sil fo tur leh ina tawm chhunzawm tlat turin ka chah nawn leh che u a, nasa zawka Pathian hnenah tawngtai zel turin ka ngen nawn che u a ni.

# COVID-19 CHUNGCHANGA INFORMATION MINISTER NGENNA

No.3424/2019-2020 

Information and Public Relations Minister Pu Lalruatkima chuan ei leh barah mipui te thlaphang lo tura chahin, Lockdown chhung hi ni 14 lai a la awm dawn avang erawh chuan mipuite ei leh bar, Electric, Tui leh thil dang  inremchem ngai apiangah inrenchem turin a chah.

Mizoram anga COVID-19 laka invennaa hma la tha an awm a hriat loh thusawiin Minister chuan Kohhran, NGO leh Sorkar nen thawhhona tha tak kan neih avang a nih thu a sawi a. Kohhran/ Khawtlang/ Village/Local Task Force te thahnem ngaihna ah mipuite an thlamuang a ni, a ti bawk. COVID-19 avanga khawvel sorkar lian leh chakte an buai mup mup karah, he natna laka kan him theihna tura, inven hna thawktu Health Department, dan leh thupek kengkawhtu, Tui, electric leh NGO hrang hrangte inpekna chu hnamdangten an lo hriat ve thu leh ropui an tih thu National newspaper thlengin hmuh tur a awm chu lawmawm a ti a.Social media hrang hrangah mipui ten thuthar kan hriat zung zung theihna turin sorkar chuan theihtawp a chhuah zela, sorkar thuchhuak lo chu ring mai lo tur leh mipuite chi ai mai lo turin Information Minister Pu Lalruatkima chuan a ngen a ni.

Naktuk 1/4/2020 hi April Fool’s Day a nih avangin mipui tichiai zawng leh thudik lo Social media-a vawrhdarh lo tura chahin, hetianga ti an awm a nih chuan an chungah dan anga na taka Action lak a nih tur thu Minister chuan a sawi a. Vawiin thlenga harsatna leh buaina lutuk kan tawh loh chhan hi mipuiin sorkar thu kan ngaihchan thiam vang a ni a, thu awi taka sorkar thu zawm chhunzawm zel turin Pu Lalruatkima chuan mipui a ngen bawk a ni.

# DEPUTY CHIEF MINISTER-IN KHAWZAWL DISTRICT DAMDAWI IN LEH TASK FORCE MAMAWH A PE

  No.3432/2019-2020

Tuichang bialtu Deputy Chief Minister Pu Tawnluia chuan a bial chhung bakah Khawzawl District a Damdawi In awm te mamawh PPE tun hnaia Mizoram Sorkarin a chah thlen chu motor ngaihtuah sa in vawiin March 31 khan Khawzawlah phurh thlen a ni.

Pu Tawnluia hian heng bakah hian a bialte tan Mask 1500, Glove 150, Sanitiser 50 Litres, Disinfectant thahnem tak leh Silpouline Bundle 4 a pe a.A bial chhunga Task Force te leh Damdawi In lamin an mamawh hun atana an hman tura ruahman a ni.Pu Tawnluia hian Sialhawk Damdawi In a Isolation Ward thawm that nan pawisa fai a pek tel bakah a bial chhunga District leh Village Level Task Force leh MNF Block duty te tan tanpuina pawisa fai a pe bawk.

Khawzawl CHC, Khawhai PHC, Sialhawk PHC leh a bial pawn Khawzawl District chhung Rabung, Kawlkulh leh Biate CHC a Frontline Workers te tan cheng 20,000 theuh a pe a.Pawisa fai tanpuina a hlan hi a vaiin cheng 5,00,000 a ni.A bial chhunga ei leh bara harsatna tawkte chhawmdawl nan Buhfai Quintal engemawzat sem turin ruahmanna siam tel a ni bawk a ni. Heng bungrua leh tanpuina pawisate hi Khawzawl District leh Bial mipui aiawhin Pu H.Lianzela, Deputy Commissioner Khawzawl in a lo dawng a ni.

# CHAMPHAI DISTRICT THLAI HNAH LEH RAH LAKKHAWM LEH PEKCHHUAH CHUNGCHANG

No. 3440/2019-2020

District Level Task Force on Covid-19 thurel bawhzuiin, Champhai District chhungah lockdown kalpui anih chhungin  ei leh bar kawngah harsatna a thlen lohna tura hmalak mek zel a ni a.  Champhai leh a chhehvel khua atangtein thlai rah leh hnah awm ang angte Nodal Officer Pu Vanlalvuana Rokhum, SDHO Champhai ruahmanna a lakkhawm a ni a, Champhai khawpui  leh a chhehvel Village Level Task Force (VLTF) te kutah rualkhai taka sem niin, an ni kaltlangin mipui te hnenah mamawh ang tawk zela hralh a ni. 

Ruahman dan chuan khua/veng hrang hrang te’n thlai rah leh hnah an thar chhuah leh hralh theih zat tur chiang takin Nodal Officer hnenah  an hriattir hmasa zel tur a ni a. Veng/khua chawhmeh lei duhte chuan Nodal Officer hnenah an mawmawh thu an thlen thin ang a, remruatna fel tak hmangin  rualkhuai thei ang bera sem darh thin tur a ni.   Village Level Task Force te’n anmahni a ruahmanna  an lo siam anih pawhin Nodal Officer an hriattir hmasa phawt thin dawn a ni.

Nodal Officer: Pu Vanlalvuana Rokhum, SDHO Champhai (8974317671)

Nimin  March Ni 30, 2020 (Thawhtanni) a Champhaia chawhmeh lakkhawm zat leh hralhchhuah zat chu a hnuaia tarlan ang hi a ni:  

# LAWNGTLAIAH DISTRICT SUPPLY CHAIN COMMITTEE THU KHAWM

No.3433/2019-2020

COVID-19 vanga inkharkhip laia Lawngtlai District chhunga mipuite'n ei leh bar leh an ni tin mamawh an tlakchham loh nana ruahmanna siamtu District Supply Chain Committee chu vawiin khan an Chairman, Lawngtlai Bawrhsap Pi Shashanka Ala, IAS hovin a pisaah an thu khawm.

He thut khawmah hian buhfai, thei leh thlai, tui, dawr chawhmeh, ei rawng bawlna gas, lirthei tui leh ni tin mamawh danga tlakchham a awm leh awm loh thlir ho a ni a. Mipui mamawh khawp chhek khawl sa a awm vek tih tar lan a ni a. Hei bakah hian District pawn atanga lak luh ngai chi-ah lo la thleng tur dang a awm thu leh khaihlak lova a lo thlen zel theih nana ruahmanna siam a nih thu te pawh ngaihthlak a ni.

Sawrkar ruahmannain buhfai chu April thla chanpual sem chhuah tawh niin, AAY leh PHH te phei chu a thlawna pek an ni a. District chhunga ration card nei lote zawn chhuaha chhinchhiah niin, buhfai an lak ve theih dan tur ruahman a ni bawk.

Kut hna thawktute thar chhuah a riral mai loh nan leh, mipuite'n an mamawh thei leh thlai an hmuh theih nan District Supply Chain Committee hma lakna hnuaiah Horticulture Department chuan thingtlang atangin thei leh thlai phur khawmin, a thawh khat nan tihral zawh tawh a ni a. Hei hi mipui mamawh dan azirin chhunzawm chhoh zel tur a ni.

Mipuite'n an mamawh an hmuh theih nan hian CYLA leh khua/veng tina local task force te'n rim takin an bei a. An hma lakna a chhuanawmin, District Supply Chain Committee paw'n an chungah lawm thu a sawi a. Ram mipuite tan sawrkar thawhpui zel turin a ngen nghal bawk.

District Supply Chain Committee chuan inkharkhip chhung hian District mipuite chhuanchhama an awm loh nan theih tawp chhuahin hma a la zel dawn a. Tun dinhmunah chuan harsatna awm lo tura ngaih a ni. Chutih rual chuan, hma hun hriat lawk a nih loh avangin, a theih chin chinah inrenchem turin District Supply Chain Committee chuan District mipuite a ngen a ni.

# NITIN MAMAWH PHURTE HOTEL/WORKSHOP TEN PUIH HUAM

No.3428/2019-2020

Tunlai hripui COVID-19 avanga nitin mamawh phur motor driver ten ei leh in mamawh emaw, motor siam ngai emaw te tan a hnuaia tarlan Hotel/Workshop ten engtik lai pawhin tanpui an inpeih reng.

SERCHHIP DISTRICT

1. Sangpuii Hotel,Vachadil,Thenzawl                              Mobile No:8787829321 
2. Serchhip Hotel (Sailiam) Prop:Maduhi                        Mobile No 8415062934/936641433 
3. Azoa Workshop,Thenzawl                                           Mobile No:8259906422 
4. Bawla Workshop(Near IOC) Serchhip                         Mobile No.7085073445 

MAMIT DISTRICT

1. Manuni Hotel West Phaileng C/o C.Lalrinliana           Mobile No: 8415094665 
2. Workshop C/o C.Lalrinliana                                        Mobile No:8415049665 
3. Lalhmingmawia Tuipuibari                                          Mobile No:8119092202 
4. Mawii Damparengpui                                                  Mobile No: 9615500180 
5. Rinpuia Rengdil                                                          Mobile No:8259905534 
6. K.Lalngheta (Workshop)                                             Mobile No:8974215454 
7. Order Hotel,Kawrthah Prop: Thuampuii                     Mobile No:8414008311 
8. Nunsanga (Workshop)                                                Mobile No:8414912154 
9. Didik Hotel,Zawlnuam                                                Mobile No.9862111033 
10. J.Lalrinmawii VCP,Phuldungsei,                                 Mobile No:8132845045 
11. Zathanga,Pukzing.                                                      Mobile No:9630941401 
12. CK Hotel Mamit                                                           Mobile No:7640969368 
13. H.S.Workshop,Mamit C/o Lalthazova                          Mobile No:9862317386 
14. Hmangaihsanga,Dapchhuah                                        Mobile No:6009468939 
15. Biaksailova Dapchhuah,                                              Mobile No:9612609219 

AIZAWL EAST

1. Green Hills Hotel Saitual,Keifang                               Mobile No:8730926056/9612177207 
2. K.L.Restaurant Phullen.Prop:Sawma                         Mobile No:7629884602 
3. Liantlangpui Hotel Khawruhlian Prop:Sawmi             Mobile No:7629974276/8787624868 
4. Risk Hotel,Darlawn,                                                   Mobile No:9615453271 
5. PTL Auto Works,Saitual Mel Veng.                           Mobile No:9862003929 
6. Suaka Centenary Workshop,Edenthar,Aizawl,          Mobile No:9862372316 
7. Liando Auto Works,Zemabawk,Aizawl,                     Mobile No:9862372316 

LUNGLEI DISTRICT

1. Zaupuia Hotel,Thenzawl                                             Mobile No:9612065563 
2. Kawltea Rinzual Hotel,Thenzawl                                Mobile No:9612065528 
3. Vantawng Hotel,Thenzawl                                          Mobile No:9862329909 
4. N.R.Hotel Sialsuk                                                       Mobile No:9366461828 
5. Zova Workshop Thenzawl                                          Mobile No:9378094066 
6. Singha Mechanic                                                         Mobile No:9774334595 
7. C.T.Hotel,Chhumkhum                                               Mobile No:9436328724 
8. Nutei Hotel,Lungsen                                                   Mobile No:8131936062 
9. Mamuani Hotel,Lungsen                                            Mobile No:8258920738 
10. Order Hotel,Tuichawng                                              Mobile No:8730882253 
11. Punte Automobiles(LMV),Tlabung                             Mobile No:9436390844 
12. New Hotel,Chawngte                                                 Mobile No:9402177234 
13. Chawngte L Workshop Chawngte L                          Mobile No:9402539273 
14. Chawlhni Hotel,Phairuangkai                                     Mobile No:9366404848 
15. Mami Tea Stall,Tuipui D                                             Mobile No:9366898684 
16. Thangpiana Hotel,Peniel Veng                                   Mobile No:9612694364 
17. Peki Hotel,Peniel Veng                                               Mobile No:9436382439 
18. KVT Automobiles S.Vanlaiphai                                 Mobile No:9383006429 
19. Zothan Auto Works,Peniel Veng                               Mobile No:8730801416 
20. Islam(Mechanic) Hnahthial                                       Mobile No:9378044072 
21. Vani Hotel,Tawipui S                                                 Mobile No:8732856961 
22.  CLS Hotel,Tawipui S                                                Mobile No:7085362546 
23. Rii Hotel,Tawipui S                                                    Mobile No:8119968088 
24. Chawng Chawng Hotel,Haulawng                             Mobile No:8414953909 
25. Es Es Hotel,Haulawng                                                Mobile No:8256905198 
26. Hriatpuia Hotel,Haulawng                                          Mobile No:8730975160 
27. Tlawng Hotel,Tlawng River                                       Mobile No:9485467013 

AIZAWL WEST

1. Riahchilh Hotel,Sialsuk                                              Mobile No:7640989169 
2. Marina,Aibawk                                                           Mobile No:8837220581 
3. Mahlimi Rawpuichhip                                                 Mobile No:8730960307 

SIAHA DISTRICT

1. Lungbun Hotel,Lungbum                                           Mobile No:7085925652 
2. R.M.Hotel New Siaha                                                Mobile No:7005231013 
3. Fel Fel Hotel,New Siaha                                             Mobile No:9436387849 
4. Hotel Eros New Colony,Siaha                                    Mobile No:9612307483/9402305753 
5. Laitlang Hotel,Vety Kawn,New Siaha.                      Mobile No:8974170574 
6. Generation Motor Works,New Siaha West,               Mobile No:9612279253 
7. Lalmama Motor Workshop,Saihatlangkawn              Mobile No:8730930699 
8. Cassey’s Motor Parts,Vengpui Siaha                          Mobile No:9612614456 
9. FL Motor Parts,New Colony,Siaha,                           Mobile No:9436614830 

CHAMPHAI DISTRICT

1. Thuampui Hotel,Zero Point,Kawlkulh,                      Mobile No:9862713984 
2. Chawlhna Hotel,Khawzawl Vengthar                        Mobile No:9862166965/9382348216 
3. MS Dawngsanga Workshop Veng,Kawlkulh             Mobile No:8974134960/8974772009 
4. Pand S Motor Workshop,Khawzawl Vengthar          Mobile No:6009017309 

KOLASIB DISTRICT

1. Ebenezer Hotel, Zalen Veng,Vairengte                      Mobile No.7005862259 
2. Seipuii Hotel,Zalen Veng,Vairengte                           Mobile No:8787384015 
3. Kim Kim Hotel,Diakkawn,Kolasib                             Mobile No:9612433756 
4. Remtluangi Dawr,Khuangpuilam,Kolasib                  Mobile No:9366988371 
5. Cindy Motor Works,Khuangpuilam,Kolasib              Mobile No:8132097627/9436143167 
6. R.B.Motor Works, Vengthar,Kolasib                         Mobile No:8787535846/8837075559 

LAWNGTLAI DISTRICT

       1.        David Motor Works,Lawngtlai A.O.C.                       Mobile No:7085160439/8731917745 

      2.         Carolyn Hotel,Lawngtlai Bazar                                  Mobile No:8413948042 

      3.         Kungi Hotel,Zero Point,(Near BungtlangS)               Mobile No:9862152916 

      4.         Mapuii Hotel, Tawipui South                                                 Mobile No:7085930747 

      5.        Mathani Hotel,Diltlang South                                               Mobile No:6009553417 

      6.        Partei Hotel,Vaseikai                                                           Mobile No:9612555483/6909815529 

       7.      Jojo Hotel,Vaseikai                                                             Mobile No:8414904984 

# EIBAR LAK LEH LEI CHUNGCHANGA LUNGLEI DC HRIATTIRNA

          Lunglei Town chhung Dawr atanga mipuite nitin eibar lak/lei chungchangah kalphung fel zawk a awm theihnan a hnuaia tarlan ang hian kalpui tur a ni.

1. Lunglei khaw pawn atanga Lunglei-a mamawh lei dan tur:

            Nitin eibar (essential commodities) lei chungchangah Lunglei khaw pawn lam tan chaklak ni atan Monday leh Thursday ruahman a ni a. Hetiang hian mamawh lei hun siam a ni.

          Monday–     1) Mausen atanga hmar lam zawng khuate

                       2) NH-54 kawngpui leh a chhehvela awm khuate, Lunglei                                   town chhung tiam lovin

                       3) Lunglei South lama awm, Luangmual atang kal pawh theih        khuate

          Thursday – Lunglei West lama awm khuate, Lunglei town tiam lovin        

2. Lunglei town chhunga mite tan VLTF-te nena inberawnin ruahmanna siam zel a ni ang.

3.Thil lei dan kalhmang: Hriattirna chhuah a nih thin tawh angin chaklak leh inpek reng reng hi VLTF kaltlang veka kalpui tur a ni. Mimal emaw chhungkaw malin emaw a hrang hranga kal chhuah tir ngawt lovin VLTF in list fel tak, thil lei tur hming leh lei tur zat (Item name and quantity) a buatsai hanga, dawr awmna veng VLTF te berawnin a remchan dan angin a hlawma lak tur a ni. Hemi bakah hian eibar mamawh chungchangah tuna kalpui mek angin Sub-Hqrs YMA-a report lut te pawh VLTF ah thlen a ni anga, a tul angin hmalakpui a ni ang.

      District Administration hnuaia Liaison Officer ruat leh Inspection Squad ten thil lei leh hralh chhuah kalphung hi a hmunah a tul anga enpuiin VLTF te an puibawm thin ang.

4.Sale & Stock Position record: Veng/Dawr hrang hranga thil hralh chhuah/ pekchhuah leh la awm zat (sale &stock position) chu VLTF ten an record anga, Inspection Squad te pawhin sale & stock position hi VLTF te puihbawmna-in an lakhawm anga, Liaison Officer hnenah an thehlut ang. 

# MADC-A EX-MDC LEH SITTING MDC TEN AN THLAKHAT QUOTA AN HLAN

 No.3429/2019-2020

Pu J.Vanlalchhunga, DCSO, Siaha district in Executive Secretary,MADC kaltlanga ngenna a siam angin, Ex-MDC leh Sitting MDC, MADC te chuan phal takin an thla khat khawnvartui(K.Oil) quota chu Covid-19 avanga harsarna tawk leh chhungkaw harsa zual te hman atan an hlan.

He K.Oil hi DCSO leh LLTF/VLTC te  tangkawp chuan a dawngtu tur dik tak chhungkua in an dawn ngei theih nan  an enpui  ang.

# CHAMPHAI OFFICERS’ CLUB TEN TANPUINA HLAN

No. 3441/2019-2020

Champhai Officers’ Club (COC) chuan vawiin  khan Covid-19 dona tura lockdown kalpui mek anih laia harsatna tawk theite hnenah tanpuina an sem chhuak.

COC Member-te hi an pawl President  Pu RL Thianghlima, Principal, DIET Champhai hovin an che chhuak a.  Mazuia Memorial Home (TNT), Genesaret Gospel Home,  Immanuel After Care Centre leh Grace Receiver Home-te tlawhin tanpuina pawisafai an hlan a ni. Vawiina tanpuina pawisafai semchhuah zat hi avaiin Rs 50,000/- a ni. Champhai Officers’ Club hian pawl member-te sum thawhkhawm kaltlangin mamawhtu leh tanpui ngaite puiin  an lo fehchhuak  fo tawh thin a ni.

# MADC OFFICERS' ASSOCIATION LEH DRIVERS' ASSOCIATION TE CHUAN COVID-19 DO CHHUNZAWM ZEL NAN MTP(H) HNENAH TANPUINA AN HLAN

No. 3439/2019-2020

MADC Officers' Association (MADCOA) chuan Covid-19 do nan leh akaihhnawih thil tul a pianga hman turin vawiin chawhma dar 11:30Am khan Mara Thyutlia Py (MTP), General Headquarters hnenah pawisa fai Rs.1,00,000/- (cheng nuaikhat) an hlan a. MADC Drivers' Association pawhin a tulna apianga hman a tan Rs. 10,000/- (Cheng singkhat) an hlan ve bawk.

Tanpuina hi MADCOA aiawhin an hruaitu Pu K. Chhihrau, President, Pu JH. Beihnai, Finance Secretary leh Pi Elizabeth N. Dawku, Treasurer ten an hlan a. MADC Drivers Association aiawh in Pu C. Hminglua, Treasurer chuan a hlan ve bawk. Pu S. Vabeihasa, Vice President, MTP Gen.Hqrs. chuan heng tanpuina tangkafai te hi MTP(H) aiawhin a dawng.

Pu K. Chhihrau chuan fuihna thu sawiin, Covid-19 dona kawnga MTP(H) hmalakna hi MADCOA chuan ropui a tiin; a thlawp tlat a. A tulna leh mamawhna awm thei hrang hrangah tanpui zel tura an inpeih reng thu a sawi bawk. MADC Drivers' Association te pawhin MTP(H) in theitawp chhuaha Covid-19 dona kawnga hma a la chu ropui an tih thu sawiin; an thlawp tlat thu leh tanpui zel pawh an inhuam reng thu an sawi ve bawk a ni.

Pu Pakhaw Chozah, General Secretary, MTP Gen.Hqrs pawhin lawmthu sawina neihin, he Covid-19 dona kawngah hian MTP chu hmahruaitu ber a ni a. Mahse Sawrkar, Pawl, Kohhran leh mi mal inphalte hnen atang erawh chuan tanpuina an la dawn lem lo thu sawiin; Chutiang a ni mek laia a ram neihtu leh kan ram leilung fa MADC a thawk officer Association(MADCOA) te leh MADC Drivers' Association ten tanpuina an hlan chu a lawm tak zet a. MTP aiawhin lawmthu ka sawi tak meuh meuh a ni, a ti.Covid-19 kan dona kawngah je tanpuina hian tha min tihchak hle dawn a ni, a ti.

 MTP chuan sawrkar lam atanga tihtur a an tihte chu inhawng tak leh phur takin District , Local leh Village Level Task Force te kaltlangin tha kan thawk mek a. Covid-19 dona kawngah hian a tulna apiangah thathlah lovin MTP Gen.Hqrs chuan hma a la chhunzawm zel dawn a ni, a ti bawk.