Mizoram-ah chhiatna a thlen changin thenawm khawveng ten theih ang angin chhiat tawk chhungkuate kan in tanpui thin a. Sorkar pawhin chhiat tawk chhungkuate tanpui dan tur bithliah a neih angin tanpuina a pe thin a. Hemi lam enkawltu Disaster Mangement & Rehabilitation (DM&R) Department chuan district ah te a hrana thawktu a neih loh avangin district tina Deputy Commissioner te chu hetiang buaipuitu an ni nghal a. DM&R Department chuan a tul anga hman turin DC tinte hnenah pawisa leh bungrua te a pe thin a ni. Mizoram hi lirnghing na tak thlen mai theihna, Seismic Zone-V ah a awm avangin chhiatna nasa tak thleng thei hmachhawn turin sorkar a inbuatsaih a. Chhiat tawh thulha hma la turin hetiang hian ruahmanna siam a ni.
Chief Minister chairman-na hnuaiah State Disaster Management Authority (SDMA) chu thuneitu sang ber niin State Disaster Management Policy leh a kalpui dan tur guideline siam te, State Disaster Managment Plan enfiah leh a taka district leh village levela thawh a nih dan enzui thlengin SDMA  thuneihna hian a huam a ni.

District tinah D.C chairman-na hnuaiah Disaster Management Authority (DDMA)siam a ni a.Hei hian District Plan leh District Response Plan te a siam ang a. District chhunga Block level District Disaster Management Committee (BLDMC) leh Village level Diasater Management Committee (VLDMC) te hnathawh dan a enzui ang.

VLDMC te hnathawh enzui turin block tinah Block level Disaster Management Committee, BDO chairman-na hnuaiah siam a ni bawk a.  Village tinah chhiatna  lo thlena a tul anga hma la turin Village level Disaster Management Committee, VCP chairman-na hnuaiah siam a ni bawk.

Heng bakah hian Ist & 2nd MAP leh Ist & 2nd IR atangin company khat theuh, an vaiin mi 400, State Disaster Response Force (SDRF) din a ni a. Ist & 2nd MAP atangin mi 50 te chu kumin June thla khan CTI Sesawng ah training pek zawh an ni.

SDRF bakah hian khawtlang mite hi thawk chhuak hmasa ber an nih thin avangin Village level DMC tinte chuan First Aid team te, Search & Rescue team te dinin training an pe a. School naupangte him zawk nan zirtirtu tam tak school safety training pek an ni tawh bawk  a. Engineer te, Arichitect te leh cement Mistiri te pawh engemaw zat lirnghing laka insak dan him zawk zirtir an ni bawk a ni.

Tun hnaiah Aizawl khawpui chhungah leh hmun dangah ruahsur nasat avanga leimin-in in luahlai a hnawl te a thlen nual avangin nunna chan leh hliam tuarte an awm a. Hemi chungchangah hian State Disaster Response Force te chhiat tawhna hmuna an kal leh kal loh chungchangah nitin chanchinbu hrang hrangah zawhna leh sawiselna a chhuak nual a. Chhiatna eng pawh a lo thlen hian Block DMC ah emaw, DDMA/DC hnenah thlen vat tur a ni a. DC hian a tul dan angin SDRF te a ko chhuak tur a ni. Bengvar leh tlawmngaih thila SDRF te an lo thawk chhuak nghal a nih chuan thil duhawm tak a ni a. Hemi rual hian SDRF te hi dan ang chuan chhiatna lian tham (disaster), mipui tlawmngaite tana tih harsa deuh ah te thawk chhuak tura ngaih a ni.