1264/2025-2026

Siaha the 21st July 2025: Vawiin chawhnu dar 2 khan Additional Deputy Commissioner Office Chamber, Siaha-ah Disaster Management & Rehabilitation (DM&R) Department atanga chhiatrupna thlen palha hman tur hmanraw chi hrang hrang inhlanna hun hman a ni.

Pu Abraham Beirazi Khithie, ADC-in he hun hi kaihhruaiin sawrkar leh tlawmngaipawlin thawhhona tha tak an nei thin chu lawmawm a tih thu a sawi a, chhiatna thleng a awm reng rengin Mara Thyutlia Py (MTP) chu che chhuak hmasa ber an nih zel avangin bungrua in hman hawhah inthlahrung lo tawn se, chu chuan khawtlang leh ram tan rah tha a chhuah ngeia a rin thu a sawi. Vawiina bungrua inhlan tak te pawh chuan thawhhona tha lehzual a hrinchhuah a beisei thu ADC hian a sawi bawk a ni.

Pu Pakhaw Choza, President, MTP General Headquarters, Siaha pawhin thu sawiin veng tinah MTP branch din niin chhiatna thleng a awm reng rengin che chhuak hmasa ber an ni thin a, amaherawhchu bungrua an neih that tawk loh avangin duh anga chak leh thaa hna thawh a har thin tiin, district disaster management authority lamah silpauline an dil thinte ngaipawimawha ngaihtuahsak an ni thin chu lawmthu a sawi. Tun tumah bungrua chikim zawk DM&R in an pek chungchangah lawmthu a sawi bawk. MTP President chuan Khuarel chhiatna chu khawvel hmasawnnain a ken tel pakhat anih avangin theihtawpa inven a tul a, member-te tan pawh thahnemngaih lehzual a tul a tih thu a sawi bawk a ni.

Pu Israel Chozah, GS MTP General Headquarters, Siaha chuan District administration leh DM&R in tlawmngai pawl an ngai pawimawh a, tanpuina leh ngaihsakna an lantir thin chu lawmawm a tih thu a sawi a, Pu Solomon N. Beihlôthá, AGS MTP General Headquarters, Siaha pawhin Siaha district in chhiatrupna a tawh tam ber chu leimin leh tui-a chetsualna a nih thu a tarlang bawk a ni.

Vawiin a hlan tak bungrua te chu

1) Rope 20 mm 50 mtrs- 3
2) Stretcher- 2
3) Life jacket -4
4) Head torch-7
5) Megaphone-2
6) First Aid kit-5 te an ni